Pikumbuah — Limo tahun sabalun Indonesia merdeka. Aisyah Djamal lah baumua lapan tahun. Inyo lahia pado taun 1933. Tapi nenek dari Pikumbuah ko masih bisa bacarito pengalamannyo naiak karete api zaman saisuak.
Nyo mulai bacararito ka media ko, pangalaman naiak kereta api diajak dek ayah jo amaknyo. “Pagi tu, ambo indak takana bulan jo tanggalnyo. Ayah jo amak diajak naiak kareta api dari nagari di Balai Talang, Danguang-danguang, ka Tanjung Alam di Agam,” kisahnyo.
Sabalun subuah, Aisyah jo ayah dan mandenyo lah siap-siap. Aisyah pakai baju jo rok bungo warna hijau. Rambuik dikabek duo kepang. Sudah tu bajalan manuju ka stasiun kereta api di Limbanang nan jaraknyo labiah kurang satu satangah km dari rumah di Balai Talang.
Aisyah mancaritokan baraso bangunan stasiun nan sederhana, dimano calon panumpang dapek dicaliak manunggu kareta api barangkek. Babunyi piluik panjang. Kereta api mulai bajalan manuruik jalur Danguang-danguang, Guguak, Padang Arai, Koto Baru, Lampasi sampai tibo di stasiun di Koto Nan Ompek di Payakumbuh.
“Stasiun kareta api nan lapang. Ado loji godang nan tagantuang di bawah loteng. Jadi bisa dicaliak dari sagalo arah.“Ambo sabananyo tertarik mancaliak lokomotif uap maisi lambung jo aia,” kato Aisyah nan tiok hari dipanggia Amai.
Sudah tu baputa lokomotif, induak kureta nan diimbau Mak Itam. Awalnyo posisi lokomotif adolah di balakang kareta panumpang. Katiko kami ka malanjuikan pajalanan, lokomotif lah di muko. Lokomotif tu maelo, indak mandorong.
“Ambo duduak di pangkuan Amak. Kurisi panumpang di ruang panumpang tabuek dari kayu pilihan. Tantu susah duduak di atehnyo. Indak ado busa. Tapi Amak indak maraso barek untuak mambaok ambo, anak gadih ketek nan lah lamo ingin batua-batua mangalami naiak kureta api,” kisah Amai ko mangana jo mambayangkan pangalaman maso saisuak tu.
Tujuan mereka ka manyilau Tanjung Alam ka rumah bako di nagari Koto Marapak.
Sasudah lokomotif maisi lambung jo aia, kareta api bajalan lambek-lambek. Jendela sangajo dibukak supayo angin masuak dan panumpang indak maraso angek di darisi (gerbong) panumpang. Jan pernah lo bapikia ado AC di maso tu. Hanyo AC alam sajo.
Di tiok darisi ado surang tukang rem lah jaleh nampak. Kutiko manjalang stoplat atau stasiun tukang rem ko basikakeh mamutat rem tu, mangurang kecepatan kareta.
“Kami alah malewati Ngalau Sompik, malewati patuang Sibincik dan sampai di stasiun partamo, yaitu stasiun Baso, dari arah Payakumbuh. Puluahan calon panumpang naiak jo tujuan nan babeda. Piluik panjang babunyi baliak kutiko kareta api bajalan manuju stasiun-stasiun barikuik Guguak Simarasok, stasiun Baso, stasiun Penampung, Biaro jo stasiun kareta api di Tanjung Alam,” kecek Amai.
Di stasiun Baso samakin banyak penumpang nan nio ka Bukiktinggi. Kadang-kadang darisi panumpang ditambah, sahinggo panumpang bisa agak balapang-lapang duduak di bangku. Calon panumpang kereta api barasa dari nagari-nagari sakitarnyo, dari Pakan Kamih, dari Ampek Angkek Canduang dan dari Sungai Janiah.
Turun dari kureta api, baju jo rambuik lah babaun batu baro. Batu baro dibaka di paruik lokomotif untuak maangekan aia untuak mangaluaan uap. Uap adolah energi nan mambuek loko bisa manggarik.
Pangalaman naiak kareta api tu dialami pulo dek kawan-kawan saumua jo Aisyah, antaro lain Rosna, 94 tahun, Darmizan, 94 tahun. Kaduonyo warga Balai Talang Limapuluh Kota adolah saksi sajarah nan masih hiduik, tapi pandangaran jo pandangannyo rusak dek umua.
Kaduo padusi gaek tu, saksi sejarah tu, kini naiak stroller kama sajo inyo nio pai.
Iko babeda jo Rakana, 95 tahun warga nagari Balai Talang. Inyo sakali-sakali naiak kureta api. Namo ayahnyo Malanca, supir bus antar kota wakatu itu.
Suatu katiko, Rakana naiak kareta api dari Danguang-danguang dan dilapeh dek kawan-kawan samo gadangnyo ka kota Padang, bantuak baraangkek maanta jamaah haji pai ka Makah jaman kini.
Satibonyo di Padang, Rakana pindah ka kapa panumpang parusahaan D’Loyd di palabuahan Taluak Bayua. Tujuannyo adolah Batavia (kini Jakarta).
Hanyo saketek urang kini nan alah gaek nan masih iduik, saksi sejarah nan bisa mancaritokan tantang kereta api dari Payakumbuh ka Limbanang, tamasuak Aisyah, Rosna jo Darmizan.
Pado maso itu, kareta api adolah alat angkutan umum utamo. Maangkuik panumpang jo barang ka Payakumbuh. Moda transportasi lain adolah garobak nan dielo dek kabau. Bajalan baduo jo tukang padati malam hari.
Kini jalur kareta api dari Limbanang ka Payakumbuh hanyolah kenangan sajo. Dari Limbanang, banyak kenangan warga dilapeh dek kaluarga nan nio pai marantau. Di sinanlah harapan dimulai.
Ado kamungkinan rel kareta api di sapanjang Payakumbuh ka Limbanang indak dibongka, itu manjadi bukti bahaso tanah tampek rel kereta api talatak adolah milik PT KAI. Kini di ataeh rel-rel kereta api tu lah panuah jo bangunan. Masyarakaik diagiah kesempatan dek PT KAI untuak mampngunokan dengan jalan manyewo tanah. Tapi dengan pajanjanjian, baraso kalau tibo-tobo diparalukan dek PT KAI, bangunan harus dibongka.
Baitulah, kereta api ka Limbanang nan lah tingga kenangan. Nan mudo-mudo tantu ndak tahu baraso pernah ado Mak Itam dari Padang sampai ka Limbanang. (kontributor: akmal darwis)
