Goa Inyiak Puti Baliriang

Alkisah, di Gunuang Bungsu, Nagari Batipuah Baruah, Sumatera Barat, dahulu kala hiduiklah saurang padusi nan tingga di tapi hutan. Padusi nan banamo Puti Baliriang itu dipanggia urang banyak Inyiak Puti Baliriang. Baa ko dipanggia Inyiak (nenek)? Yo, karano urang ko alah baumua saratuih tahun. Walau baumua 100 tahun, inyo kalihatan sarupo padusi mudo. Inyiak Puti Baliriang mamiliki rambuik nan panjang, bahkan jo panjang rambuiknyo tu, inyo dapek manggunoan rambuiknyo sabagai aleh untuk tampek lalok. Salain daripado tu, Inyiak Puti Baliriang mamiliki talingo nan panjang nan dapek manyalimuti tubuahnyo katiko inyo lalok. Namun, walaupun Inyiak Puti Baliriang mampunyai talingo jo rambuik nan panjang, nenek tasabuik sangaik rancak nan elok malabihi kecantikan padusi mano pun pado maso tu.

Walaupun Inyiak Puti Baliriang tingga di tapi hutan, inyo mampunyai rumah yang sangaik gadang jo rancak pado maso itu. Rumah Inyiak Puti Baliriang sarupo istano nan tinggi. Rumah tasabuik mamiliki banyak barang atau barang-barang antik yang sangaik baharago. Namun, di tangah kalabihan harato yang inyo miliki, inyo indak mamiliki sanak saudaro, kawan, ataupun pasangan hiduik. Satiok hari inyo salalu surang diri dan sangaik kasapian. Wakatu itu Inyiak Puti Baliriang nio bana mandapekan surang kawan nan bisa manamaninyo. Namun, inyo bapikia wakatu itu adolah hal nan mustahil sabab sabalunnyo inyo alun panah maliek siapo pun masuak ka dalam daerahnyo ko.

Di tampek lain, di tapi sabuah sawah, nampaklah sakarumunan urang, dari wajah nan inyo pancarkan, nampaknyo ado masalah gadang.

“Parsoalan iko harus sacapeknyo disalasaian, sabalun masalah baru nan labiah sarius tumbuah pulo,” kecek salah surang pemuda dengan suaro kareh dari tangah karumunan ko.

“Iyo, bana! Masalah ko wajib hukumnyo kito salasaian sabalun awak kasadonyo mati kalaparan,” sambuang saurang kakek manimpali.

“Tapi baa caronyo?” bisiak nan lain pulo. Warga indak punyo urang pintar untuak mangatasi masalah iko. Tibo-tibo datanglah saurang laki-laki mudo mamakai pakaian rapi mandakek ka urang banyak ko.

“Assalamualaukum, baa kaba? Apo nan tuan-tuan ribuikan bana?” keceknyo.

Ruponyo nan datang ko iolah Datuak Bandaro, urang tapandang nan bapangaruah. Tasabuik inyo urang bijaksano jo randah hati di kampuang ko.

“Baiko Datuak, maso panen sabanta lai ka tibo, akan tatapi tanaman awak banyak dirusak babi lia, Datuak,” jawek saurang anak mudo.

“Iyo, Datuak, kami sangaik rusuah Datuak, jiko kami mangalami gagal panen, kami makan jo a, jo apo Datuak?” sambuang surang padusi nan sadang manggendong anaknyo.

“Datuak, jiko Datuak bisa, tolonglah. Carian jalan kaluanyo ateh masalah nangko, Datuak,” kecek kakek tadi. Bapikia sabanta Datuak Bandaro, sudah tu inyo mangusuakan idenyo ka masyarakaik banyak.

“Dunsanak kasadonyo, baa jiko kito maadoan acara berburu babi untuak mangatasi masalah iko. Iko caro yang dapek kito lakukan. Untuak itu, dunsanak yang mampunyoi anjiang, diharapkan sukorela mambaok anjiang-anjiang ka acara tu,” kato Datuak Bandaro lantang. Datuak Ambasa, kawan Datuak Bandaro pun manjawek.

“Datuak Bandaro dan dunsanak sakalian, jiko dunsanak satuju jo usul dari Datuak Bandaro ko, ado eloknyo kito musyawarahkan daulu hal iko isuak ari, karano jiko kito putuihan kini, awak indak sabara nan ado,” baleh Datuak Ambasa. Sado urang nan hadir satuju.

Bisuaknyo usua Datuak Bandaro dan Datuak Ambasa disatujui dek sado warga kampuang nan hadir sasudah bamusyawaroh cukuik alot.

Di pinggia hutan nan sunyi, Nyiak Puti Baliriang maraso sangaik bosan dan taruih kasepian.

“Harus baa ambo di siko? Sasudah mamutuihan untuak manjadi manusia, ambo indak punyo kawan, indak pernah ado manusia lain di sakitar siko,” kecek Nyiak Puti Baliriang sadiah.

“Oi, bilolah ambo ka mandapek kebahagiaan jo manusia lain? Tapi sudahlah, ambo yakin suatu ari ado surang manusia nan datang ka dalam kahidupan ambo ko,” pikia Nyiak Puti Baliriang sambia senyum-senyum surang. Indak nio banyak barandai-andai, Nyiak Puti Baliriang pai bajalan-jalan ka tampek nan indak jauah dari rumahnyo untuak mangilangan raso sepi nan samakin maentak.

Warga mamulai acara baburu babi yang dipimpin dek Datuak Bandaro dan Datuak Ambasa pado siang hari. Dalam hal iko, biasonyo pemburu alah tahu kama tujuan baburu. Gonggongan anjiang pun sangaik jaleh tadanga jo entakan kaki sang pemburu yang balari maikuikan kama anjiangnyo pai. Ciek ciek babi ko didapekan, tapi indak saketek anjiang-anjiang yang tak baliak.

Hari alah samakin sore. Namun, gonggongan anjiang samakin nyariang tadanga. Entakan kaki yang sangaik kancang tadanga sangaik jaleh.

“Capeklah! Tingga sakelok lai,” pakiak Datuak Bandaro. Anjiang lah balari ka tapi hutan nan cukuik jauah diikuikan dek tuannyo. Namun, bukannyo mandapek babi, para pemburu mancaliak sasosok padusi nan punyo talingo jo rambuik nan panjang. Sado urang takajuik.

“Sia kau ko? Kami indak pernah mancaliak? Makhluk apo kau? Kau pasti makhluk jaek,” kecek saurang nan mudo.

“Kau indak buliah ado di siko. Kau harus disingkiaan dari kampuang ko,” sambuang nan lain. Katiko sado pemburu nio mambunuah padusi aneh itu, sakatiko tadanga suaro yang lantang dari Datuak Bandaro.

“Baranti!”

Kasado urang baranti.

“Apo nan kalian karajoan, ingek tujuan awak. Padusi ko indak babuek apo-apo ka awak.”

Sado urang pai malanjuikan acara baburu babi tu. Datuak Bandaro dan Datuak Ambasa tetap tingga di sinan. Datuak Bandaro mancaliak padusi aneh itu katakuikan. Nyo mambaranian diri mandakekan padusi tu, sudah tu nyo sapo.

Sia namo kau? Baa kau ado di siko surang?” tanyo Datuak Bandaro.

Padusi tu hanyo diam manunjuakan rauik muko katakuikan.

“Tanang, jan takuik, kami indak ka malukoi, picayolah,” kecek Datuak Bandaro.

“A..a..mbo Puti Baliriang, ambo tingga dakek siko. Tadi ambo nio bajalan sabanta,” jawek Nyiak Puti Baliriang takuik.

“Kau jo sia di siko?”

“Ambo surang se di siko, lah sakian lamo ambo di siko, indak ado nan mangawanan,” jawek Nyiak Puti Baliriang. Datuak Ambasa mintak izin ka Datuak Bandaro untuak taruih mamimpin paburuan. Datuak Bandaro maizinkan dan inyo bapisah.

“Jiko kau nio, pailah ka kampuang ambo, di sinan kau bisa mancaliak urang banyak dan kau indak kesepian lai, tantu kau labiah sanang daripado kini,” kecek Datuak Bandaro.

Sasudah mandanga kato-kato dari Datuak Bandaro, Nyiak Puti Baliriang yang salama ko kasepian, manyatujui ajakan Datuak Bandaro. Tanpa mamikia harato, nyo pai jo Datuak Bandaro jo harapan bisa labiah sanang. Nyo barangkek baduo.

Di tangah jalan ka pulang, Datuak Bandaro suko mamparatian Nyiak Puti Baliriang. Kayaknyo Datuak Bandaro tapukau dek kecantikan nan dimiliki Nyiak Puti Baliriang. Nyo masih bujangan dan acok basobok jo banyak padusi, tapi alun pernah mancaliak keelokkan rupo gadih sarupo gadih nan bajalan di mukonyo ko. Datuak Bandaro mambukak carito.

“Nyiak Puti Baliriang, apa kau alah lamo tingga di tapi hutan?”

Nyiak Puti Balirirang manggelengan kapalo nan aratinyo indak.

“Oh baitu, beratri kau alun banyak tahu warga di kampung ko?”

Datuak Bandaro batanya baliak. Nyiak Puti Baliriang hanyo maangguk kapalo nan aratinyo iyo. Mancaliak parangai Nyiak Puti Baliriang nan takah itu, Datuak Bandaro tersenyum. Inyo tahu Nyiak Puti Baliriang masih maraso malu. Datuak Bandaro akhianyo diam manaruihan pajalanan ka kampuang tanpa ado carito lai antaro mareka. Mancaliak diam-diam takah itu, Nyiak Puti Balirirang maraso sangaik indak nyaman.

“Apo angku indak takuik jo ambo?” Nyiak Puti Baliriang batanyo ka Datuak Bandaro.

Sakatiko mareka baduo maantian langkah. Datuak Bandaro mancaliak Nyiak Puti Baliriang dan manjawek, “Takuik? Untuak apo amboi takuik ka angkau?”

“Ambo punyo talingo jo rambuik nan panjang. Apo angku indak takuik?” tanyo Nyiak Puti Baliriang. Datuak Bandaro galak dan manjawek.

“Ambo indak takuik, walaupun angkau punyo badan nan indak biaso. Ambo indak tau dari mano tampek kau, ambo indak takuik.”

“Tapi baa angku nio mambaok ambo ka kampuang angku?” Nyiak Puti Baliriang batanyo baliak.

“Ambo mambaok ke kampuang ambo karano ambo raso surang padusi indak elok tingga di tapi hutan surang, labiah elok tingga di kampuang ambo dan sasamo manusia alah sapatuiknyo ambo manolong” jawek Datuak Bandaro.

Satibo di kampung Datuak Bandaro tingga, padusi ko dikenalkan ka keluarga Datuak Bandaro.

“Datuak sia ko? Baa angku basamonyo?” tanyo kakak padusi Datuak Bandaro.

“Inyo Puti Baliriang, Ambo basobok di tapi hutan katiko baburu. Karano ambo ibo mancaliaknyo di sinan surang, ambo baok ka rumah awak. Ambo nio manolongnyo, Uni,” kato Datuak Bandaro manjalehan.

“Jadih, awak tarimo di siko, tapi ambo ado syaraik. Padusi ko buliah tingga di siko jiko inyo nio mamotong talingo jo rambuiknyo nan panjang tu,” sambuang kakak Datuak Bandaro.

Demi mandapekan kebahagiaan nan samparono, Nyiak Puti Baliriang mangorbanan talingo jo rambuiknyo nan panjang untuak dipotong. Sasudah talingo jo rambuiknyo dipotong, Nyiak Puti Baliriang nampak rancak jo anggun. Walau awalnyo kakak dari Datuak Bandaro indak manarimo Nyiak Puti Baliriang, namun sasudah manarimo syaraik dari kakak Datuak Bandaro, akhirnyo Nyiak Puti Baliriang ditarimo elok di sinan dan inyo hiduik bahagia.

Namun, sairing bajalannyo wakatu, warga desa mulai mampakecekan keadaan Nyiak Puti Baliriang nan tingga di rumah Datuak Bandaro nan indak punyo hubungan apo pun jo Datuak Bandaro. Demi maindari pitonah yang samakin laruik, keluarga Datuak Bandaro mambiak langkah.

“Datuak, banyak urang di lua nan mampakecekan angku jo Nyiak Puti Baliriang. Manuruik ambo, elok angku nikahi sajo inyo. Ambo takuik pitonah ko samakin gadang. Tantu mambahayoan ka Nyiak Puti Baliriang. Ambo ndak tahan kalau angku dihino orang, Datuak,” kecek salah surang keluarga Datuak Bandaro.

Karano Datuak Bandaro punyo raso cinta ka Nyiak Puti Baliriang, inyo pun manyatujui saran tu. Akhianyo Datuak Bandaro manikah jo Nyiak Puti Baliriang. Nyiak Puti Baliriang sangaik mancintoi suaminyo, mako hiduiklah jo bahagia mareka.

Di tangah kabahagiaan nan dirasoan Datuak Bandaro jo Nyiak Puti Baliriang, suatu ari Datuak Bandaro tibo-tibo sajo mananyoan ciek hal ka Nyiak Puti Baliriang, tanyo nan wakatu itu sempat ditanyoan Datuak Ambasa ka Datuak Bandaro.

“Puti Baliriang, apo ambo buliah batanyo ka angkau?” tanyo Datuak Bandaro.

“Buliah, Tuan, apo nan nio angku tanyoan?” jawek Nyiak Puti Baliriang.

“Salama ambo manikah jo angkau, baa ambo indak pernah mancaliak saudara angkau kamari?” tanyo Datuak Bandaro.

Nyiak Puti Baliriang pun tadiam dan manjawek, “Untuk apa Tuan mananyoan itu? Tuan indak ka pernah bisa mancaliak saudara ambo.”

“Baa baitu?”

“Tuan, salamo ko ambo menikah jo Tuan, ambo punyo satu hal nan alun pernah ambo caritoan. Tuan, Tuan indak ka bisa mancaliak saudara ambo. Ambo bukan golongan manusia. Ambo berasal dari golongan sibunian. Selain dari golongan ambo, manusia kayak Tuan indak ka bisa mancaliak saudara ambo,” jawek Nyiak Puti Baliriang.

“Tapi baa ambo bisa mancaliak kau, indak ambo sajo, urang kampuang bisa mancaliak angkau?” tanyo Datuak Bandaro.

“Karena ambo alah mamutuihan untuak manjadi manusia, manusia bisa mancaliak ambo. Di alam ambo, golongan sarupo ambo mampacayoi jiko ambo manikahi manusia, ambo ka hiduik bahagia, baumua panjang,” jaleh Nyiak Puti Baliriang.

Paralu dikatahui, sibunian di Minangkabau dipacayo sebagai makhluk halus nan manyarupoi dewa nan tingga di tapi hutan maupun di dalam hutan. Arati dewa di siko iolah sosok makhluk haluih nan manyarupoi wanita nan paliang rancak. Namun, masyarakaik mampacayoi pulo baso sibunian itu ada nan jaek ka manusia dan maambiak manusia manjadi kawannyo. Mareka mambaok manusia ka dalam hutan tampek mereka tingga, lalu indak pernah baliak.

Datuak Bandaro sangaik takajuik mandanga carito Nyiak Puti Baliriang.

“Jiko Tuan nio mancaliak asa-usul ambo, bisuak kito pai ka hutan dima Tuan manamukan ambo. Ambo nio mancaliakan sasuatu ka Tuan, suami ambo,” kecek Nyiak Puti Baliriang.

Bisuak arinyo, Nyiak Puti Baliriang jo Datuak Bandaro pai ka hutan dima Datuak Bandaro manamuan Nyiak Puti Baliriang. Indak jauh dari tampek Datuak Bandaro manamuan Nyiak Puti Baliriang.

“Iko rumah ambo, di siko ambo tingga surang sabalun Tuan ado di kehidupan ambo,” jawek Nyiak Puti Baliriang.

Datuak Bandaro dan Nyiak Puti Baliriang pun pai bajalan-jalan mancaliak sado nan ado di dalam rumah. Sakatiko Datuak Bandaro pun baranti.

“Puti Baliriang, bab jiko pernikahan saudara ambo bisuak dilaksanakan di siko? Apo kau maizinan, istriku?” tanyo Datuak Bandaro.

“Suamiku, keluarga angku sangaik elok ka ambo, baa ambo bisa manulak permintaan Tuan. Tantu ambo maizinan, Suamiku,” jawek Nyiak Puti Bandaro.

Bara bulan sudah tu, saudaro dari Datuak Bandaro nio menikah. Nyiak Puti Baliriang maminta Datuak Bandaro untuak manyampaian niek eloknyo untuak maminjaman rumah untuak pernikahan tu. Saudara Datuak Bandaro pai ka hutan basamo Datuak Bandaro untuak mancaliak keadaan rumah tu. Satibo di sinan saudara Datuak Bandaro takajuik jo keindahan rumah bak istano tu. Tanpa pikia panjang, inyo manarimo tawaran elok dari Datuak Bandaro untuak malaksanaan pesta pernikahan di sinan.

Sasudah persiapan yang cukuik lamo, acara pesta pernikahan atau baralek ko dilaksanakan. Pesta pernikahan ko dilaksanakan sacaro mewah dan sangaik meriah. Di tangah kemeriahan pesta tu, tampak Nyiak Puti Baliriang duduk surang jo rauik muko nan sadiah.

“Istriku, sedang apo di siko?” tanyo Datuak Bandaro sambia mandakekan bininyo.

“Ambo binguang, Suamiku. Sasudah acara pernikahan ko, sia nan ka manjago harato-harato ambo di siko? Ambo indak punyo saudara nan membutuhkan iko,” jawek Nyiak Puti Baliriang sadiah.

“Tananglah, istriku, rumah jo sado harata angkau ko bisa awak manfaatkan untuak pernikahan saudara nan lain,” jawek Datuak Bandaro.

Nyiak Puti Baliriang pun tadiam. Sahari sasudah pernikahan selesai, masih banyak peralatan pernikahan nan alun dibarasiahan, Datuak Bandaro mangumpuaan sado saudaranyo untuak bamusyawarah mangenai rumah Nyiak Puti Baliriang tu di sebuah ruangan yang dikhususkan untuak bamusyawarah. Datuak Bandarao langsuang manyampaian tujuannyo. Sasudah manyampaian tujuannyo, banyak pandapek nan disampaikan dek saudara-saudara Datuak Bandaro. Salah satunyo ialah pandapek dari sepupunyo.

“Datuak, baa jiko harato jo rumah ko kita bagikan sajo, atau baa jiko rumah ko kito jua dan hasilnyo kito bagi basama.”

Pandapek iko manimbuaan banyak pro jo kontra.

Tajadi padebatan nan sangaik hebat pado musyawarah tu. Keserakahan alah mambutoan mato mareka.

“Ambo indak setuju jo itu, harato iko saeloknyo disimpan sajo di siko, iko bisa dijadian sebagai harato turun-temurun kito,” kecek saudara Datuak Bandaro.

“Indak! Harato ko harus tetap dibagian karano Datuak adolah mamak kito. Kito harus mandapekan harato iko,” kecek kamanakan Datuak Bandaro. Padebatan makin angek.

“Diam sadonyo!” hentak Datuak Bandaro.

“Indak, Datuak, kito indak bisa diam dalam hal iko,” kecek sepupu Datuak Bandaro jo emosi.

Mancaliak padebatan nan indak pantas tu, Nyiak Puti Baliriang pun maambiak tindakan nan sangat mangejutkan.

“Tanang sadonyo, ambo hanya nio harato ko dijago, indak diambiak. Manga kalian bacakak karano harato?” kato Nyiak Puti Baliriang sambia manangih.

Sakatiko bunyi guruah tadanga. Sado urang nan ado di sinan takajuik jo maraso ketakutan. Mareka balari ka lua, kecuali Nyiak Puti Baliriang.

Badoalah Nyiak Puti Baliriang, “Ya Allah, ambo indak nio harata ambo manjadi masalah dek urang-urang nan alah manarimo ambo. Ambo basumpah hari ko, rumah ko sarato isinyo ka manjadi batu. Barang sia nan marusaknyo ka maalami penderitaan, bahkan kematian!”

Guruah pun samakin kareh tadanga. Sakatiko rumah sarato isinyo barubah manjadi batu manyarupoi sabuah goa. Jo rauik wajah nan sadiah, Nyiak Puti Baliriang pai ka lua menghampiri Datuak Bandaro. Inyo manangih mamaluak Datuak Bandaro. Datuak Bandaro nan sangaik mencintai istrinyo maajak istrinyo pulang ka rumah. Indak lamo sasudah kajadian itu, Nyiak Puti Baliriang acok sakik-sakik dan akhirnyo pado umua labiah dari satu abaik, inyo maningga dan dikubuaan di Padang Tarok, Nagari Tambangan.

Sampai saat iko, goa tu diagiah namo jo “Goa Inyiak Puti Baliriang.” Goa tu masih ado walau kurang tauruih. Banyak urang mangecekan ado beberapa hal nan harus diparatian jiko nio masuak ka sinan. Patamo, pengunjung harus badoa sabalun masuak goa. Kaduo, salamo di dalam goa, awak harus manjago sikap, indak buliah bakato buruak dan harus baniek elok. Katigo, salamo ko dalam goa awak indak buliah marusak barang-barang nan ado di dalamnyo. Konon katonyo, urang-urang nan alah masuak ka dalam goa, di dalam goa tu ado sabuah kolam jo aia tajun jo peralatan-peralatan rumah sarupo piriang, kuali, kasua, bahkan baju pengantin nan alah manjadi batu. Barang-barang itu nan indak buliah dirusak. Jiko dirusak, bisa mambuek urang nan marusaknyo mangalami kecelakaan bahkan indak tahu jalan ka lua.

Namun, goa nan basejarah dan unik ko alun banyak diketahui urang, khususnyo Sumatera Barat. Jiko goa tu dirawat elok-elok, akses jalan manuju goa dipelokan, indak tatutuik kemungkinan goa ko bisa manjadi tampek wisata di Tanah Datar.

Dari carito ko, dapek awak ambiak hikmah baso harato dapek mambuek hubungan persaudaraan manjadi rusak. Untuk maatasi hal itu, pado zaman kini, marilah kito jalin silaturahmi di antaro kito elok-elok dan jan jadian harato sagalonyo di dunia ko. Wassalam.