Dantuman hangok jariah yang lah mulai usang, mangadu kabakeh langik, tantang sakik yang taruih manyayik, baharok pasan kusuik dapek diluruihan, bintang nan batabua di langik laweh. Malam tarasao sangaik kalam jo taramaik panjang walupun hati taruih babisiak ka bakeh nurani kalau pagi pasti katibo manjalang bak cando janji matoari kapado bulan nan ka manggantiannyo katiko si rajo fajar basananduang di istana lusuahnyo, upek si gadih malang di malam yang lah laruik.
Latiah rasonyo mato bakuliliang, nan nampak hanyolah cicak yang manggarapai di ateh langik-langik, sasakali dialiahkannyo pandangannyo ka bawah, padiah rasonyo hati ambo ndak disambuiknyo pandangan ambo jo rupo nan baiak pulo, sabaiak pangharapan ambo ka bakeh inyo. Tapi yang ambo caliak hanyolah pijakan yang samakin maitam di sadonyo hamparan.
Inyo taruih bausaho manutuik mato buleknya, baharok pagi sacapeknyo tibo, baharok matoari indak lupo jo janjinyo katiko barangsua ilang maningaan ufuk timur.
Lapeh sabanta matonyo malapeh latiah, lah ditusuak pulo dek cahayo yang maha perkasa punyo sang surya. Lambek- lambek mulai diangkeknyo badannyo untuk basandiwara di hari kini ko. Ciek demi ciek langkahnyo mulai manapaki jajaknyo di hari patang. Inyo maraso sangaik auih nio raso hati si aia putiah langsuang maluncua di tanggorokannyo nan lah
kariang. Tapi ndak inyo dapek ciek pun cawan di ateh meja. Matonyo mulai manjalajahi satiok suduik ruangan sahinggo taranti di ciek suduik. Sadonyo baserak di sampiang tungku.
Bagageh diambiaknyo ciek cawan ketek ndak sempat dibasuahnyo, langsuang diisinyo aia jo inyo taguak sakali taguak, “Alhamdulillah, lapeh rasonyo auih ambo,” kato nyo sasaaik.
Sapasang kaki kuruihnyo mulai malangkah ka batang aia di baliak gunuang yang sangaik rancak jo sagalo tanago yang tasiso di pikuanyo kain-kain jo paragaik kumuah yang mambuek pondok sampik tu samakin sampik untuak capek dibasuah di aia janiah sinan.
Didorongnyo pintu nan ampia indak pernah tatutuik katiko malam tibo, sayuik-sayuik taranga pakiakan tuo yang maimbau namonyo.
“Tin … Tin…, tolonglah beko katiko kau pulang, kau carian
ubek den, ampia bapisah angok jo tubuah den ko rasonyo. Untuak baangok se lah cando manulak tubuah den ko rasonyo,” kalimaik tu lah yang mambukak pagi galok Tini.
“Anduang ka ambo carikan ubek basabalah di siko sabanta, ambo pasti pulang sacapeknyo.”
“Tuhan ambo indak punyo kekuatan salain dari patolongan engkau, apo upayo yang dapek ambo pabuek, kama ambo ka mancari ujuang dari lorong yang indak angkau agiah ujuang nyo. Agiah lah ambo satitiak cahayo untuak manarangi jalan ambo, Yaa Allah,” harapan itulah yang dikirimnyo kapado Sang Khalik Nan Maha Gadang, baharok harapannyo didanga. Inyo pun balalu maninggaan pondok parasaian tu.
“Tini ka kama kau, baa kok tasasak bana, apo yang kau baok tu?” tanyo padusi saparuah baya kapado inyo.
“Ambo ka pai ka batang aia, Ni,” jawek Tini ramah.
“Tu apo yang mambuek kau tasasak bana,”tanyo padusi tu baliak.
“Anduang sadang sakik kareh, Ni, ambo harus capek mancarikan ubek,” jawek Tini.
Lapeh hangoknyo nan sadari tadi sasak, katiko sampai di batang aia nan taduah, indaknyo acuahkan sado barang yang dipangkunyo. Sapasang kaki kuruihnyo balari manyusuri rimbo untuak mancari daun-daun sabagai panawa untuak anduangnyo. Si gadih tu balari manapaki jajak yang alun lamo inyo tinggaan. Baru sajo inyo tibo di pondok buruaknyo, langsuang diabuihnyo daun nan alah diambiaknyo dari rimbo tu, langsuang diagiahannyo kapado anduangnyo.
“Apo raso yang Anduang rasokan kini, lah sanang badan Anduang? Apo samo se samo tadi?” itulah tanyo yang taurai dari muluik Tini jo pangharoaan panuah.
“Badan den dak ka bisa marasoaan apo yang dirasoan badan kau, tapi aden ka kuaik senyo manjago supayo hangok den tetap di dalam badan den, sampai kau jayo malewati samak- samak di mungko kau kini. Kau se alasan den barangok. Kau cieknyo dindiang tampek den ka basanda.”
Tini hanyo bisa senyum sambia maandokan tangihnyo.
Lah lamo pulonyo mamanuang di sampiang tubuah anduangnyo nan kini mulai talalok. Di salo manuang, takana dek inyo tantang barang yang inyo tinggan di batang aia. Antah baa kaba nyo kini, antah lai di sinan juo antah kama rimbonyo kini.
Kambali inyo susuri jalan yang alah bantuak bosan jo langkahnyo. Dari jauah nampak dek inyo, ado anak bujang duduak di sampiang paragaiknyo sambia managuak aia jo cawan ketek Si Tini.
“Sia, Ang, anak bujang nan auih. Manga ang pakai cawan den tu sabalun ang agiah tau den. Apo auih ang tu ampia mambunuah ang sahinggo ang pakai nan indak punyo ang. Atau lah tatanam niak buruak di hati ang untuak mancilok paragaik den yang indak baharago ko? Tapi asa ang tau se yo, paragaik buruak ko sangaik baharago untuak den ko. Ndak ado iko baa den ka iduik. Iko se harato den nyo, mambana den jan diambiak.”
Ciek kalimaik itulah yang manjadi tanyo dari Si Tini kapado anak bujang yang baru basobok deknyo.
“Balabiahan bana kau ko piak, den maminjam sabanta nyo. Tadi urang dek dak ado nampak dek den, tu den pakai se lu, tapi kau manuduah den bak cando den mamaliang sado isi umah kau. Kalau iyo bana den maliang, dak mungkin lo paragaik buruak kau ko nan ka den maliang doh. Andia bana den tu. Doso dapek, paragaik nan den maliang iko bantuak e nyo,”baleh si anak bujang jo hati nan lah mulai paneh.
“Maaf yo, Da, awak dak tau nan sabananyo doh. Maafan lah kilaf ambo nan sakali ko, Da,” kato Si Tini mamintak maaf.
“Bisuak ko kok ka manuduah urang tu, bapikia dulu. Pagunoaan utak tu, jan bantuak patuih di hari paneh se,” baleh anak bujang tu kasa, sakik hati Si Tini. Indak diacuahkannyo maafnyo dek anak bujang tu doh.
Lah sapangga hari balalu, salasai jo karajo Si Tini. Capek- capeknyo pulang. Sasampainyo di pondok, nampak di matonyo sasendok nasi nan lah tahidang di ateh meja. Di caliaknyo anduangnyo dak ado di ateh kasua. Kironyo gaek tu sadang tasanda di dindiang sambia maambiak angok panjang.
“Manga anduang bakarajo juo, tanang se lah anduang di ateh tampek tidua, bia ambo yang bakarajo.”
Kato demi kato mulai kalua dari muluik si anduang tuo.
“Makanlah kau lu, sasendok nan bisa den tanakannyo,” parintah si anduang kapado Tini nan alah manahan lapa.
Matoari baangsua pai. Gadih malang tu mulai mangabek sabatang demi sabatang sayua untuak dijuanyo ka pasa bisuak hari.
“Tini marilah mandakek ka dakek den,” imbau si anduang kapadonyo.
“Iyo, Nduang, tunggu sabanta. Karajo ambo sadang tangguang, lah salasai beko ambo pai ka situ,” jawaik Tini sambia bagageh manyalasaian karajonyo.
“Apo dek Anduang?” kato Tini sasudah manjatuahkan tubuahnyo tapek di sampiang padusi tuo yang dipanggianyo anduang.
“Kau tau kan, abak kau, mandeh kau, manyuruah den manjago kau sabaiak-baiaknyo sabalunnyo pai ka Tuhannyo. Itu nannyo pasankan ka bakeh den. Kini ko den alah tuo, kok nyampang den pai, jo sia kau ka tingga. Tu kecek den, kau carilah pandampiang iduik kau dek tanang den pai,” kato padusi tuo tu kapado Si Tini nan lah mulai manangih.
“Manga anduang mangecek sarupo itu, apolah ilang raso sayang anduang ka bakeh ambo? Kini ndak paralu itu anduang pikian, labiah ancak anduang badoa. Untuang kuaik ambo bisuak maangkek sayua ko ka pasa. Untung lakunyo supayo bisa taisi pauik malang wak ko bisuak hari,” baleh Si Tini kapado anduangnyo.
Hari ko matoari kambali manapati janjinyo. Sapasang kaki kuruih Si Tini mulai bajalan malalui samak-samak. Ndak sio-sio langkahnyo, rami bana urang di pasa. Mulailahnyo basorak manjojoan sayuanyo, dek sudi urang manukaan sayuanyo tu jo pitih.
“Tini, kama se kau ndak nampak-nampak dek den doh. Lah kayo kau kini sahinggo ndak nio kau manggaleh di siko lai doh?” tanyo padusi nan alah cukuik baumua kapado Si Tini.
“Indak, Mak Nayh, ndak dek kayo ambo doh, tapi ambo sadang ditimpo kamalangan. Anduang ambo sakik kareh jadi ambo maunyiannyo di pondok ambo, tu sabaiknyo ambo ndak manggaleh,” jawek Tini ramah.
Hari alah mulai sanjo, hujan lah ka turun pulo, tasasak Si Tini balari pulang karano takuik kahujanan. Tbo-tibo tadanga sibulek manggalindiang di dakeknyo jo mambueknyo takajuik karano baranti tapek diadokannyo.
“Oi, Yuang, ndak pandai ang mambaok sapeda buruak ang tu doh, ampia lapeh jantuang den dari tampeknyo bagantuang karano waang,” kato Si Tini berang.
“Ndak pandai kau mangecek elok-elok satiok basobok samo den doh. Nan sumbang taruih se kato nan kau kaluaan satiok batamu jo den. Niaik den elok ka maantaan kau pulang, hari dek ka ujan nampak dek den,” baleh anak bujang tu kapado Tini. Kironyo paja tu urang yang mamakai cawannyo di batang aia dulu. Akhianyo, anak bujang tu sudi maantaan Tini pulang ka rumahnyo dek hari ka hujan labek.
Hari taruih baganti hari. Hari nan kapatang lah baubah manjadi maso lalu. Hari ko anduang nan biasonyo pandiam manjadi banyak mangecek. Ampia ndak bisa diam jo ndak namuah lalok. Hari kini Tini indak manggaleh karano harus mambarasiahan paragaiknyo nan kumuah di batang aia. Ditinggaannyo anduangnyo nan sadang talalok dek latiah gara- gara mangecek taruih jo ndak amuah lalok. Mulai baserak langkahnyo di tanah manuju batang aia di baliak gunuang nan tagak rancak.
Antah lah bara langkah yang diayunkannyo sahinggo pindah jo badannyo ka batang aia. Nampak deknyo anak bujang nan maantaannyo pulang di hari nan lah lalu. Anak bujang tu sadang kasulitan manangkok lauak jo buluah runciang. Ndak dihiraukannyo anak bujang tu, langsuang dimulainyo karajonyo, baharok karajonyo capek salasai. Ndak lamo sasudah itu, duduaklah anak buajng tu di sampiang Si Tini sambia maituang lauak nan inyo dapekan.
“Bara dapek e nyoh,”sapo Si Tini mambukak carito.
“Baranalah, tapi lai cukuik untuak iduik ambo hari kini jo bisuak,” anak bujang tu manjawek ndak mancaliak sia ruponyo nan batanyo ka bakeh inyo. Sudah tu, tatujulah pandangannyo ka Si Tini.
“Eh, sia nan batanyo kiro e ko. Kau, Piak, lai ndak salah kau lamah lambuik ka den tu. Ndak berang-berang kau lai doh bantuak patang ko?” kato anak bujang tu kamudian.
“Iyo, patang ko den salah sangko ka waang. Maafanlah den, jan ang sabuik-sabuik juo kajadian patang ko, malu den dek e,” kato Si Tini jo raso sasa di hatinyo.
“Ndak baa doh, jaleh den bagarahnyo, ndak den masuakan gai kato-kato kau tu ka hati den doh. Lah ilang kau dari mungko den, lah ilang lo kato-kato kau tu dari utak den,” jawek anak bujang tu.
“Yo lah, Da, karajo ambo lah salasai. Ambo pulang dulu dih,” kato Si Tini.
“Ambo lah salasai lo, samo se lah wak pulang. Kok lai sudi kau naiak sapeda buruak den ko,” ajak anak bujang tu.
Akhianyo diantaannyo Si Tini pulang. Antah lah bara kali ban sapeda tu baputa sahinggo tibolah Si Tini di pondoknyo.
“Kok lai bakanan hati Uda, masuaklah dulu ka pondok ambo ko. Makan wak dulu sambia ambo patamuan Uda jo anduang ambo. Pasti Uda lah lapa lo kan,” ajak Tini kapado anak bujang itu.
“Jadihlah, beko kalau ambo ndak nio, kau hariak lo ambo takah nan kapatang,” garah anak bujang tu.
Masuaklah paja baduo ko ka dalam pondok nan alah tagak dari tadi di muko nyo.
”Anduang, jagolah, makan wak dululah. Ado urang yang ka ambo patamuan jo Anduang, pek lah nduang,” kato Tini manjagoaan Anduangnyo nan sadang lalok, tapi padusi tuo tu bantuak ndak amuah jago. Dipaciknyo dek Si Tini tangan padusi tuo tu, kiroe ndak baiak dinginnyo tangan gaek tu doh. Saolah gaek ko lah baku badannyo, pun lah tagang. Dijagoaan juo inyo, tetap ndak namuah jago. Baurailah aia mato Si Tini. Dipanggianyo anak bujang nan sadari tadi manunggunyo di lua.
“Uda, tolonglah, Da, baa anduang ambo ko ndak nio jago sadari tadi. Lah ambo jagoaan, tetap se inyo lalok,” kato Si Tini. Masuaklah anak bujang tu ka dalam, dipaciknyo tangan anduang tu.
“Tini, anduang kau lah pai mah ka tampek Tuhannyo. Nadinyo ndak badanyuik bantuak urang iduik. Jan kau manangih, tapi doaannyo tanangnyo di sinan.”
Balari anak buajang tu maimbau masarakaik sahinggo bakumpualah urang di pondok Si Tini untuak manjanguak jo manolongan maantaan padusi tuo tu ka rumah abadinyo.
Ndak baranti aia mato maluncua di pipih Si Tini. Manga patang anduangnyo mangecek taruih, ndak amuah lalok, kironyo buruak nan tasuo hari kini.
“Jikalau ambo tau kajadian sarupo iko, ndak ka ambo biaan anduang mamiciangan mato doh. Ndak ka ambo padiaannyo baranti mangecek jo ndak ka ambo tinggaannyo surang doh. Abih ambo dikicuahnyo, ditinggaannyo ambo surang diri.”
Si Tini babaliak ka pondok jo anak bujang nan mangawanannyo sadari tadi.
”Maaf yo, Uda, manggaduah bana ambo sahari kini. Mokasi alah mangawanan ambo, maantaan anduang ambo ka pusaronyo, tapi jo sia uda bisa ambo panggia, sabuikanlah ka ambo, bia ambo panggia Uda jo namo Uda,” tanyo Tini di tangah pajalanan ka pondoknyo.
“Abak jo mandeh ambo maagiah Lunan ka jadi namo ambo panggia se ambo Lunan, tu kau sia namo kau, ambo alun tau lo lai?” jawek Lunan batanyo baliak.
“Namo ambo Tini. Maaf yo, Lunan, tarimo kasi se yang dapek ambo katokannyo. Maaf alah manggaduah iduik Uda nan saharusnyo damai,” kato Si Tini mambaleh si Lunan. Langkah ka langkahlah maantaan paja baduo ko ka pondok Si Tini.
“Kini kau lah ambo antaan pulang. Ambo pulang lo dulu dih, adiak ambo alah manungguan lo di rumah sadari tadi. Jan kau basadiah bana. Anduang kau ndak lo baharok aia mato dari kau doh, nan diharokkannyo tu doa. Lah ambo pulang lu,” kato Lunan sambia balalu maninggaan Tini.
Masuaklah Si Tini ka rumahnyo. Dicaliaknyo sakaliliang, lah langang pondok buruaknyo tu, ndak ado suaro batuak anduangnyo doh lai.
“Ndeh, Tuhan, ndak saharusnyo den tinggan inyo surang doh. Kini tingga kasua buruak nan lah usang ko se di pondok den ko nyo lai,” kato Tini sambia duduak di sampiang kasua anduangnyo.
Lah balalu lo hari patang, kini Si Tini hiduik sabatang kara. Diambiaknyo sayua nan ka inyo jua di dakek lamari. Ndak sangajo nampak di matonyo, barang nan bawarna putiah. Diambiknyo barang tu, dikaluaannyo isi barang putiah tu. Kironyo sapucuak surek dari anduangnyo. Balinang aia matonyo katiko mambaco surek tu.
“Tini, dulu lah den kecekan den ka pai, tapi kau harus mancari pangganti den. Wakatu sanjo kau pulang dari pasa, den mancaliak kau pulang jo anak bujang sahinggo den bapikia patuikkah paja tu manggantian den. Jadi, den bisa pai jo hati tanang, Tini. Kalau den pai, barati den pai jo cinto nan lah den tanam samanjak kau lahia sahinggo jan kau basadiah untuang sanang hiduik kau jo paja tu.”
Ancua hati Si Tini mambaco isi surek tu. Samakin gadang sasa nan inyo rasokan, tapi capeknyo tagak untuak bangkik sasuai pasan anduangnyo.
Hari kini ko cukuik kalam. Si Tini kalua dari pondoknyo. Nampak dek inyo Si Lunan lah manunggu bamukasuaik maantaannyo ka pasa sahinggo pai lah paja baduo ko ka pasa. Dek acok batamu jo basuo, tumbuahlah raso cinto di hati Si Tini kapado Si Lunan. Katiko malam tibo, takana dek Si Tini surek nan ditinggaan anduangnyo sahinggo baharok bisuak hari bisa batamu jo Si Lunan untuak mangatokan parasaannyo.
Malam pun baganti jo pagi. Kironyo panjang umua Si Lunan alun dicari Si Tini, lah tibo inyo di rumah Si Tini. Tini langsuang naiak ka ateh sapeda Si lunan untuk dianta ka pasa.
“Manga kau langsuang naiak, turunlah lu, ado mukasuik nan ka ambo sampaian ka kau a,” kato Si Lunan sahinggo turunlah Si Tini.
”Apo nan ka basampaian?” jawek Si Tini.
”Kau tarimo lah siriah dari ambo ko. Iko sabagai tando ambo maundang kau tibo ka acara baralek ambo duo hari ka tibo,” baleh Si Lunan. Ancua hati Si Tini mandangaan, namun tetap inyo pai ka pasa basamo Si Lunan di hari tu.
“Tini, nio kau manikah jo cucu den?, tapi haruih duo hari ka tibo, soalnyo cucu den ka babaliak ka kota, karajonyo banyak,” ajak Mak Nayah kapado Tini nan sadang patah hati.
”Jadih, Mak, ambo nio manikah jo cucu amak,” jawaik Si Tini indak bapikia.
Tibolah hari Si Tini manikah jo cucu Mak Nayah nan samo sakali indak dikenalnyo. Sudah baralek gadang, jadilah Si Tini bini Si Menan, cucu Mak Nayah.
”Tini, den bisuak ka babaliak ka kota. Den tinggaan kau. Jawi tolong kau jago sampai den pulang dih,” kato Si Menan di malam sasudah baralek.
”Jadih, Da,” jawek Si Tini.
Barangkeklah Si Menan ka kota sahinggo tinggalah Si Tini surang diri di kampuang.
Lah lapan taun Si Menan pai, tapi ndak pulang-pulang. Si Tini taruih manjago jawi nan ditinggaan Si Menan. Pado suatu katiko, Si Tini sadang magubalo jawi, tagalicia kaki jawi tu sahinggo masuaklah jawi tu ka dalam jurang. Si Tini pun mangaja jawi tu sampai inyo maambua ka dalam jurang, namun jawi tu ndak tasalamaikkan, tapi angoknyo nan ka mati. Indak sangajo tapacik dek inyo aka batang-batang gadang nan manjulua ka jurang tu sahinggo barayun inyo di jurang tu. Tapi dek lah lamo urang ndak ado manolongan, ndak kuaik tangan Si Tini lai sahinggo jatuahlah inyo ka dalam jurang tu. Pado akhianyo, masarakaik nan manampak Si Tini jatuah manamoi jurang tu Jurang Si Andia Baburai (Si Bodoh Berayun).
