Oleh: OCE SATRIA
KATIDIANG bukan samato karanjang anyaman batuang. Bukan hanyo paragaik pambaok bareh. Katidiang lahia dalam caro hiduik tradisional Minang dalam kulindan ekonomi masyarakaik agraris jo hubungan sosial jo simbol budaya penghormatan antar kelompok. Baa dek baitu?
Mandanga istilah katidiang, tantu ingatan kito tatuju ka tradisi lamo nan biaso basobok di Ranah Minang. Katidiang caro awak, bakul caro urang subarang, dibuek dari anyaman batuang. Ukuran bisa sagadang embe cat ukuran 20 kg, bisa juo sagadang dorom plastik tampek mambuang sarok. Ketek ka bawah gadang ka ateh, atau ukuran ateh jo bawah samo gadang. Mambaoknyo dijunjuang di ateh kapalo. Kalau dikapik namonyo kampie.
Kini tantu lah jarang tasobok urang manjunjuang katidiang. Karano bamacam paragaik kini lah dibuek serba pabirik, babahan plastik. Banyak dijua di pasa atau di kadai. Kamajuan teknologi mambuek katidiang kalah saiang. Salain sarik mambuek katidiang ko,, nan produk baru kini bisa labiah murah karano dibuek capek dan banyak.
Babaliak ka ranah.
Dalam tradisi Minangkabau posisi katidiang indak bisa dipandang remeh. Barang anyaman ko tamasuak nan paralu ado dalam prosesi adat. Contohnyo dalam acara Arak Bako kutiko baralek perkawinan. Katidiang dipakai mambaok bingkisan, hadiah, atau hantaran. Bantuak katidiang untuk urusan baradaik ko, biasonyo ketek di bawah, gadang ka ateh. Dibuek sagi ampek atau sagi anam. Tiok sagi diagaih tulang atau tonggak.
Dalam kehidupan sosial urang Minang, katidiang menjadi simbol posisi sosial, baitu juo sebagai penghormatan antaro pihak bako (keluarga ayah) jo anak daro.
Mako dalam proses adaik baralek perkawinan jamak kito mancaliak arak-arak katidiang nan dijunjuang di kapalo induak induak. Dari rumah bako anak daro diarak ka rumah tampek alek dilangsuangkan. Induak induak manjunjuang katidiang mairiang di balakang.
Baa mangko dari rumah bako bana? Baa mangko pakai katidiang bana? Prosesi ko manunjuakkan raso kasiah sayang bako baitu pulo sebagai penghormatan jo restu dari pihak bako.
Mari kito sigi isi katidiang dalam acara Arak Bako. Biasonyo katidiang baisi barang bawaan dari bako sabagai hadiah untuak anak daro. Kalau isi katidiang lah dikaluakan dek pihak keluarga anak daro, langsuang pulo diisi baliak tando tarimokasi atau baleh budi. Katidiang diisi baliak jo baragam makanan, sarupo nasi lamak, gulai cubadak, samba randang, katan, atau kue khas tradisi di nagari basangkutan. Jadi, bakatadiang jo maisi katidiang adolah caro urang awak mampaarek silaturahmi, baiak bako, induak bako maupun hubuangan kekeluargaan.
Itu posisi katidiang dalam alek adaik baradaik. Dalam kehidupan sahari-hari masarakaik Minang tempo dulu, katidiang pun punyo fungsi nan indak kalah pantiangnyo. Tarutamo dalam dunia pertanian. Basawah baladang. Katidiang dalam fungsi ekonomi ko, biaso dipakai ukuran ateh jo bawah samo gadang.
Katidiang dipakai untuak maituang bara padi kalua katiko manyabik. Sasudah padi disabik, salasai pulo dihiriak, dibuang jarami tinggalah padi, dimasuakkan ka dalam karuang dibaok pulang. Sasudah tu, di siko katidiang mulai batugeh. Katidiang jadi tampek (wadah) maukua banyaknyo padi nan dapek. Bara nan hak awak, bara nan wajib dikaluakan untuk musajik (zakatnyo).
Salain bareh, ado pulo isi katidiang, barupo makanan tradisional nan dibuek sabalun rirayo Idul Fitri. Misalnyo lamang, pinyaram, kambang loyang atau ada juga galamai dan lain sabagainyo. Makanan tu masuk ka dalam katidiang, dilatakkan di ateh bareh zakat. Namonyo ‘bungo pitah’ atau bunga zakat fitrah. Barehnyo untuak nan berhak manarimo zakat, nan lamang jo pinyaram cako untuak amil atau panitia zakat.
Bara isi katidiang? Di sinan mako sukek jo gantang datang. Zaman sisuak, padi dietong pakai sukek. Semacam literan tapi dibuek dari batuang. Sakatidiang isinyo kiro-kiro 40 sukek. Tagantuang kebiasaan di nagari masiang-masiang. Lain nagari lain caro.
Ukuran sukek baragam pulo. Tagantuang daerah. Bisa ampek liter sarupo di Tiku. Samantaro di Katiagan/Sasak (wilayah Pasaman), sasukek samo jo limo liter.
Dalam konteks kitab agamo urang Nasrani jo Yahudi Perjanjian Baru (PB) jo Perjanjian Lamo (PL) sasukek kiro- kiro samo jo 12 liter manuruik paretongan urang Palestina jaman saisuak. Mantun nan ditulih di PB Matius 13:33 nan mancaritoan Yesus maagiah perumpamoan terigu tigo sukek. Atau ado juo di PL Kitab Kejadian 18:6, nan mancaritoan Abraham manyuruah istrinyo Sarah mambuek roti jo tigo sukek tapuang.
Manyabuik sukek, tantu takana pulo istilah cupak jo gantang. Di Agam, gantang samo jo cupak. Tapi di Tanah Datar sagantang samo jo ampek cupak. Sukek di Agam, gantang di Tanah Datar. Di Solok lain pulo, sasukek samo jo ampek cupak. Baitu sakiro-kiro tadanga carito urang. Lain kampuang lain ukuran.
Salain dipakai dalam ukua jo timbangan, katidiang, sukek, atau gantang bisa pulo bamakna melereng alias konotatif. Sukek ko bisa juo berarti undang-undang, aratinyo peraturan nan indak tatulih, balaku dalam satu nagari. “Lah samo cupak jo gantang, lah samo bareh jo balabeh” baitu bunyi papatah lamo. Aratinyo, lah sasuai jo norma, aturan atau kesepakatan. Bareh jo balabeh: aratinyo bareh lah samo jo hasia dan didapek/balasan. Atau labiah tarangnyo, ungkapan ko malambangkan kasaimbangan, keadilan, sasuai jo aturan nan disapakaik i.
Indak buliah pulo ditinggakan pituah atau kato-kato bijak urang saisuak nan mamakai sukek jo gantang ko sebagai perumpamaan. A kolah bunyi pituahnyo;
“Dinyo nan sasukek ampek gantang sajo”. Aratinyo nan iyo katokan iyo atau katokan nan bana bana sajo. Jan ditukuak usah dikurangi. Kalau caro inggirihnyo: to the point.
“Janji alah sukatan panuah”. Iko maknanyo, manusia lah sampai ajalnyo. Sadatiak ndak buliah kurang sadatiak ndak buliah balabiah.
“Lah panuah bak basukek”. Kalau caro kininyo, tabik suga dek lah abih saba.
“Nan sasukek indak ka jadi sagantang.” Iko maknanyo, kito manusia umua nan alah ditetapkan Allah, bara lamonyo.
Mantun sakiro-kiro nan takilan-kilan….
Wassalam.
Pakanbaru, 31/1/26
