Padang — Gedung Joeang 45 Sumatera Barat di Jalan Samudera, Kota Padang, didorong untuak dinaikkan statusnyo dari cagar budaya tingkat kota manjadi Cagar Budaya Nasional.
Peningkatan status ko dinilai paralu bana untuak manjago bangunan barsejarah, sakaligus marawat ingatan basamo masyarakat tantang perjalanan panjang perjuangan bangsa manuju kamardekaan.
Bangunan-bangunan cagar budaya, khususnyo nan ado kaitannyo langsuang jo sejarah perjuangan bangsa, janlah dipandang sabagai bangunan tuo semato. Di baliak dindiang jo ruangan bangunan tu, tasimpan jajak sejarah, nilai perjuangan, jo bukti perjalanan bangsa nan indak buliah putuih dek parobahan zaman.
Harapan tu disampaikan Ketua Dewan Paripurna DHD BPK-45 Sumbar, Mayjen TNI Purn. Amril Amir, dalam kegiatan “Bakti Kemerdekaan Angkatan 45” nan diadokan dek Dewan Harian Daerah (DHD) Badan Pemberdayaan Kejuangan 45 (BPK-45) Sumbar di Gedung Joeang 45, Jalan Samudera, Padang, hari Akaik patang (9/8/2026).
Amril manyabuik, Gedung Joeang 45 punyo nilai sejarah nan penting bagi Sumatera Barat. Pado maso kolonial Belanda, bangunan ko pernah dipakai sabagai Kantor Konsulat Jerman di Padang.
Kini, Gedung Joeang 45 barstatus sabagai cagar budaya Kota Padang dan sadang manjalani proses penilaian untuak peningkatan status di tingkat provinsi.
“Sabagai mantan Kepala Pusat Sejarah TNI, ambo barharap pemerintah taruih marawat jo marestorasi Gedung Joeang 45 nan alah manjadi cagar budaya ko. Jadi, kami barharap statusnyo dapek dinaikkan manjadi Cagar Budaya Nasional,” kecek Amril.
Manuruik Amril, pelestarian bangunan barsejarah indaklah sabateh mampertahankan bantuak fisik bangunan. Labiah jauah dari itu, pelestarian merupokan bagian dari usaho manyalamaikan ingatan sejarah jo identitas bangsa, supayo dapek dipalajari dan diwariskan ka generasi nan akan datang.
Karano itu, kato Amril, bangunan-bangunan nan punyo kaitan jo sejarah perjuangan harus mandapek perhatian nan serius dari pemerintah jo masyarakat. Parawatan, restorasi, jo pemanfaatan bangunan cagar budaya paralu dilakukan sacaro barancana, supayo nilai sejarahnyo tatap taragak, tapi fungsi edukasinyo juo tatap hiduik.
“Kalau bangunan barsejarah hilang atau rusak, nan hilang bukan bangunannyo sajo. Kito juo kehilangan sabagian dari sejarah jo ingatan basamo bangsa,” katonyo.
Amril manilai, generasi mudo paralu diparkwnalkan secara langsuang jo tampek-tampek barsejarah. Dengan mancaliak, manuruik, jo mamahami sejarah nan melakek pado sabuah bangunan, generasi mudo akan labiah mudah mamahami bahwaso kamardekaan Indonesia indaklah didapek dengan mudah, tapi malalui perjuangan panjang jo pengorbanan para pendahulu.
Peringatan HUT ka-81 Kamardekaan Republik Indonesia malalui kegiatan “Bakti Kemerdekaan Angkatan 45” manjadi salah satu usaha untuak maiduikkan baliak nilai-nilai perjuangan tu.
Barbagai kegiatan diadokan, mulai dari pambarian penghargaan jo bantuan untuak pejuang, veteran, jo purnawirawan, lomba pidato perjuangan antarkabupaten/kota malalui DHC, lomba mambaco puisi perjuangan tingkat SLTA se-Sumbar, sampai lomba storytelling tantang sejarah perjuangan lokal tingkat SLTA.
Indak hanyo kegiatan edukatif jo apresiasi sejarah, panitia juo maasokan bakti sosial barupo pemeriksaan mato jo pambagian kacamato gratis, pemeriksaan jantuang, pemeriksaan darah, sampai donor darah.
Ketua Panitia Pelaksana, Fajar Rusvan, manyabuik kegiatan tu mandapek sambutan nan sangat positif dari masyarakat. Ratusan warga datang untuak maikut layanan kesehatan jo kegiatan sosial nan dilaksanakan semenjak pagi sampai siang hari.
“Respons masyarakat di lua dugaan sangat positif. Ratusan peserta maikuti kegiatan ko. Bahkan ado masyarakat nan indak dapek dilayani lai karano alah malampaui jadwal kegiatan,” kato Fajar sasudah kegiatan, didampingi Sekretaris Panitia Gusfen Khairul.
Salah seorang penerima bantuan nan manjadi perhatian adalah Nawi, surang veteran nan alah barumur 103 tahun. Di usia nan sudah lanjuik tu, Nawi tatap datang ka Gedung Joeang 45, diantakan jo dibimbiang bajalan dek cucunyo.
Kehadiran Nawi manjadi momen nan haru. Inyo indak kuaso manahan haru karano masih ado pihak nan maingek jasoq para veteran dan memberikan perhatian di momen peringatan kamardekaan.
“Total ado 33 veteran nan manarimo bantuan. Salain tu, dari kegiatan donor darah takumpua 12 kantong darah,” ujar Fajar.
Antusiasme masyarakat juo taliek pado barbagai lomba nan diikuti pelajar SLTA. Peserta indak hanya datang dari Kota Padang, tapi juo dari barbagai daerah, di antaronyo Kabupaten Sijunjung, Pesisir Selatan, jo Lima Puluh Kota.
Ketua Harian DHD BPK-45 Sumbar, dr. Ardizal Rahman, manyampaikan tarimo kasih jo apresiasi kapado barbagai pihak nan alah mambantu dan manyokong kegiatan tu.
“Alhamdulillah, Ketua Umum DHD BPK-45 Sumbar, Bapak Gubernur Mahyeldi Ansharullah, sangat manyokong kegiatan ko. Pemprov Sumbar, Pemko Padang, saluruh OPD, BUMN, Bank Nagari, serta barbagai perusahaan swasta di Sumbar juo memberikan dukungan,” katanya.
Ardizal juo manyampaikan tarimo kasih kapado Pemprov Sumbar, Pemko Padang, Baznas Sumbar, Rumah Sakit Mata Sumbar, Departemen Jantung dan Kardiologi Vaskuler Fakultas Kedokteran Universitas Andalas, Departemen Patologi Klinis dan Departemen Ilmu Penyakit Mata Fakultas Kedokteran Unand, serta Perhimpunan Dokter Spesialis Mata Indonesia (Perdami) Sumbar.
Dukungan juo datang dari Rumah Sakit Mahkota Malaysia, PT Semen Padang, Bakmi DKI, PT Kunango Jantan, PT Cendo, PT Askrida, PT Hayati Pratama Mandiri, dan Frasa Indonesia.
Ia juo manyampaikan apresiasi atas kadatangan Ketua jo Pengurus PWI Sumbar, Kepala Dinas Kesehatan Sumbar, anggota Dewan Paripurna DHD 45 Sumbar Syafrizal Ucok, jo para undangan lainnyo.
Samantaro tu, Gubernur Sumbar Mahyeldi Ansharullah nan diwakili Sekretaris Daerah Provinsi Sumbar, Arry Yuswandi, manegaskan bahwaso semangat jo nilai-nilai perjuangan harus taruih dilestarikan.
“Semangat jo nilai-nilai perjuangan harus taruih kito lestarikan. Jan sampai generasi nan akan datang indak tahu jo sejarah perjuangan bangsa. Kito harus maargai jasa-jasa para pahlawan nan alah barjuang untuak kamardekaan,” kato Arry.
Manuruiknyo, kegiatan nan mampartemukan generasi mudo jo para veteran punyo arti nan penting dalam mambangun kasadaran sejarah. Kamardekaan, kato inyo, jan hanya diparingati sabagai seremoni tahunan, tapi harus dijadikan momen untuak mananamkan nilai perjuangan kapado generasi penerus.
Dalam konteks tu, keberadaan Gedung Joeang 45 punyo arti nan strategis. Gedung ko dapek manjadi ruang pambalajaran sejarah nan mampartemukan generasi kini jo jejak perjuangan para pendahulu.
Pelestarian cagar budaya, khususnyo bangunan nan barhubungan jo sejarah perjuangan bangsa, pada hakikatnyo indak hanya manjadi tangguang jawab pemerintah. Masyarakat juo punyo peran nan penting untuak manjago, marawat, jo mamanfaatkan bangunan tu secara positif. (Tan Parpatiah)
