Padang — Samantaro awak di Sumatera Barat masih sibuk soal ‘akan ka akan juo’ manyiapkan hilirisasi gambia, di India urang alah mambuek kaputusan: pajak impor gambia dinaikkan manjadi 15 persen.
Kabijakan India ko dipastikan akan bapagaruah ka harago gambia nan diimpor dek pedagang atau importir India dari Indonesia, khususnyo dari Sumatera Barat nan salamo ko manjadi salah satu sentra produksi gambia tarpenting di Indonesia.
Di tangah kondisi tu, kalangan eksportir gambia Sumbar mulai cameh. Kenaikan pajak impor India manjadi 15 persen dinilai alah mulai mambarikan dampak ka perdagangan gambia asa Sumatera Barat. India salamo ko memang manjadi tujuan utamo ekspor gambia Sumbar.
Eksportir gambia asa Sumbar nan juo Direktur Utamo PT Salimbado Jaya Indonesia, Sepdi Tito, sabagaimano dikutip dari Bisnis.com, manyabuikkan, kenaikan pajak impor di India alah manyababkan sabagian perusahaan nan salamo ko manjadi panampung gambia asa Sumbar baranti bausaho.
Kondisi tu, manuruik Tito, mambuek jumlah perusahaan di India nan masih amuah manarimo gambia dari Sumbar bakurang sacaro tajam.
“Ambo alah badiskusi jo beberapo eksportir gambia lainnyo nan samo-sama manyikapi kondisi ko. Kami khawatir, lamo-lamo pangsa pasa gambia di India bisa hilang. Kalau itu tajadi, komoditas gambia di Sumbar indak bisa diekspor lai ka India,” keceknyo, Rabaa patang ko (26/8/2026).
Tito manyabuikkan, pado awalnyo ado puluhan perusahaan di India nan manampuang gambia asa Sumbar. Namun, sasudah pemerintah India menaikkan pajak impor, perusahaan nan masih batahan dipakirokan tingga sakitar ampek perusahaan.
Katonyo, kalau kabijakan tu indak barubah, gambia Sumbar bisa sewaktu-waktu kehilangan pasa utamonyo. Padahal, produksi gambia di Sumbar, di antaronyo di Kabupaten Lima Puluh Kota jo Pesisir Selatan, taruih bakambang.
Cameh Pasa Utamo Hilang
Tito baharok bana pemerintah Indonesia bisa mancari langkah strategis untuak manjamin pasa gambia Sumbar di India tetap batahan.
Manuruiknyo, persoalan ko indak hanyo manyangkuik kapantingan eksportir, tapi juo manyangkuik nasib petani gambia di Sumbar.
“Kami mancaliak kabijakan pemerintah India menaikkan pajak impor ko alah mambarikan dampak ka komoditas gambia. Semenjak ado pihak peneliti Universitas Andalas (Unand) nan manyabuikkan potensi nilai gambia di Sumbar sabanyak Rp5.000 triliun, ambo manduga hasil hitung-hitungan dari Unand tu turut mampangaruhi pemerintah India,” keceknyo.
Gambia nan sadang babungo, sabanta lai di panen daunnyo
Nyo mamintak pemerintah mancermati kondisi ko supayo gambia Sumbar indak kehilangan pasa nan salamo ko manjadi tumpuan utamo.
“Ekspor gambia Sumbar ko hanyo ka India, nan gadang di sinan,” kato Tito.
Ia baharok pemerintah India bisa mambarikan kabijakan khusus untuak komoditas gambia asa Sumbar. Salah satu caronyo, manurunkan tarif pajak impor gambia dibandingkan komoditas lain nan kini dikenai pajak 15 persen.
Manuruik Tito, upayo mampertahankan pasa India sangat penting, sabab manyangkuik panghidupan petani gambia di Sumbar nan jumlahnyo mancapai ratusan urang.
Hilirisasi sambia Mancaliak Pasa
Di sisi lain, Tito juo manyoroti data tantang potensi ekonomi gambia nan dinilai talalu gadang kalau indak disaratoi jo parhitungan tantang kemampuan pasa manyerap produk.
Manuruiknyo, kemampuan mamproduksi produk turunan gambia indak otomatis bararti ado pasa nan sanggup manarimonyo dalam jumlah nan samo.
“Jadi, kemampuan mambuek produk turunan indak otomatis bararti produk tu punyo pambali. Hal ko paralu dipahami juo,” keceknyo.
Tito manegaskan, inyo mandukung upayo hilirisasi gambia di Sumbar. Namun, hilirisasi, manuruiknyo, harus dimulai dari pasa, bukan sakadar dari kemampuan mamproduksi.
“Ambo dukung hilirisasi. Tapi hilirisasi harus dimulai dari pasa, bukan samato-mato dari kemampuan mamproduksi,” keceknyo.
Dek karano itu, sabalun mambicarokan potensi ekonomi gambia sampai bartriliun-triliun rupiah, pemerintah dinilai paralu memastikan pasa nan alah ado tetap tajago, pasa baru taruih dibukak, dan satiok kabijakan hilirisasi handaknyo mambarikan nilai tambah untuak petani.
Potensi Nilai Tambah gambia Gadang
Sabalunnyoyo, peneliti Universitas Andalas (Unand), Muhammad Makky, mangungkapkan gadangnyo potensi ekonomi gambia Sumbar kalau komoditas ko indak lai hanyo dijua dalam bantuak bahan baku.
Badasarkan data nan disampaikannyo, potensi nilai perdagangan gambia Sumbar disabuik bisa mancapai Rp5.000 triliun satahun. Data tu juo manunjuakkan ado perbedaan nan sangaik gadang antaro harago gambia di tingkek petani jo nilai produk sasudah diolah.
Daun gambia segar, misalnyo, dihargoi sakitar Rp3.000 sabungkuih kilogram. Sasudah diolah manjadi gatah gambia, nilainyo bisa mancapai sakitar Rp30.000 sa kilo.
Nilai tambah akan jauh labiah gadang kalau gambia diolah manjadi produk turunan. Dari 100 kilogram daun gambia, tanin disabuik bisa punyo nilai sampai Rp9,6 juta, katekin sakitar Rp4,5 juta, sadangkan marker API mancapai sakitar Rp9,6 juta.
Makky manyabuikkan, data tu diharapkan bisa manjadi salah satu acuan dek pemerintah untuak mangambangkan pasa gambia Indonesia, supayo indak taruih bagantuang pado India.
Manuruiknyo, pangambangan produk turunan bisa mambukak peluang pasa ka barbagai negara sekaligus mambari nilai tambah nan labiah gadang kapado petani.
“Alah baratus tahun kondisi harago gambia di Sumbar ko indak ado perkembangan nan berarti, masih juo manjua dalam bentuk gatah. Apo Sumbar akan macam ko taruih? Kalau dalam perdagangan global hanyo bagantuang pado satu pasa, risikonya cukuik gadang kalau diliek dari sisi politik dunia,” keceknyo.
Makky juo manyoroti perkembangan harago gambia nan ditarimo petani. Manuruiknyo, harago gambia di tingkat petani dari tahun ka tahun cenderuang turun. Dari nan dulu pernah barado di sakitar Rp100 ribu per kilogram, turun manjadi Rp75 ribu, turun lai manjadi Rp50 ribu, dan kini barado di kisaran Rp20 ribu per kilogram.
Kondisi ko, kato Makky, indak elok dibiakan begitu sajo sabab akan langsung baangaruah ka perekonomian petani gambia.
Dek karano itu, pemerintah dinilai paralu hadir labiah kuat dalam pangambangan perdagangan gambia, tarutamo dalam mendorong pangolahan bahan baku manjadi produk nan punyo nilai tambah.
Indonesia Kuasoi pasa gambia Dunia
Indonesia manjadi salah satu negara utamo penghasil sekaligus eksportir gambia (Uncaria gambia Roxb.) di dunia. Komoditas ko punyo pasa ekspor di barbagai negara, jo India sabagai salah satu tujuan tarbesar. Sasudah tu ado Jepang, China, Pakistan, Bangladesh, sampai ka sabagian negara di Eropa.
Indonesia disabuik mangusoi sakitar 80 persen pasa gambia dunia. Di India, pangsa pasa gambia Indonesia mancapai sakitar 50 persen. Pado 2022, nilai ekspor gambia Indonesia dicatat sakitar US$90 juta, jo harago ekspor barado antaro US$7.500 sampai US$10.000 per ton.
Gadangnyo potensi ko manjadi peluang bagi Indonesia untuak taruih maningkatkan pasokan gambia ka pasa dunia, tarutamo untuak mamanuhi kebutuhan industri farmasi, panyamak kulit, makanan, kosmetik, jo pangobatan tradisional.
Data Kementerian Koperasi dan UKM juo manunjuakkan gambia manjadi salah satu komoditas pertanian nan punyo banyak manfaat, sahinggo permintaannyo diperkirakan akan taruih bakambang. “Gambia adalah salah satu komoditas pertanian nan punyo banyak manfaat untuak industri jo kesehatan, sahinggo sangat dibutuhkan dan dicari dek pasa dunia,” kato Destry, pejabat di Kementerian Koperasi dan UKM.
Koperasi Bisa Jadi Motor Hilirisasi
Sumatera Barat manjadi daerah utamo penghasil gambia di Indonesia. Kondisi geografis jo iklim nan mandukung mambuek gambia manjadi salah satu komoditas perkebunan nan penting bagi perekonomian masyarakat di daerah ko.
Untuak maningkekan nilai tambah jo daya saiang gambia, koperasi dinilai bisa mamainkan peranan penting, mulai dari manguaik kan budidaya, maningkekkan mutu produk, pangolahan, sampai pemasaran.
Salah satu contohnyo ado di Koperasi Serba Usaha (KSU) Bangkit Mandiri di Kabupaten Pesisir Selatan. Koperasi nan barado di Kampuang Ampalu, Nagari Ganting Mudiak Selatan, Kecamatan Sutera, ko punyo 83 anggota aktif.
Koperasi ko manjadi wadah bagi petani untuak bakarajo samo dalam budidaya, sakaligus manjadi pusat palatihan, maningkatkan mutu pangolahan, jo mamasarkan gambia.
Badasarkan data 2024, KSU Bangkit Mandiri alah mamakai teknik pangolahan gambia jo kadar katekin sampai 90 persen. Peningkatan mutu ko dilakuan supayo produk bisa mamanuhi standar kebutuhan industri.
KSU Bangkit Mandiri mamproduksi ampek kelas gambia, yakni gambia bootch A jo kadar katekin 90 persen, bootch B 70–80 persen, bootch C 60–70 persen, dan bootch D 40–50 persen.
Kapasitas produksinyo masing-masing sakitar 2 ton saminggu untuak bootch A, 2 ton saminggu untuak bootch B, 3 ton saminggu untuak bootch C, dan 5–10 ton saminggu untuak bootch D.
Produk KSU Bangkit Mandiri dipasakan untuak kebutuhan ekspor ka India jo Jepang melalui kamitraan jo sabarapo perusahaan pangolahan gambia di Sumatera Barat. (Tan Parpatiah)
