Padang – Manjago Minangkabau pado hakikaiknyo adolah manjago adat sarato sagalo nan batalian jo kehidupan urang Minang ko. Tapi dek lantaran hari batuka tahun lah bakisa, mako sebagian dari nilai-nilai luhur keminangkabauan ntun ciek-ciek mulai luntur sudah tu hilang lanyok.
“Iko paralu bana manjadi perhatian dari babagai pihak tarutamo lembaga-lembaga sarato organisasi nan bahubungan jo keminangkabauan ko. Ndak mungkin dilapeh sajo ka bakeh niniak mamak basarato anak kamanakan baliau masiang-masiang di nagarinyo masiang-masiang pulo, tapi paralu karajo basamo,” kato Ketua Badan Koordinasi KAN (Bakor KAN) Sumatera Barat, Basrizal Datuak Pangulu Basa, Jumaik patang, kutiko maadokan rapek pengurus BakorKAN di kantua Dinas PMD Sumatera Barat.
Manuruik Datuak Pangulu Basa, bukan tak ado lembaga nan bakonsentrasi malestarikan adaik basarato nan takaik jo keminangkabauan ko, ado. Tapi masih dilakukan sacaro parsial, alun sabondong, alun sarangkau dayuang lai. Karano tu hasilnyo pun lun nampak nyato ka kehidupan keminangkabauan di nagari awak ko.
“BakorKAN ko hanyo salah satu organisasi nan basipaik fungsional nan bakonsentrasi untuk sato sakaki manjago marwah keminangkabauan ko. BakorKAN indak didirikan untuk manjadi tandiangan limbago-limbago keminangkabauan nan lah ado salamo ko, tapi adolah organisasi nan dimukauikan untuk sato manyumbang pikiran soal baa nan kaelok Minangkabau ko,” kato Yuzirwan Rasyid Dt. PGP Gajah Tongga, Ketua Dewan Pembina BakorKAN Sumatera Barat.
Manuruik baliau, banyak karajo gadang nan musti dikakok dek berbagai organisasi keminangkabauan tamasuak BakorKAN di maso kini ko. Manuruiknyo sakurang-kurangnyo ampek pakaro nan paralu jadi perhatian, kaempeknyo tu adolah edukasi, advokasi, penguatan kelembagaan sarato sosialisasi. “Kadang-kadang abih dek badiskusi sajo mampakecekan soal adat jo keminangkabauan ko, sahinggo lupo tindak lanjuiknyo,” kato salah satu pendiri BakorKAN ntun.
Samantaro tu pengacara Wendra Yunaldi nan juo salah surang panguruih BakorKAN maingekan pulo tantang paralunyo para pemangku adaik basugiro managakkan mantagi untuak menjago jan sampai tanah ulayat sabana hilang di nagari awak ko. “Kalau lah ilang tanah ulayat baiak ulayat kaum, ulayat adaik maupun ulayat nagari, alamaik lah ka habih Minangkabau ko,” kato Wendra.
Seluruh panguruih BakorKAN ko sapakaik baraso organisasi ko bukan organisasi massa dan indah hirarkis struktural malainkan organisasi fungsional nan ada di tingkat Sumatera Barat. “Kalau pun nanti ado di Kabupaten/Kota adolah perwakilan sajo atau semacam komisariat, supayo awak ndak basaiang atau batandiang-tandiang pulo jo Ormas, kecek H. Zaitul Ikhlas Saad Rajo Intan nan manjadi salah satu ketua. Pandapek buya Zaitul ntun dipakuaik dek Sekretaris Akral Sinaro Mangkuto sarato anggota Dewan Pembina Yulizal Yunus Dt Rajo Bagindo. (tan parpatiah)
