Alkisah ado sabuah batu gadang bantuaknyo samo jo gajah. Jadi, batu ko namonyo batu gajah. Batu gajah ko ado di Desa Koto Beringin Kecamatan Tiumang, Kabupaten Dharmasraya.
Pado zaman dahulu, di tangah-tangah hutan hiduik saorang padusi namonyo Nurmala. Nurmala indak punyo orang gaek. Apaknyo saorang datuak sakti namonyo Datuak Sadarang. Datuak ko la maningga katiko baburu. Datuak Sadarang dibunuh dek siluman harimau.
Sabalum maningga, Apak Nurmala maagiah sabuah jimek kapado Bundo Nurmala. Namonyo Nyai Darmani. Sadoe kasaktian jo kekuatan Datuak Sadarang dipindahkan ka dalam jimek ko. Jimek ko barupo sabuah kaluang jo liontin warnanyo merah. Pado waktu malam, jimek ko bacahayo. Selain ko, jimek iko bacahayo sawaktu ado bahayo sahinggo Nyai Darmani hiduik dengan tanang jo damai di tangah hutan.
Datuak Sadarang mangecekan baso jimek ko harus diagiah kapado Nurmala bilo anaknyo alah lahia. Sadoe kakuatan sang datuak ka dimiliki Nurmala. Datuak Sadarang mangecek, bilo Nyai Darmani malahiaan anak jantan, anaknyo ka manjadi sakti nan tampan. Bilo malahiaan anak padusi, ka manjadi padusi yang sakti. Inyo ka mampunyoi bakat untuak mangarti jo mampu mangecek jo binatang. Anak ko ka mampunyoi wajah nan cantik.
Babarapo bulan kamudian, Nyai Darmani malahiaan anak padusi. Namonyo Nurmala. Sarupo nan alah dikecekan jo Datuak Sadarang, Nurmala punyo wajah nan sangaik cantik. Kecantikkannyo maundang bangsawan nio maadopsi Nurmala. Tapi, Nyai Darmani salalu manolak.
Pado suatu malam, datanglah urang jaek yang nio mancilok Nurmala. Katiko urang jaek ko mahunuihkan sanjatanyo, sanjato ko tasabuik jatuah ka tanah. Hal iko karano jimek dari Datuak Sadarang. Nyai Darmani pai mambawo Nurmala ka hutan. Mereka hiduik di hutan. Mareko hiduik di gubuak ketek.
Suatu hari ado nan mangatahui nan tasabuik. Warga ko mangecek kapado warga nan lain. Sajak hari ko, banyak urang datang ka tangah hutan untuak maliek Nurmala. Untuak manuju gubuk ketek ko, ado sungai yang arusnyo sangaik dareh. Banyak urang maningga katiko malewatinyo. Alah batahun-tahun, Nurmala tumbuah manjadi padusi yang sangaik cantik. Inyo hiduik tanang jo bundonyo. Tapi, hal iko indak batahan lamo.
Suatu hari, datang saikua harimau. Harimau ko nan mambunuah Apak Nurmala. Harimau ko pulo nak mambunuah Nurmala jo bundonyo. Katiko harimau mancakam Nurmala, Nyai Darmani maambiak padang, sudah tu mahunuihan ka tubuh harimau. Walau harimau ko alah mati, Nyai Darmani taluko parah. Akhirnyo, Bundo Nurmala maningga. Sabalum ko, inyo mangecek kapado Nurmala supayo mancari saikua gajah putiah di tangah hutan.
Bara hari sasudah tu, Nurmala mulai mancari gajah putiah ko. Salamo di jalan, inyo bisa mandanga hewan-hewan mangecek. Karano alah lamo bajalan, Nurmala indak talok mancari gajah putiah ko. Akhianyo, Nurmala duduak di bawah pohon dakek sungai nan aianyo sangaik janiah jo rasanyo manih. Nurmala maminum aia ko, tapi tibo-tibo saikua induak gajah putiah jo anak-anaknyo datang.
Gajah ko batanyo, “Sia ko, baa kau maminum aia sungai ko tanpa saizin ambo?”
Nurmala manjawek, “Ambo Nurmala. Anak Datuak Sadarang jo Nyai Darmani. Bara hari nan lalu, bundo ambo maningga. Sabalum maningga, bundo ambo mangecek supayo ambo pai mancari gajah putiah di tangah hutan.”
Gajah putiah ko manjawek, “Ampun ambo, Nurmala, karano basikap indak elok kapado kau. Minumlah aia sungai ko. Hilangkanlah raso auih tu.”
Nurmala batanyo, “Manga angkau basikap elok kapada ambo?”
Gajah putiah manjawek, “Ambolah Si Gajah Putiah nan kau cari. Apak kau dulu alah manyalamaikan ambo. Ambo ka marawat jo malindungi angkau. Ambo bajanji.”
Nurmala manjawek, “Tarimo kasih, Gajah Putiah.”
Sajak hari ko, Nurmala hiduik jo induak gajah putiah jo anaknyo. Induak gajah marawat Nurmala jo raso sayang. Satiok hari, Nurmala diaja baburu jo mambela diri supayo Nurmala biso malindungi dirinyo surang.
Jauah dari tangah hutan, hiduik saurang pangeran, namonyo Sarwana. Pangeran ko sangaiklah tampan jo hiduik di istano nan rancak. Tapi, dirinyo indak punyo budi elok. Dirinyo diagiah kakuatan jo para dewa, tapi dirinyo manyalahgunakannyo. Makonyo, pangeran ko diagiah gala “Si Pahik Lidah”.
Orang gaek Pangeran Sarwana maadoan lomba untuak padusi supayo nio manjadi istri pangeran. Baribu-ribu padusi datang untuak maminang pangeran ko. Tapi, ndak ado nan ditarimo pangeran. Sampai suatu hari, Pangeran Sarwana bongi karano satiok padusi nan datang taruih manggaduahnyo. Dirinyo tau padusi ko hanyo nio haratanyo sadoe.
Akibaiknyo, sang pangeran mangutuak padusi ko manjadi batu. Orang gaeknyo indak bisa berang karano takuik pangeran mangecek hal nan indak rancak.
Hal iko mambuek urang gaek sang pangeran rusuah karano indak ado padusi nan nio manjadi istri pangeran. Karano ko, orang gaek sang pangeran manyuruh pangeran untuak pai mancari istri. Pangeran indak buliah baliak sabalum mambaok istri. Pangeran sapakek jo hal tasabuik. Bara hari kamudian, pangeran pai mancari calon istrinyo.
Batahun-tahun pangeran mancari, indak batamu juo. Sampai suatu hari, pangeran tasasek ka tangah hutan. Dirinyo mancari jalan, tapi indak basobok. Dirinyo manamukan sabuah sungai, tapi arusnyo sangaik dareh. Pangeran bapikia baa dirinyo bisa malewati. Tapi, dirinyo salah karano di tangah-tangah sungai, pangeran jatuah ka ateh batu dan hanyuik ka dalam sungai.
Di hulu sungai ado malaikaik nan manyalamaikan pangeran, yaitu Nurmala jo Gajah Putiah. Mareka marawaik pangeran salamo babarapo hari. Akhianyo pado suatu hari, pangeran sadar dan dirinyo maraso katakuikan karano barado di gubuak ketek nan manyeramkan. Katiko pangeran nio kalua, dirinyo maliek padusi nan banamo Nurmala.
Dirinyo nio manjadian Nurmala istrinyo. Pangeran mandakek kapado Nurmala dan batanyo, “Wahai Gadih rancak, siapo angkau? Apakah angkau alah manolong dan manjaga ambo?”
Nurmala manjawek, “Iyo, Tuanku. Ambo Nurmala yang alah manyalamaikan angkau”.
Pangeran batanyo baliak, “Apo nan angkau nio? Ambo Pangeran Sarwana bisa maagiah sado nan angkau nio. Harato, kakuasaan, akan ambo agiah karano alah manyalamaikan ambo.”
Nurmala manjawek, “Indak, Tuanku. Ambo ikhlas. Ambo hanyo nio Tuanku capek cegak dan pai maninggakan tampek ko karano hutan ko sangaik babahayo untuak angkau.”
Pangeran manjawek jo bongi, “Sombong bana angkau. Angkau hanyo padusi biaso nan tingga di tangah hutan ko. Ambo akan agiah sadoe ka angkau. Angkau bana-bana padusi nan bodoh.”
Nurmala manjawek jo elok, “Ambo minta maaf, tapi hutan ko alah manjadi rumah ambo. Ambo indak nio maninggakan rumah ambo. Dan bana aponyo baso hutan ko babahayo untuak tuanku.”
Pangeran Sarwana manjawek, “Ambo indak takuik. Tunggu sajolah Nurmala copek atau lambek, ambo ka manjadian angkau istri ambo walau jo cara mamaso.”
Pangeran Sarwana maninggakan tampek ko jo bongi. Dirinyo bajanji baso ka mambawo Nurmala ka istananyo. Bilo di jalan, pangeran bapikia, “Bagaimano saurang padusi biaso bisa hiduik di tangah hutan? Pasti ado sasuatu nan malindunginyo.”
Akhirnyo Pangeran Sarwana baliak ke gubuak katek tampek Nurmala tingga. Dirinyo maliek Nurmala mangecek jo Gajah Putiah nan amaik gadang jo binatang lainnyo. Pangeran samakin suko jo Nurmala. Dirinyo bapikia indak bisa mangarajoan surang. Dirinyo mamutuskan untuak baliak ka istano dan mambaok pasukan untuak mambaok Nurmala jo paso.
Bilo alah sampai, pangeran mangecek hal ko kapado orang gaeknyo dan mareka sapakek akan hal ko. Pangeran mambaok banyak pasukan jo harta, ameh, untuak diagiah ka Nurmala. Satalah bahari-hari, pangeran basobok jo gubuak Nurmala. Dirinyo manyusun rencana karano Nurmala salalu dijago jo Gajah Putiah. Akhianyo pangeran mandatangi Nurmala dan maminangnyo baliak, tapi Nurmala masih manulak.
Pangeran Sarwana mangecek kapado Nurmala, “Hahaha. Nurmala, ambo mambaok banyak harato jo ameh untuak maminang angkau. Apo kau indak nio?”
Nurmala manjawek jo yakin, “Ambo indak ka manarimo salamonyo. Ambo indak ka maninggaan tampek ko.”
Pangeran bongih, “Pasukan, baok Nurmala jo paso. Copek!”
Bilo pasukan pangeran nio manangkok Nurmala, jimeknyo bacahayo dan sado sanjato pasukan pangeran jatuah ka tanah. Gajah Putiah malinduangan Nurmala pulo. Akhianyo, pangeran lari jo manyusun rencana baru. Dirinyo duduak dakek sungai dan mandapekan sabuah ide untuak mambaok Nurmala. Bisuak harinyo, pangeran mambuang sado ameh nan dirinyo punyo ka tapian sungai. Sasudah ko, dirinyo basambunyi di baliak sama-samak. Sasudah manunggu bajam- jam, pangeran maliek Nurmala jo Gajah Putiah bamain di dakek sungai.
Karano hari ko angek bana, anak Gajah Putiah main aia di tapian sungai dan maliek sasuatu nan bacahayo di ateh aia. Anak gajah masuak ka dalam sungai. Dirinyo masuak samakin dalam dan akhianyo tanggalam. Induak gajah langsuang lari untuak manyalamaikan anaknyo. Tanyato induak gajah indak bisa manyalamaikan. Mareka baduo samo-samo tanggalam dan maminta tolong kapado Nurmala.
Induak gajah putiah mamakiak, “Nurmala, Nurmala, Nurmala. Tolong salamaikan kami,” Induak Gajah jo Anak Gajah ko hampia tabanam. Karano sungai tasabuik dimasuki dek duo ikua gajah, sungai tasabuik manjadi karuah.
Nurmala barteriak, “Tolong, tolong, tolong! Tolong siapo sajo. Tolonglah kaduo gajah ko. Tolong!”.
Tibo-tibo Pangeran Sarwana muncua sambia galak, “Hahahahaha. Hai Nurmala, kini gajah nan manjago kau alah indak ado. Kini kau surang. Indak ado nan manjago lai dan indak ado nan mahalangi ambo untuak mandapekan angkau”.
Nurmala menjawek, “Yo, Tuanku, apokah iko karajao angkau? Kau nan alah mambuek kaduo gajah tu tabanam? Angkau sangaik buruak jo kejam. Bagaimano kau bisa babuek. Taukah angkau gajah nan manyalamaikan angkau dari kematian jo marawat sarato manjago angkau. Manga angkau tega babuek?”
Pangeran Sarwana manjawek, “Katahuilah Nurmala, iko sadoe karano angkau. Karano angkau manolak untuak menjadi istri ambo. Asalkan angkau obe, ambolah Si Pahit Lidah dan ambo satu-satunyo urang nan biso manolong kaduo gajah ko asalkan angkau nio manjadi istri ambo. Lai nio angkau?”
Nurmala manjawek, “Wahai Si Pahit Lidah, elok angkau kutuak ambo daripado ambo menjadi istri kau”.
Pangeran Sarwana bana-bana bongi dan mengecekan hal nan buruak. “Wahai dewa, ambo mangutuak gajah-gajah ko manjadi batu!”
Tibo-tibo, tajadi sasuatu nan ajaib. Lambek-lambek tubuah kaduo gajah ko mulai manjadi batu. Sungai tampek gajah ko tabanam, mulai manjadi karuah. Aia nan dulunyo janiah dan rasanyo manih, kini alah barubah manjadi sungai nan amaik karuah dan babau indak sedap. Nurmala manangih dan sudah tu maambiak sabuah pedang. Pedang tasabuik dihunuihkan ka jantungnyo. Nurmala akhirnyo maningga. Sabalum maningga, inyo mangatoan, “Wahai para dewa nan aguang, agiah ganjaran nan setimpal pado Si Pahit Lidah ko. Inyo alah manyalahgunoan kekuatan nan dimiliki”.
Setelah Nurmala maningga kareno mambunuah dirinyo surang, Pangeran Sarwana bana-bana bongi. Kudian dirinyo maambiak sabuah pedang, lalu mahunuihan pedang ka dalam jantuangnyo. Dirinyo labiah elok mati daripado indak bisa mandapekan cinto Nurmala.
Badan Pangeran Sarwana jatuah tapek di sampiang jasad Nurmala. Tapi, beberapa saat sudah tu, jimek kaluang nan dipunyoi Nurmala bersinar. Tibo–tibo badan Nurmala bacahayo dan mailang. Jiwa dan raga Nurmala alah diambil dek para dewa. Tapi, tibo-tibo jasad Pangeran Sarwana alah mambusuak di tapian sungai. Para binatang buas sekatek demi saketek mamakan dagiang nan tasisa dari tubuh Pangeran Sarwana. Keserakahan dan kesombongan Pangeran Sarwana alah mambutokannyo dan akhianyo manewaskannyo.
Sungai dakek gubuak Nurmala tingga, kini manjadi karuah. Induak gajah jo anak gajah nan tanggalam barubah menjadi batu dan batu tasabuik malakek jo manempel pado tapian sungai nan karuah ko. Kini batu nan malakek disabuik masyarakaik jo Batu Gajah.
Kini Batu Gajah manjadi tampek sakral dan acok didatangi dek masyarakaik. Kisah kasombongan jo kaserakahan Pangeran Sarwana alah manyadarkan masyarakaik dan Batu Gajah ko kini dijadian tampek untuak mangana kebaikan jo keelokan sang gadis hutan, Nurmala, sarato untuak manganang akhia kahidupan Si Pahit Lidah, Pangeran Sarwana.
