Padang – Tanyato minaik masyarakaik Sumatera Barat mampugunokan Kureta Api untuk pai jalan-jalan, lubuan dan sabagainyo sangaik tinggi. Induak usaho perkerataapian ko, PT KAI menyabuikan minat bawisata jo kureta api ko tinggi di Sumatera Barat tarutama pdo musim libur panjang patang ko (Idul Adha, Waisak jo Hari Lahia ny Pancasila).
Dari 27 Mei sampai 1 Juni 2026nan naiak kureta api ko ado 40.514 urang antaro Padang – Kayutanam, Padang – Nareh, jo Padang –Bandara Minangkabau.
KA Pariaman Ekspres menjadi layanan nan paliang diminati dengan jumlah penumpang mancapai 30.255 urang atau setara 119 persen dari total kapasitas kurisi nan tasadio dalam gerbong-gerbong kureta ntun (25.440 kurisi)
Samantaro KA Minangkabau Ekspres malayani 5.877 panumpang, sadangkan KA Lembah Anai malayani 4.382 panumpang ka Kayutanam.
“Iko manuruik kami tando kureta api makin dippicayo dek masyarakaik sabagai moda transportasi pilihan untuuk bawisata, basilaturahmi, sarato mamanuahi babagai kebutuhan perjalanan salamo maso liburan.
Kepalo Humas KAI Divre II Sumbar, Reza Shahab manyabuikan baso hasia positif ko manjadi indikator maningkatnyo kepercayaan masyarakaik ka layanan kureta api nan maagiah perjalanan aman, nyaman, tapek wakatu, sarato indak ado curoto macet-macet bagai.
Salamo pakansi panjang patang ko Stasiun Padang tacataik sabagai stasiun keberangkatan dengan jumlah pelanggan paliang ikik, 11.164 panumpang. Sudah tu Stasiun Pariaman dengan 7.594 panumpang, Stasiun Nareh sabanyak 3.243 panumpang, Stasiun Air Tawa sebanyak 2.893 panumpang, Stasiun Lubuak Alung 2.058 panumpang.
Di sampiang bafokus ka palayanan, KAI Divre II Sumbar juo mautamokan keselamatan sabagai prioritas utamo dalam operasional perkeretaapian. Salamo maso pakansi panjang patang ko, patugeh rutin mamareso sarana jo prasarana, pemantauan pajalanan kureta api, sarato ndak lupo sosialisasi keselamatan ka masyarakaik nan barado di sekitar jalur rel.
Dek itu lo agaknyo PT KAI ka dimintak dek Presiden Prabowo maaktifkan baliak jalur kureta api di Sumatera Barat. Patang ko Wakia Ketua Komisi VI DPR RI Andre Rosiade menyabuik baraso Presiden Prabowo Subianto serius mangambangkan kureta api di Sumatera Barat.
Salah satu program nan ka dikarajoan adolah reaktivasi sejumlah jalur kureta api nan kabiayai jo kepeng negara sabanyak Rp300 miliar.
Iko disampaikan dek Andre kutiko rapek Komisi VI DPR jo Direktur Utama PT Kereta Api Indonesia (Dirut KAI) Bobby Rasyidin di kompleks parlemen, Senayan, Jakarta, Rabaa pagi sampai siang.
Jalur nan ka direaktivasi ntun, antaro lain dari Nareh ka Sungai Limau 6,5 kilometer, Kayu Tanam-Padang Panjang-Bukittinggi-Limbanang sapanjang 162 kilometer, Muarokalaban-Sawahlunto 4 kilometer, Padang Panjang-Batu Taba 18 kilometer, Batu Taba -Solok 34 kilometer, Solok-Muarakalaban 24 kilometer.
Kecek Andre program ko menjadi kaba baiak untuk masyarakaik Sumbar karano akan mambukak konektivitas baru, mangurangi biaya logistik, mendorong pertumbuhan ekonomi daerah.
Andre manambahkan baso reaktivasi jalur lamo ko, juo untuk menyusun peta jalan pangambangan jaringan kureta api di Sumatera sahinggo konektivitas antarwilayah dapek diujudkan.
Samantaro tu, Dirut PT KAI Bobby Rasyidin mangatokan KAI sadang manyiapkan proyek pangambangan jaringan kureta trans Sumatera dengan kebutuhan investasi sekitar Rp 350 triliun. “Proyek ko untuk mahubuangkan jalur kereta api dari Banda Aceh sampai ka Bandar Lampung untuak mampakuaik konektivitas, mobilitas panumpang, sarato distribusi logistik di Pulau Sumatera ko,” kato Bobby. (tan parpatiah)
