Lubuk Alung — Sampai kini, gagasan untuak manuka namo Bandara Internasional Minangkabau manjadi Bandara Internasional Syekh Burhanuddin masih sabateh usua dari masyarakat kapado Bupati Padang Pariaman, John Kenedy Aziz.
Sekretaris Daerah Kabupaten Padang Pariaman, Hendra Aswara, mamastikan bahwa usua itu baru disampaian dek masyarakat kapado Bupati Padang Pariaman.
“Masih sabateh aspirasi dan paralu malalui kajian, sarato tantu sajo mesti manuruik mekanisme nan balaku,” kato Hendra kapado awak media, hari Jumaik patang ko, di ibu kota Kabupaten Padang Pariaman.
Manuruik Sekda, aspirasi tu masih paralu dikaji labiah lanjuik jo mandalam, sabalun diajukan kapado pihak nan mampunyoi kewenangan untuak manetapkan.
Takah nan alah diketahui, Syekh Burhanuddin marupokan salah surang ulama nan mampunyoi paranan pantiang dalam perkembangan Islam di Minangkabau. Para pangusua diyakini baharok, pamakaian namo Syekh Burhanuddin sabagai namo bandara dapek manjadi simbol untuak manguekkan nilai-nilai kaagamaan di tangah masyarakat.
Manjawab patanyaan awak media, apokah manuka namo bandara itu manjadi kewenangan Pemerintah Kabupaten Padang Pariaman, Hendra manarangkan bahwa parihal tu bukanlah kewenangan Pemkab Padang Pariaman.
Bahkan, kato nyo, usua tu, kalau alah melalui kajian nantinyo, paralu dibicarokan labiah dahulu jo Pemerintah Provinsi Sumatera Barat, sabalun ditaruihkan manuruik mekanisme nan balaku.
“Namun, karano iko bukan ranah kabupaten, tapi ranah provinsi, prinsipnyo kalau iko manjadi perhatian bagi pemerintah provinsi, dipersilakan. Kalau memang paralu kajian dan sabagainyo, tantu nanti dapek difasilitasi dek pemerintah provinsi,” jelasnyo.
Dikutip dari laman Langgam.id, sampai kini alun ado komunikasi, baiak sacaro lisan maupun surek-manyurek, antaro Pemerintah Kabupaten Padang Pariaman jo Pemerintah Provinsi Sumatera Barat mengenai usua tu.
Hendra manambahkan, dinamika pro jo kontra taradok wacana manuka namo bandara tu marupokan sasuatu nan mungkin sajo tajadi. Karano itu, kaputusan indak dapek diambiak sacaro sapihak.
“Untuak itu paralu dikaji. Kalau kito alah sapakaik untuak maadokan kajian, dan dari hasia kajian tu ado kaputusan untuak malakukan parubahan, tantu kito basamo-samo manyapakatinyo nanti,” keceknyo.
Namun, kalau nantinyo Bandara Internasional Minangkabau tatap manjadi namo resmi, Hendra mamastikan Pemerintah Kabupaten Padang Pariaman akan manuruik kaputusan pemerintah nan mampunyoi kewenangan.
Namo Minangkabau Nan Manjadi Sejarah
Bandara Internasional Minangkabau marupokan satu-satunyo bandar udara di Indonesia, bahkan salah satu nan unik di dunia, nan mamakai namo etnis sabagai namo bandara. Bandara Minangkabau barado di wilayah Kabupaten Padang Pariaman.
Waktu tahun 2005, kutiko namo bandara diperdebatkan, muncul barbagai usua tantang namo pahlawan atau tokoh nan akan dipakai. Paradebatan waktu itu cukup angek.
Pado akhianyo, pilihan jatuah ka namo nan dianggap paliang netral, tapi sekaligus mampunyoi makna sejarah, yaitu Bandar Udara Internasional Minangkabau.
Namo tu tu ditatapkan sabagai bantuak panghormatan kapado Minangkabau, baiak sebagai etnis, wilayah kebudayaan maupun adat.
Disabuik manjadi bagian dari sejarah karano untuak partamo kalinyo namo suatu etnis dipakai manjadi namo bandar udara.
Namun, pado tahun 2005 itu, nan diperdebatkan indak hanya soal namo, tapi juo soal singkatan nan akan dipakai.
Bandara Internasional Minangkabau, kalau disingkek dalam bahasa Inggris, manjadi MIA, atau Minangkabau International Airport. Masalahnyo, singkatan MIA alah tadaptar di IATA sabagai callname resmi Bandara Miami di Amerika Serikat.
Satiok bandara memang mesti mampunyoi callname internasional nan dikelola dek IATA, sarato callsign penerbangan sipil nan dikelola dek ICAO.
Karano itu, singkatan BIM akhirnya dipakai untuak sebutan umum. Samantaro callname resminyo tatap mamakai callname nan alah dipakai sabalunnyo di Bandara Tabing, yaitu PDG. Adopun callsign ICAO-nyo adalah WIEE. Manuka kode nan alah tadaptar di IATA jo ICAO ko indaklah pakaro nan mudah.
Nan akhirnya dapek disapakati waktu itu adalah, satiok kapten pilot jo cabin crew indak lai manyabuikkan kalimat, “Sebentar lagi kita akan mendarat di Bandara Internasional Minangkabau di Padang.”
Tapi harus manyabuikkan:
“Sebentar lagi kita akan mendarat di Bandara Internasional Minangkabau di Padang Pariaman.”
Usua ko disampaian dek Bupati Padang Pariaman waktu itu, Ali Mukhni, dan disatujui dek saluruah maskapai nan malayani penerbangan ka Bandara Internasional Minangkabau. (Tan Parpatiah/dari macam-macam sumber)
