Sajak gampo Aceh nan basaratoan jo tsunami pado taun 2004, kato tsunami samakin musahua, tarutamo bagi masyarakaik di sapanjang tapi lauik di saluruah Indonesia. Sajak tu, bamacam kajian alah dilakukan untuak maantisipasi bencana alam nan dapek manyababkan banyak korban jiwa.
Tapi rancak awak maingek tsunami baliak karano arati tsunami ko kadang mambuek binguang. Urang-urang nan tingga di daerah nan jauah dari tapi lauik kadang-kadang bapandapek baso tsunami juo tajadi di daerah pagunuangan. Dulu tahun 80an ado gampo mangguncak Singkarak sekitarnyo, eboh urang ka tibo tsunami. Ambo pai wawancara ka kantua Stasiun Geofisika Padang Panjang. Tagalak se apak Kapalo Stasiun tu mandanga ado ancaman tsunami di Singkarak. “Tsunami tu adonyop di lauik pak, ndak ado di danau doh,” katonyo.
Manuruik akademisi HA. Halim Asmar (Republika 12/29/2004) Tsunami dapek disababkan dek pergeseran vertikal lempeng bumi (subduksi) di bawah dasar lauik nan dalam jo longsoran raksasa dari batu-batu tabiang di dasar lauik nan dipicu dek gampo jo gunuang barapi nan malatuih di lauik. Kabanyakan tsunami nan tajadi di dunia disababkan dek subduksi lempeng bumi di bawah dasar lauik dalam nan takaik jo gampo bumi tektonik.
Tsunami dimulai jo parubahan tibo-tibo, di dasar lauik sudah tu diikuiki jo parubahan mendadak pado latak massa aia lauik, nan dapek manyababkan galombang aia lauik nan sangaik panjang sampai 800 kilometer jo periode galombang nan panjang, dalam wakatu 60 minik.
Galombang tsunami manyeba jo kacapatan sangaik tinggi inggo 800 km/jam sacaro frontal jo tagak luruih pado bidang patahan lempeng. Galombang tsunami nan mancapai pasisia dapek barubah manjadi galombang nan sangaik tinggi hinggo 30 puluahan meter di ateh tingkek pasang normal tatinggi.
Gampo bumi tektonik indak dapek dideteksi sabalunnyo sarupo gampo bumi vulkanik jo pakakeh deteksi nan dilatakkan pado satiok gunuang, karano garih tampek lempeng bumi batamu sangaik panjang jo dalam. Indak mungkin untuak malatakkan pakekeh deteksi di sapanjang garih tampek lempeng benua batamu, sahinggo kamungkinan gampo tektonik hanyo dapek dideteksi dari gampo nan alah tajadi sabalunnyo dalam periode tatantu. Itu pun indak bisa dijadikan patokan.
Di Sumatera Barat (Padang, Pessel, Pariaman, Pasaman Barat, Padang Pariaman dan Agam Barat) masalah tsunami ko salalu sarupo ombak naiak turun. Katiko tajadi gampo nan bakapanjangan, masalahnyo batambah. Tapi katiko gampo tu reda, isu tu lambek-lambek hanok lo liak.
Gampo 30 September 2009, nan mampunyoi magnitudo sampai 7.9, mambaok kasadaran kapado saluruah pamarintah daerah di daerah pasisia tantang baa caronyo supayo jan bamain-main juo jo rencana untuak maantisipasi dampak gampo ko.
Rencana antisipasi dampak gampo di Padang, tarutamo sabagai ibukota provinsi Sumatera Barat, masih hanyo manjadi pakaro diskusi. Ambo sabuik wacana karano alun manjadi blueprint nan bisa dijadikan dipacik, kok batampuak buliah dijinjiang kok batali buliah diirik untuak sagalo kegiatan pembangunan di Kota Padang.
Duo tahun nan sasudah gampo 2009 nan mahancuakan, Walikota Padang kutiko tu Fauzi Bahar ado diskusi jo wartawan di gedung PWI Sumbar. Tapi ambo raso indak diskusi doh, hanyo samacam parintah aluih untuak wartawan supayo indak manulih hal-hal nan manakuikkan tantang gampo. Walaupun banyak wartawan pado rapek tu manyarankan supayo Pemerintah Kota Padang sugiro manyusun skenario gadang untuak ma antisipasi dampak musibah (terlepas dari gampo skala nan labiah gadang masih mengancam daerah ko atau indak) .
Dalam RPJP jo RPJM untuak Padang jo Sumatera Barat, alun dinyatokan labiah spesifik apo rencana ka muko untuak manangani dampak bencana. Pado tingkek suprastruktur nan baru dibuek adolah lembaga-lembaga sarupo Badan Penanggulangan Bencana, Provinsi jo Kabupaten/Kota.
Ado caro bapikia nan harus kito cubo manjalehkan nan buruak jo nan elok untuak kabaikan basamo. Yaitu, kutiko masalah gampo jo tsunami tu diungkapkan di media, ado urang nan mambantah. Iko dianggap manakuikkan. Katiko ado tekanan untuak mambuek jalur evakuasi, itu dianggap berita nan ka manakuik-nakuik-an warga.
Paralu awak koreksi caro bapikia ko. Nan paralu bana adolah baa Pemerintah di daerah pantai manjalankan proses pandidikan untuak warganyo. Nan lah dilakukan di Padang adolah latihan kewaspadaan kutiko tadanga sirene peringatan tsunami.
Informasi gampo jo tsunami indak dimukasuikkan untuak manakuik-nakuik-an urang, tapi untuak maaja urang baa caronyo hiduik jo waspada nan wajar. Baa caronyo masyarakat bisa iduik basamo jo bencana (nan tantu indak mungkin dilawan) Iko adolah hal nan alun dilaksanakan di Padang.
Jalur evakuasi ka daerah nan labiah tinggi kini jauah dari cukuik. Sangenek bana baru nan ado. Jalan-jalan nan ado masih alun cukuik laweh. Rute-rute nan ado adolah di pusat kota malalui Jambatan Andaleh, malalui Alai-Ampang, malalui Siteba. Untuak daerah Air Tawar melalui Tunggua Hitam, evakuasi untuak daerah Tabing sekitarnyo melalui Simpang Tabing-Ikur Koto, Koto Tangah Lubuk Buaya, melalui Simpang Lalang, melalui Simpang Kalumpang dan melalui SMA 7. Untuak daerah Mata Air, Muara, Pondok, Teluk Bayur dan sekitarnyo masih ado daerah Gunuang Padang tampek bakeh lari manyalamaikan diri.
Tapi sasudah mancaliak kenyataan 30 September 2009 dulu tu, sabana sadiah wak. Gampo tibo, urang balari sadonyo ka arah jalan Padang bypass, cilakonyo sado nan pakai oto jo onda lah nyo osong kendaraannyo. Sahinggonyo labuah jadi sampik ndan macet total di tangah jalan. Nan tabayang, kalau katiko sadang macet tu tsunami tibo, sabana ka habih sadonyo disapu tsunami. Niaik ati nan manyalamaikan diri ka tampek nan tinggi malah jadi ndak kasampaian.
Mako kalau Pemerintah Kota Padang atau Kabupaten/Kota lain nan ado di daerah tapi lauik ingin malindungi warganyo jo caro mangandalkan jalur evakuasi, mako indak ado alasan untuak atau indak mampacapek sarato mampabanyak jalur evakuasi ko. Dari hanyo leba 10 meter sampai jalan sampai leba 20 meter. Lapeh dari itu, rute-rute nan alah ado harus ditambah, tarutamo antaro Jalan tunggua Hitam jo Simpang Tabing. Di daerah ko, paralu ditambahkan ciek lai rute maanggap panduduak nan padek nan tingga di daerah Tabing sampai Air Tawar. Kalau paralu, jalan tu malalui Bandara Tabing (dan hanyo bukak kalau tajadi gampo) .
Salain dari itu, sarupo di Japang, tsunami diantisipasi jo mambangun tampek palinduangan atau bangunan kosong di daerah pasisia. Tampek palinduangan tu dibangun satiok 200 meter, dan dapek manampuang 100 sampai 200 urang. Bangunan jo pondasi beton jo baja nan kuek sarato banyak tiang. Bangunan dibuek tinggi 20 meter, lantai bawah dibiakan indak ado dindiang, sadangkan lantai ateh hanyo halaman kosong.
Tampaik panampuangan tu akan baguno sabagai tampek evakuasi bagi warga nan indak bisa balari labiah kancang ka Jalan Padang by pass. Warga nan maevakuasi diri ka tampek palinduangan dapek batahan iduik sampai aia lauik suruik baliak sasudah satangah jam.
Persiapan lain nan mesti dilakukan dek pamarintah daerah jo masyarakaik adolah manyadiokan baju pelampung di satiok rumah sabanyak nan ado di ateh rumah. Baju tu bisa dibiayai sapanuahnyo dek Pemda Padang atau disubsidi. Dengan adonyo pelampung, jumlah korban nan indak bisa baranang nan diseret ka dalam aia bisa dikurangi. Paliang indak inyo masih mangambang sampai tim penyelamat manamukannyo. Rasonyo hal iko indak ka barek bana dek Pemda Kota Padang.
Antisipasi salanjuiknyo adolah mulai mamindahan kagiatan ekonomi jo sosial ka daerah nan labiah tinggi. Akibatnyo, sacaro baansua-ansua di APBD Padang harus ado alokasi dana pemukiman taruih manaruih sampai seluruh warga di daerah pesisir bisa dipindahkan ka daerah nan labiah aman. Di maso datang, daerah nan ditinggaan dek panduduak mungkin manjadi milik pamarentah sajo untuak digunoan jadi tujuan pariwisata di kota tuo.
Nyampang tsunami tibo, baa pangana Pak Wali? Kan paralu jak kini diantisipasi.
Baa dek dunsanak tu, lai suai?
