Dulu kutiko Malanca kanak kanak, ado curito urang kiramat nan bisa pindah pindah tampek dalam wukatu nan samo.
Bunyi carito nan bakambang, sadang bacukua urang kiramat tu, bisa manoloang kapa nan sadang tabaka di tangah lawik. Ado lo carito nan lain, urang tu bisa pulo manoloang urang tabanam di batang aia gadang.
Carito ko yo takah saiah bana, sabab dalam kaba dari muncuang ka muncuang, jaleh bana urang kiramat tu kapalonyo baru tacua sabalah. Tambah pulo bunyi hikayat, sadang bacukua manyudahan kapolo nan sabalah lai, taraso dek tukang cukua baso kain salimuk cukua tu basah tarandam aia.
“Dari maa Ungku santa ko Ngku,” tanyo tukang cukua.
“Sudah manoloang urang hampia tabanam. Sudah tu singgah lo manyiram kapa tabaka di tangah lawik,” jawek urang kiramat.
Takah tu bana bunyi carito nan tateba di tangah kampuang. Malanca, tacangang pulo mandanga carito nangko.
Suatu hari, nyo tanyo ka ayahnyo dek Malanca. “Yo ado urang kiramat nan sadang bacukua, bisa mamadam kapa tabaka di tangah lawik, sudah tu manoloang urang ampia tabanam pulo di batang aia, yah?” tanyo Malanca.
“Mungkin yo ado,” jawek ayah Malanca.
“Urang maa Ungku kiramat tu yah?” sambuang Malanca.
“Antah lah yo. Awak mandanga kaba kaba angin sajonyo,” jawek Ayah.
“Ba a kok bisa ado carito takah itu yah,” sasak Malanca.
“Carito ko ado, kan dek dibuek tukang carito,” jawek ayah Malanca.
Duo hari nan lapeh, Malanca tamanuang surang diri. Kecek urang tuo tuo, urang urang kiramat tu hanyo tuanku tuanku nan saliah saliah sajo. Urang nan tahu jo agamo. Inyo maamalkan ilemu nan ado.
Karano itu pulo Malanca batanyo dalam hati. Ba a dek kini ndak ado tadanga urang urang kiramat takah dulu itu lai. Samantaro dalam hape banyak urang bailemu tenggi mambantangan kaji.
Sobok dalam hape, banyak nan mudo mudo lah santiang maso kini. Pandai pulo mambatakan kaji urang urang siak maso dahulu. Tapi dari sabanyak itu, dak ado nan tadanga jadi urang kiramat.
Untuak mancari tahu panyabab sabananyo, Malanca batanyo ka Mak Uniang sapulang musajik, sudah sumbayang Subuah pagi tadi.
“Baa nan sabananyo Mak Uniang. Lah jarang tadanga urang kiramat itu kini lai. Di hape banyak nan malagak takah ulama nampak dek ambo?” tanyo Malanca.
“Ndak tantu pulo dek waden do Malanca. Waden dak tantu hape hape itu doh,” jawek Mak Uniang.
“Ndak ado Mak Uniang caliak di Fesbuk, jo we a, tuwiter sarato instagram bagai? Yo lah katinggalan jaman Mak Uniang mah. Ambo punyo sadonyo tu Mak,” panciang Malanca.
“Biyalah Nca. Waden ko urang bodoh. Ndak tahu manahu jo gunjiang nan bakaleperan. Biyalah waden baco kitab sajo, bisa duo, tugo juz sahari. Nan iko pasti arati jo maknanyo. Bapahalo wak mambaco,” jawek Mak Uniang data.
Samantaro Malanca tatunduak. Sabab, hari harinyo abih dek mancaliak hape, kotak kaco, tampek kaba nan indak bakasudahan jo gunjiang nan bakapanjangan….
