Padang – Sajak satahun belakangan ko, ndak basobok lai di Singapura kalau awak nak ciknan jo lapau nasi Minang. Karano lapau nasi padang nan sero dan satu-satunyo, Warong Nasi Pariaman lah ditutuik dek nan punyo.
Tapi lun lamo ko, urang nan tingga ataupun pendatang di Singapura nan ndak bisa meninggakan salero padang nyo, kini lah bisa malapeh salero jo taragaknyo karano lah ado pangganti Warong Nasi Pariaman, yaitu Rumah Makan Sederhana.
Bak papapatah Minang mangatokan, ramo-ramo si kumbang jati, katik endah pulang bakudo, patah tumbuah hilang baganti, pusako lamo takana juo. Di nagari singo ntun kini RM Sederhana diosong dek pengusaha Singapura namonyo Asyraf Rasheed.
Pangusaha kuliner Asyraf Rasheed ko mancaliak kasampatan untuak mambaok raso otentik Minang ka Kampong Glam. Dengan mamakai bakeh lokasi Warong Nasi Pariaman, inyo mambukak cabang patamo Rumah Makan Sederhana di Singapura.
Pangusaha nan masih mudo (33 taun) ko punyo alasan untuak mambaok rantai restoran Indonesia nan tanamo ko ka Singapura: inyo nio manjago raso otentik masakan Minang di Kota Singo.
RM Sederhana, nan didirikan dek Haji Bustaman pado taun 1972, alah manjadi salah satu rantai nasi padang terbesar di Indonesia, labiah dari 200 outlet di saluruah Indonesia, Malaysia, jo Australia. Rumah makan di Kampong Glam ko manandoan gerai patamo merek iko di Singapura.
“Kami soft launching gerai Sederhana pado 29 Mei, dan kutiko tu barisan panjang antri alah nampak sajak pukua 11 pagi, katiko palanggan mulai tibo sabalun wakatu makan siang,” kecek Asyraf.
Anggota staf nyo nampak sibuk bapindah-pindah di antaro meja, mambaok piriang ayam panggang berasok jo randang nan harumnyo bukan main, samantaro restoran panuah jo palanggan. Bahkan ado palanggan nan tibo sabalun wakatu bukak.
“Palanggan partamo kami tibo pukua 7:10 pagi,” kecek Asyraf.
Tampek di bekas kadai kopi, gerai Sederhana di Singapura ko mambuek tata letak nan labiah modern. Lantai satu adolah tampek palanggan antri untuak mamasan makanannyo dan mambayia di kasir sabalun mancari tampek duduak.
Samantaro lantai kaduo kini lah ba-AC dan dihiasi jo lampu rotan jo lantai kayu.
Namun, mambaok raksasa kuliner Indonesia ka lokasi basejarah di Singapura ko bukanlah kaputusan nan disambuik baiak dek sadonyo urang.
Warganet Singapura malah mampatanyokan baa mangko merek asing maambiak alih usaho lokal Singapura, kecek Asyraf, sarupo nan dilaporkan dek CNA. “Tapi kami indak mancubo maambiak alih warisan urang doh.”
“Kami indak mancubo mangganti urang doh,” sambuangnyo. “Kami hanyo ingin malanjuikan warisan masakan Minang otentik di rantau ko.”
Masakan Minang barasa dari Minangkabau Sumatera Barat, nan dikenal sabagai tampek kalahiran nasi padang jo babagai hidangan nan kayo, babasis karambia.
Sentimen iko mungkin taraso labiah pribadi lai dek Asyraf, karano sampai kurang dari sapuluah taun inyo baniaik mambuka restoran nasi padang. Sabalunnyo lulusan Politeknik Republik ko baraja farmasi jo bakarajo sabagai ahli bioteknologi salamo babarapo taun sabalun, akhianyo mamutuihan untuak masuak ka bisnis makanan pado umua 25 taun.
“Kami bapikia, ‘Kalau indak kini, bilo lai?'” Asyraf takana jo perjanjian nan dibueknyo jo pasangan bisnisnyo untuak masuak ka bisnis kuliner. “Kami cubo duo tahun. Kalau indak jalan, kami ka babaliak ka industri kami sabalunnyo,” katonyo.
Salain Sederhana Singapura, Asyraf juo manjalankan babarapo restoran halal lainnyo, sarupo The Halal Corner, Smashed, jo The Brunch Club, nan talatak di sakitar Kampong Glam. Namun, kini, usaho nasi padang tu taraso jauah labiah pribadi.
Almarhum nenek Asyraf lahia jo gadang di Jakarta, sahinggo makanan Indonesia marupoan bagian rutin maso keteknyo.
Asyraf juo mangaku acok makan di babagai kios makanan Padang di sakitar Kampong Glam, tamasuak Warong Nasi Pariaman, walau inyo indak pernah basobok jo nan punyo sacaro pribadi.
Dek karano itu, katiko restoran ikonik Singapura Warong Nasi Pariaman ditutuik awal tahun ko, Asyraf maraso lokasi basejarah ko pantas mandapek konsep Minang nan otentik lainnyo, bukan masakan nan samo sakali babeda.
“Dek karano itu makanan Padang dan masakan nan labiah otentik, kami mamutuihkan untuak manjadikannyo usaho keluarga panuah,” katonyo.
“Bini ambo, adiak ambo, jo adiak ipa ambo sadonyo mambantu di siko,” katonyo.
Keluarganyo punyo saham pulo dalam usaho tu.
Babeda jo rumah makannyo nan lain, Sederhana bukanlah konsep asli nan dibuek dek Asyraf. Dan itulah nan di inginkannyo.
“Den pikia, sadonyo baliak ka soal raso nan otentik,” jalehnyo.
Nan menarik, inyo mangaku inyo bukan palanggan biaso RM Sederhana sabalun mambaok merek tu ka Singapura. Inyo hanyo mahubuangkan diri jo jaringan rumah makan Indonesia tu malalui kenalan sasudah Warong Nasi Pariaman tutuik.
Inyo akhianyo bahasil mahubungi pamilik generasi katigo Sederhana di Indonesia dan bolak-baliak salamo babarapo bulan barikuiknyo sairiang jo bakambangnyo diskusi.
Asyraf mangungkapkan baso proyek iko “maabihan biaya sakitar ratusan ribu dolar Singapura,” tamasuak marekomendasikan rumah toko lamo.
Kutiko ditanyo apokah inyo pernah manghubungi pemilik Warong Nasi Pariaman untuak malanjuikan usaho atau mampalajari resep-resepnyo, Asyraf mangatokan, indak.
“Kami ingin mangarajoan sasuatu nan punyo kami surang,” jalehnyo.
“Kami juo indak tahu baa mangko mereka baranti, jadi kami ingin menghormati keputusan mereka. Mereka manutuik satu bab, kami mambukak bab nan lain.”
Inyo juo manulak gagasan baso mambaok waralaba asing daripado mambuek konsep Singapura lokal mambueknyo manjadi “pangkhianat.”
“Bisa sajo awak bukak konsep nasi padang,” katonyo.
“Tapi katiko kami manggantikan merek terkenal sarupo Warong Nasi Pariaman, harapann kami juo tinggi. Sederhana tu alah manjadi merek nan sangaik gadang di Indonesia, sahinggo kami maraso urang akan labiah manghargoi kaasliannyo.”
“Kalau indak bisa manyampaikan raso Minang sacaro tapek, akhianyo akan manjadi versi nan alah mampangaruahi salero urang Singapura,” tambahnyo.
“Pariaman manyajikan masakan otentik Indonesia, sahinggo mampakenalkan sasuatu nan labiah lokal akan mangalahkan tujuannyo.”
Kini ko, Sederhana Singapura manyajian sakitar 25 inggo 30 hidangan sahari, walaupun menu akhianyo bisa bakambang manjadi sakitar 100 pilihan.
Untuak manjago kaaslian raso-raso, banyak bumbu jo bahan-bahannyo nan diimpor langsuang dari Indonesia.
Menariknyo, babarapo mantan koki Warong Nasi Pariaman (Asyraf manulak maagiah namo namo atau jumlahnyo) kini juo bakarajo di Sederhana.
Manuruik Asyraf, koki-koki tu dikirim ka Jakarta salamo duo minggu untuak manjalani palatihan basamo tim RM Sederhana Indonesia sarato mampalajari teknik mamasak.
Masakan di siko sangaik basanda ka gaya Minang nasi padang, nan tanamo jo kuah santan nan kayo, paduan bumbu nan tarang, jo mamasak nan lambek. Kasadonyo ciri-ciri ko langsuang nampak baitu hidangan-hidangan tu disajikan. Randang dagiang, diharagoi S$6 (Rp84.000), ayam panggang jo ayam pop, masiang-masiang diharagoi S$6 (Rp84.000) per porsi, samo jo harago gulai kaki jawi S$6. Samantaro gulai cubadak tu diharagoi S$2 (Rp28.000), samo jo karupuak jangek.
Rumah Makan Sederhana Singapura talatak di 738 Jalan Jambatan Utara, S198706. Rumah makan ko bukak satiok hari dari pukua 8:00 pagi sampai 8:00 malam. Wakatu Singapura. Baa, lai Ciknan nak mancubo? (tan parpatiah/sumber cna.id)
