Simpang ampek baleh talatak di daerah Dharmasraya, di antaro kampuang Padang Bintungan (Blok D) jo kampuang Sialanggauang. Simpang ampek baleh ko dahulunyo mampunyoi carito tasandiri.
Maso itu kawasan ko masih manjadi hutan labek. Tanah pado maso itu marupokan tanah leluhur dari Datuak Mamangku. Datuak Mamangku adolah anak patamo dari Datuak Tuo. Inyolah nan mawarisi tanah suci leluhurnyo, sadangkan Arya Mudo, anak kaduo dari Datuak Tuo marupokan anak bungsu dari Datuak Mamangku.
Antaro Datuak Mamangku jo Arya Mudo mampunyoi karakter jo sifaik nan babeda. Datuak Mamangku mampunyoi budi pekerti nan elok, sifaiknyo nan pandiam jo panyayang kapado sasamo. Datuak Mamangku sangaiklah arif bijaksano dan mawarisi sifaik saorang rajo.
Jauah babeda jo Arya Mudo, adiaknyo. Arya Mudo mamiliki sifaik jo parangai nan batolak balakang jo Datuak Mamangku.
Sifaiknyo nan sangaik angkuah, kareh hati, jo suko mamasoan kahandaknyo. Arya Mudo rasonyo indak patuik mawarisi sifaik saorang rajo. Namun, pado maso itu tanah nan alah diwariskan dek para leluhur kapado Datuak Mamangku acok manjadi patangkaran jo adiaknyo, Arya Mudo. Karano paksoan adiaknyo nan nio mandapekan tanah leluhur tasabuik, bahwa- sonyo tanah leluhur ko haruslah diturunkan kapado anak bungsu dari seorang datuak.
Akan tetapi, Datuak Mamangku indak pernah mawujuik- kan keinginan adiaknyo. Datuak Mamangku indak tapikia kalau adiaknyo biso manjago tanah suci leluhurnyo itu. Adiak dari Datuak Mamangku marupakan urang nan kuek pado maso itu. Kemampuannyo dapek maubah lautan biru manjadi lautan api. Datuak Mamangku indak pernah maubah kayakinannyo.
Suatu katiko, Datuak Mamangku sadang bajalan- jalan di tanah leluhur nan lah diwariskan kapadonyo, Arya Mudo datang manghampiri.
“Uda, ambo kamari nak mangecekan sasuatu hal. Panuhilah pamintaan ambo ko, namun jiko uda tatap manolak, ado syaraik nan harus dipanuhi,” kato Arya Mudo satangah mahariak.
“Pajanjian apo nan kau buek?” jawek sang kakak.
“Ambo nio mangadu kakuatan jo uda, siapo nan manang inyolah nan berhak manjago tanah suci leluhur kito. Sia nan kalah inyolah nan berhak untuak diagiah hukuman mati,” kecek sang adiak.
“Eloklah ambo panuhi pajanjian itu. Kau indak ka panah manang malawan ambo,” jawek Datuak Mamangku.
Patarungan tu mamakan wakatu nan cukuik lamo karano kekuatan kaduonyo salalu imbang. Patarungan semakin lamo samakin mamaneh sarupo api nan disiram jo bensin, bagajolak. Namun, indak lamo sasudah patarungan barakhia, batua kecek papatah, dalam satiok pertarungan pasti ado nan kalah ado nan manang, nan manang jadi arang dan nan kalah jadi abu. Pertarungan lagi-lagi dimanangkan Datuak Mamangku.
“Lah tabukti kan, Diak, waang mamang lamah ndak akan pernah waang manang malawan aden,” kato Datuak Mamangku dengan tanang.
“Yo, Uda, sasuai pajanjian nan lah kito sapakati bararti hukuman mati jatuah kapado denai. Akan tatapi, sabalun ambo dihukum mati, ambo ingin mambuek sabuah tando gadang di tanah suci leluhur kito jo pedang ambo ko. Tando gadang ikolah nan bekonyo nan manjago tanah suci leluhur kito. Siapo pun urangnyo, nan mancubo malewati tando nan ambo buek iko. Kematian akan manjapuiknyo,” kato Arya Mudo.
“Bueklah tando gadang itu di siko dan kamatian akan manjapuik waang,” kecek Datuak Mamangku.
Arya Mudo tagak dan mambukak panutuik padang yang dibaoknyo. Inyo mangarahkan sado kakuatannyo nan masih tasiso, sakatiko Sutan Mudo alah mambuek tando gadang tapek di tangah- tangah tanah leluhur. Tando itu sangaik manyarupoi angko 14 dan mambantang sangaik panjang. Akan tatapi, sabalum hukuman dijatuahan kapadonyo, adiak Datuak Mamangku pun tagaletak dan mahambuihkan nafas untuak terakhir kalinyo.
“Maafkan ambo, ambo ndak bisa mancaliak waang sarupo iko. Ambo pun akan pai basamo waang karano kito dilahiakan basamo dan pai maninggakan dunia basamo pulo,” kecek Datuak Mamangku mancaliak kamatian adiaknyo.
Anehnyo sasudah mengecekan kalimek tarakhir untuak adiaknyo, Datuak Mamangku malah mambunuah dirinyo surang, dan mamiliah untuak pai basamo adiaknyo. Maninggakan tanah suci miliak leluhurnyo nan alah diwariskan kapado Datuak Mamangku. Manuruiknyo, pertarungan dalam hal mamparabuikan tanah suci bukanlah sasuatu nan elok. Mungkin tanah suci iko memang indak untuak diturunkan kapado siapo pun.
Patarungan nan cukuik lamo antaro kaduo dunsanak itu barakhia maninggakan sebuah tando gadang babantuak angko 14. Hari baganti bulan, bulan baganti tahun, hinggo babarapo tahun kamudian, tando gadang iko tabangkalai hinggo akhirnyo diubah bantuak manjadi pasimpangan. Guno malengkapi sarana dan prasarana wakatu itu, tantu sajo simpang itu dinamoi simpang 14. Simpang legenda nan manandokan akhir dari pertarungan gadang duo dunsanak.
Cukuik banyak kajadian aneh nan tajadi di simpang 14, mulai dari panampakan-panampakan sampai banyaknyo warga nan kahilangan nyawonyo jikok lewat di tampek iko. Kecelakaan-kecelakaan maut alah manjadi hal biaso nan tajadi di simpang iko.
Sarupo itulah kejadian- kejadian aneh, unik, dan janggal nan tajadi di simpang 14. Kito indak parnah mengatahui apokah peristiwa iko ado kaitannyo jo tando gadang 14 atau memang kahendak nan kuaso. Paristiwa iko memang indak bisa ditarimo jo logika. Namun, tataplah mampakuek iman kapado-Nyo karano hanyo Allah Swt.-lah nan patuik kito takuti.
*Carito ko diambiak dari Kumpulan Carito Rakyat Minangkabau nan ditabikan dek Dinas Pendidikan dan Kebudayaan Provinsi Sumatera Barat taun 2016.
