Padang – Sawah-sawah nan rusak dihondoh galodo gadang tahun nan lapeh di Sumatera Barat, Aceh sarato Sumatera Utara kini lah mulai banyak nan bisa ditanami baliak dek petani, sasudah Satuan Tugas Percepatan Rehabilitasi jo Rekonstruksi (PRR) pascabancano Sumatera bausaho kareh mampaelok sawah-sawah tu.
Banyak sawah nan sabalunnyo tatimbun lumpua, rusak saluran aia, atau indak dapek dipanga-panga an, kini lah bisa diolah baliak dek petani bahkan sabagiannyo alah ditanami baliak.
Kecek Juru bicaro Satgas PRR, Amran, sampai tanggal 7 Mei 2026, prosés rehabilitasi sawah nan dikarajokan Satgas PRR alah mancapai ribuan hektare lahan pertanian di tigo provinsi nan kana musibah ko.
Manuruik data dari Kementerian Pertanian Republik Indonesia, jumlah target pamulihan sawah nan kanai hondoh galodo gadang 2025 tu mancapi 42.702 hektare. Ndak kurang dari Rp337,97 miliar kepeng nan dipagunokan untuk proyek gadang tu. Dari jumlah tu, 16.670 hektare alah masuak ka tahap konstruksi pamulihan, sadangkan 4.098 hektare di antaro nyo alah salasai direhabilitasi.
“Indak tu sajo, sabanyak 2.212 hektare lahan alah digarap baliak dek petani, jo 2.110 hektare alah mulai ditanami baliak,” kato Amran dalam katarangan tartulihnyo, hari Satu patang ko.
Nan paling nyato kamajuannyo tampak di Sumatera Barat. Manuruik Amran, dari target pamulihan 3.902 hektare, sabanyak 3.809 hektare atau 98 persen alah masuak tahap konstruksi, jo 2.583 hektare alah tuntas direhabilitasi. Bahkan, labiah dari 2.100 hektare sawah di Ranah Minang alah baliak ditanami dek para petani.
“Alhamdulillah, sawah-sawah urang awak nan sabalunnyo rusak kini alah mulai hijau baliak. Ko tantu mambangkikkan harapan baru untuak petani,” tambahnyo.
Di Sumatera Utara, rehabilitasi sawah seluas 5.201 hektare juo alah masuak ka tahap konstruksi. Samantaro di Aceh, prosés pamulihan taruih dipacu karano laweh lahan nan kanai galodo paliang laweh di sinan, mancapai 31.464 hektare.
Amran manyabuikkan, babarapo daerah seperti Aceh Timur, Aceh Utara, Bireuen, jo Pidie Jaya kini alah mulai manampakkan kamajuan. Karajo proyek ko antaro lain mambuek baliak saluran irigasi, manyusun baliak petak sawah, sampai ka pengolahan tanah supayo dapek ditanami.
Manuruiknyo, pamulihan sawah jadi salah satu prioritas pamarintah dek karano sangat bakaitan jo kahidupan ekonomi masyarakat jo katahanan pangan di daerah nan tadampak bencana.
“Pamulihan sawah ko taruih didorong untuak mampakokoh katahanan pangan masyarakat. Pamarintah juo alah manyalurkan bantuan jo transfer dana ka daerah-daerah nan tadampak,” ujar Amran.
Inyo managaskan bahaso percepatan rehabilitasi sawah indak hanya supayo lahan baliak produktif, tapi juo manjadi bagian penting dalam mambangkikkan kahidupan masyarakat pascabancano, khususnyo ribuan keluarga petani nan salamo ko manggantuangkan hiduik dari sektor pertanian.
Bagi urang awak di Sumatera Barat, baliaknyo sawah untuak digarap bararti baliaknyo harapan. Sawah nan hijau indak sajo manandokan tanah nan subur, tapi juo lambang bahwa masyarakat alah mulai bangkik dari cobaan. Padi nan mulai tumbuah di batang sawah ibarat manyuruakkan pesan bahwa hiduik harus taruih jalan, walau sabalunnyo dirundung musibah. (tan parpatiah/msn/tmp)
