Agam— Suatu kajadian nan patuik mandapek perhatian di Palupuah, Kabupaten Agam. Sabanyok 237 urang murid jo guru dikabakan maalami sakit sasudah makan Makan Bagizi Gratis (MBG) nan dibagikan pado hari Selasa, 1 September 2026.
Murid jo guru nan makan makanan tu, sabagian baselang waktu mangalami mual, sakik paruik, pusiang, dan gangguan kesehatan lainnyo. Sabagian dari mereka dibao ka rumah sakit dan fasilitas kesehatan untuak mandapekkan pertolongan.
Kajadian ko tentu manimbuakan tanyo di tangah masyarakat: apokah makanan nan dimakan anak-anak sekolah itu memang alah aman, atau ado bahan nan mangandung bahayo bagi kesehatan?
Jawaban ateh tanyo itu sampai kini balun dapek dipastikan. Sampel makanan nan dibagikan sadang dipereso di laboratorium, sedangkan dapua Satuan Pelayanan Pemenuhan Gizi (SPPG) Palupuah juo dipereso untuak mancarikan panyebab nan sabananyo.
Dapua SPPG Dihantikan
Manghadapi kajadian tu, Gubernur Sumatera Barat Mahyeldi Ansharullah mamintak agar kegiatan dapua SPPG Palupuah dihantikan dahulu untuak samantaro waktu.
Panghantian ko, manuruik Gubernur, bukanlah untuak mancari sia nan salah, tetapi untuak manjago jan sampai anak-anak nan harusnyo mandapek makanan nan bagizi malah mandapek gangguan kesehatan.
“Demi keamanan, operasional dapua SPPG kito hantikan samantaro. Amankan dan pareso seluruh prosesnyo, termasuk sampel makanan. Setelah hasia pemeriksaan kalua dan dipastikan indak ado pelanggaran atau persoalan nan mambahayokan, baru operasional dapek dilanjutkan,” kato Mahyeldi sasudah menghadiri suatu acara di Universitas Negeri Padang (UNP), Kamih (3/9/2026).
Gubernur manambahkan, pemeriksaan harus dilakukan sacaro teliti dan objektif. Dinas Kesehatan jo Badan Pengawas Obat dan Makanan (BPOM), basamo instansi nan barhubungan, diminta maneliti makanan dan proses pangolahannyo.
Kajadian di Palupuah ko manjadi peringatan nan cukuik kareh bagi panguruih dapua MBG di Sumatera Barat.
Program MBG, nan dimukasuikan untuak manambah gizi anak-anak sekolah, tentu indaklah cukuik kalau makanan nan dibagikan hanyo dicaliak dari banyaknyo atau kandungan gizinyo. Kabarasiahan, kesegaran bahan, caro mamasak, panyimpanan, sampai makanan itu sampai ka tangan murid, sadonyo musti mandapek perhatian.
Mahyeldi pun mamintak seluruh pangelola dapua SPPG di Sumbar maningkekan pangawasan terhadap kebarasiahan dan pangolahan makanan, termasuk dalam pambagian dan pangiriman makanan ka sekolah-sekolah.
“Iko manjadi evaluasi serius bagi seluruh pengelola dapua MBG. Ijan sampai program yang bertujuan mulia untuak memenuhi kebutuhan gizi anak-anak justru menimbulkan persoalan kesehatan. Keamanan dan kualitas makanan harus menjadi prioritas utama,” keceknyo.
Samantaro tu, Kepala SPPG Palupuah Wahyu Saputra manarangkan, makanan nan dibagikan pado Selasa (1/9/2026) itu barisi talua puyuah dan sayuran, yakni timun, tomat, jo salada.
Manuruik keterangannyo, pado waktu makanan dibagikan indak ado laporan dari murid ataupun guru nan mangaku sakit. Pihak SPPG baru mandapek kaba tentang adanyo gangguan kesehatan pado hari barikuiknyo.
“Kami juo takajuik dengan kejadian ko. Saat pembagian MBG indak ado laporan keluhan atau dugaan keracunan. Kami kini berkoordinasi jo pihak terkait dan manunggu hasia pemeriksaan laboratorium terhadap sampel makanan,” katonyo.
Dari pihak lain, Koordinator Wilayah Program MBG Kabupaten Agam, Aryo, manyabuikkan bahwa pihaknyo masih mangumpuakkan keterangan dari barbagai pihak untuak manetapkan baa bana duduk kajadian dan apo sabananyo panyabab murik jo guru mangalami gangguan kesehatan.
Koordinasi juo dilakukan jo Badan Gizi Nasional (BGN) dan KPPG nan barhubungan jo program tu.
Hasia Laboratorium Ditunggu
Sampai pado keterangan terakhir, murik jo guru nan sabalunnyo dirawat di barapo tampek pangobatan alah dibuliahkan pulang ka rumah masing-masing.
Pemerintah Provinsi Sumatera Barat masih mamantau keadaan mereka sambia manunggu hasia pemeriksaan makanan.
Hasia pemeriksaan laboratorium nantinyo akan manjadi kunci untuak manjawab tanyo nan kini ado di tangah masyarakat: apokah gangguan kesehatan tu memang disababkan makanan MBG nan dimakan, dan apokah ado bahan atau zat tertentu nan mambahayokan di dalam makanan tu.
Sabab, sebelum hasia pemeriksaan kalua, tuduhan bahwa makanan MBG mangandung bahan nan mambahayokan masih barado dalam taraf dugaan.
Namun satu hal alah manjadi jaleh: makanan untuak anak-anak haruslah aman, barasiah, bagizi, dan indak buliah manganduang bahan nan dapek mambahayokan kesehatan.
Kajadian di Palupuah ko diharokan indak sampai barulang di dapua-dapua MBG lainnyo. Program nan dimaksudkan untuak manyehatkan anak bangsa ijan sampai malah manjadi sumber panyakik.(Tan Parpatiah)
