Padang Panjang – Kota Padang Panjang punyo potensi gadang dalam mandorong patumbuahan ekonomi daerah, tarutamo malalui mampakuek sektor padagangan jo mangambangkan usaho mikro, ketek jo manangah (UKM).
Kecek Gubernur Mahyeldi, nyo optimis baso ekonomi Sumatera Barat akan tumbuah labiah baiak pado taun 2026 ko, sajalan jo masuaknyo anggaran gadang untuak program rehabilitasi jo rekonstruksi pasca bencana di babagai wilayah.
“Anggaran rehabilitasi jo rekonstruksi nan mancapai triliun rupiah tantu akan mampunyoi efek pengganda pado ekonomi. Kito harus mangoptimalkan momentum ko untuak mandorong patumbuahan ekonomi daerah,” tegasnyo.
Di sisi lain, Mahyeldi juo maingekkan bahaso kondisi keuangan daerah kini menghadapi tantangan, baiak di tingkek provinsi maupun kabupaten/kota. Karano itu, langkah-langkah adaptif diparalukan dalam pengelolaan anggaran supayo pembangunan balanjuik.
“Kito harus mananggapi kondisi ko sacaro capek. Jan sampai pambangunan baranti. Fokuskan anggaran ka program-program nan mampunyoi dampak langsuang jo balanjuik ka masyarakaik,” nasehatnyo.
Mako dek itu, Gubernur Mahyeldi Ansharullah maingekan baraso paralu bana mampakuek sinergi antaro pamarintah provinsi jo pamarintah kabupaten/kota sabagai kunci untuak mandorong Pertumbuhan ekonomi daerah.
Kutiko rapek jo Pemerintah Kota Padang Panjang, Salasa patang ko, Mahyeldi manyabuik pulo bahwa rapek koordinasi ko adolah salah satu langkah strategis untuak manyamokan persepsi jo mampakuek karajo samo antaro tingkek pamarintahan dalam maadoki babagai tantangan pambangunan daerah.
“Sinergi nan kuaik akan mamudahkan panyalasaian babagai masalah pambangunan sarato mampacapek realisasi program strategis di daerah-daerah. Sinergi antaro pamarintah provinsi jo pamarintah kabupaten/kota adolah kunci. Jo kolaborasi nan kuek, kito dapek manyalasaian babagai masalah basamo-samo dan program pambangunan dapek bajalan labiah optimal,” kato gubernur nan acok disapo jo panggilan Buya ntun.
Samantaro itu, Walikota Padang Panjang, Hendri Arnis manyatoan apresiasi ateh dukungan Pemprov Sumbar dalam mandorong pambangunan di wilayahnyo.
Inyo manjalehan baso Pamarintah Kota Padang Panjang malaksanakan sajumlah strategi untuak mampacapek patumbuahan ekonomi, tamasuak malalui modernisasi pasa rakyat jo UMKM, mangambangkan ekonomi digital, jo mampakuek sektor industri kreatif.
“Saat ko kami juo fokus untuak marevitalisasi pariwisata budayo jo religi, pambangunan infrastruktur, sarato maningkekan kualitas SDM, tamasuak revitalisasi Pasa Utamo jo Pasa Sayua Bukit Surungan,” kecek Hendri. (tan parpatiah)
Salain dari itu, Pamarintah Kota Padang Panjang juo taruih mampakuek pangambangan SDM malalui babagai program pandidikan, baiak formal maupun informal.
“Kami punyo program beasiswa untuak mahasiswa jo calon ulama, sarato program Satu Rumah Tangga Satu Hafiz nan taruih kami kembangkan sacaro baansua-ansua,” jalehnyo.
Rapek koordinasi ko juo dihadiri Wakil Walikota Padang Panjang, Allex Saputra, sarato kapalo-kapalo Organisasi Aparat Daerah (OPD) di dalam Pemprov Sumbar dan Pemerintah Kota Padang Panjang. (tan parpatiah)
