Bukittinggi — Ondeh mak, bih takalenjek perantau nan sadang barado di kampuang halaman, kutiko gunuang Marapi malatuih hari Kamih pagi manjalang matoari naiak.
Perantau nan kampuang nyo sekitar lereng Marapi sarupo Agam, Padang panjang jo Tanahdatar tantu tampak bana asok kapundan gunuang ntun kalua di puncak Marapi.
“Yo takslenjek juo awak dinyo, dek lah lamo ndak mancaliak gunuang malatuih ko, kecuali di tipi jo medsos,” kato Epi (54) parantau dari Tigobaleh Bukittinggi nan marantau ka Jakarta.
Manuruik infornasi dari Pos Gunuang Api Gunuang Marapi (PGA) latusan gunuang Marapi di tacataik pado seismograf jo amplitudo maksimum 21,6 milimeter.
“Gunuang Marapi malatuih hari Kamih, 26 Maret 2026 pukua 08.28 WIB dan balangsuang salamo 27,4 datiak,” kecek patugeh PGA, Teguh Firmansyah sarupo nan disimak dari kantua barito ANTARA.
Teguh mangatoan baso katinggian kolom abu vulkanik nan disababkan dek latusan vulkanik pado katinggian 2.891 meter di ateh pamukoan lauik (mdpl) indak bisa diamati, jale dari PGA karano tatutuik awan.
Kini ko, Gunuang Marapi masih barado di Level II atau Waspada.
Pusek Vulkanologi jo Mitigasi Bencana Geologis (PVMBG) alah mangaluaan sajumlah anjuran untuak dipatuhi dek masyarakaik.
Partamo, malarang siapo sajo untuak malakukan kagiatan dalam radius tigo kilometer dari pusek aktivitas vulkanik (Kawah Verbeek). Kaduo, PVMBG juo mamperingatkan potensi ancaman lahar dingin, tarutamo untuak urang-urang nan tingga di sapanjang sungai nan barasa dari puncak gunuang barapi. Kondisi iko dapek tajadi katiko hujan atau pado musim hujan.
Kudian, jikok abu jatuah, masyarakaik disarankan untuak mamakai masker nan manutuik hiduang jo muluik untuak maindari masalah pernapasan. Saran lain adolah mamintak sagalo pihak untuak manjago suasana nan kondusif dan indak manyebarkan kaba nan indak batua. (Tan Parpatiah)
Rirayo Marapi Malatuih, Parantau Takalenjek
