Padang Panjang — Gunuang Marapi, lah malatuih lo liak hari Sabtu (30/5) pagi. Latusan ko juo mamancarkan abu vulkanik satinggi 2.000 meter.
Pos Pangamat Gunuang Barapi Marapi (PGA) nan barado di Bukittinggi malaporan baso Gunuang Marapi malatuih pado pukua 08.42 WIB jo tacataik balangsuang 85 datiak.
“Letusan pado wakatu laporan ko dibuek masih balanjuik,” kecek patugas PGA Marapi, Ahmad Rifandi katiko dikonfirmasi.
Inyo manjalehan, abu nan dibuang ka ateh dek gunuang tu manuju ka arah timur laut dan warnanyo abu-abu taba.
Gunuang Marapi kini dalam status waspada tingkek II. Masyarakaik di sakitar gunuang dimintak untuak indak masuak jo malakukan kagiatan dalam radius 3 kilometer dari pusek latusan.
“Kalau abu jatuah, masyarakaik disarankan untuak mamakai masker nan manutuik hiduang jo muluiknyo untuak mahindari masalah saluran pernapasan, sarato paralatan lain untuak malinduangi mato jo kuliknyo. Salain itu, inyo disarankan untuak maamankan fasilitas aia barasiah jo mambarasiahan atok rumahnyo nan kanai abu,” keceknyo.
Warga Kota Padang Panjang nan baru mamulai aktifitasnyo pagi tu, langsuang sibuk manangkap letusan tu jo HP. Kabatulan, katiko letusan mulai, cuaca sangaik elok dan langik janiah. (Tan Parpatiah)
