Padang — Jikok sanak maraso panek jo latiah dalam pajalanan ka kampuang halaman, sanak buliah manggunoan kantua polisi nan paliang dakek sabagai tampek istirahat samantaro dalam pajalanan ka kampuang halaman.
“Pemudik nan maraso panek bisa istirahat di kantua polisi, manuruik arahan dari pimpinan Polda Sumbar,” kato Direktur Lalu Lintas Polda Sumbar Kombes Pol HM Reza Chaerul Akbar Sidiq di Padang.
Keceknyo, indak paralu cameh atau ragu-ragu untuak mandakek-i petugas katiko paralu bantuan, baiak di kantua atau di pos-pos di sapanjang rute pulang kampuang.
Salain dari kantua polisi, pemudik dapek juo baranti di tampek istirahat nan ditantuan dek pamarintah daerah, atau pos-pos nan talibaik dalam Operasi Ketupat 2026.
Reza maimbau kapado musafir untuak indak mamaso diri katiko maraso panek atau mangantuak di tangah pajalanan, untuak manjago kasalamatan jo kaamanan.
Polisi juo maimbau para sopir oto untuak mamparatian kondisi kandaraan sarupo masin, ban, rem jo dokumen kandaraan sabalun barangkek.
Sudah tu pastikan sanak alah siap sabalun pai, baiak sacaro fisik maupun rohani, tamasuak dokumen jo paralatan supir.
Salanjuiknyo, musafir dimintak untuak patuah kapado sadoalah rambu-rambu lalu lintas nan ado, patuah kapado panando jalan, jo indak manyubarang jalur.
Polisi sadang maagiah paratian khusus ka babarapo lokasi nan dianggap rawan kecelakaan lalu lintas, yaitu Sitinjau Lauik (Padang), Lambah Anai (Tanah Datar), jo Panyalaian (Tanah Datar).
“Kami alah manyebarkan personil, mandirian pos kaamanan, bakoordinasi jo instansi dan mamasang rambu-rambu peringatan nan rawan kecelakaan,” katonyo.
Direktorat Lalu Lintas Polda Daerah Sumbar mampakirokan puncak lalu lintas pulang kampuang di wilayah Sumbar akan tajadi pado H-2 jo H-1 Idul Fitri 2026, atau labiah tapeknyo pado hari Kamih jo Jumaik (20/3) nan katibo. (Tan parpatiah)
Panek dek Nyetir ka Kampuang? Buliah Istirahat di Kantua Polisi
