Oleh: Indra Utama (Pemerhati Budaya)
Pado maso dahulu, Padangpanjang diramikan dek bunyi-bunyi musik nan manjadi bagian dari kehidupan masyarakat.
Indra Utama
Salah satu diantaronyo adolah musik gamad. Bunyi biola, akordeon, gitar jo gendang basatu padu jo suara penyanyi nan mandendangkan lagu-lagu Gamad. Musik iko indaklah samo jo musik nan hanyo didanga dari jauah. Gamad hadir di tangah urang nan bakumpua, basuo jo sanak saudaro, bacarito, makan basamo, baralek, sampai marayokan barbagai paristiwa dalam kehidupan.
Kini, bunyi Gamad makin jarang tadanga. Bahkan bagi generasi mudo, Gamad mungkin alah mulai tingga namo, nan sasekali didanga dari carito urang tuo.
Lalu, kama hilangnyo musik Gamad di Padangpanjang?
Pertanyaan ko bukanlah samato masalah musik. Di dalamnyo ado carito nan labiah panjang, yaitu tantang baa suatu budaya nan dulu hiduik dalam keseharian masyarakaik, tapi kahilangan ruangnyo, di tangah masyarakatnyo nan taruih barubah.
Taun 2021, Fadhila Ramadhani dari Institut Seni Indonesia Padangpanjang malakukan penelitian bajudul ‘Perkembangan Lagu Gamad di Kota Padangpanjang’.
Penelitian iko manjadi salah satu catatan tantang perjalanan musik Gamad di kota ko.
Fadhila mancatat, Gamad pernah manjalani maso kajayaannyo, tarutamo pado sekitar tahun 1970-an. Dalam perkembangannyo, dikenal pulo Gamad Tanah Hitam. Namun, lambek laun popularitasnyo manurun. Jumlah pamain makin kurang, regenerasi mulai manjadi persoalan, samantaro parubahan teknologi jo salero musik masyarakat sato lo mambari pangaruh ka makin maredupnyo Gamad di Padangpanjang.
Penelitian ko penting bukan samato-mato untuak mangulang kajian akademik tantang Gamad. Labiah dari itu, penelitian tu tu manjadi tando baso persoalan mulai kurangnyo pamain jo regenerasi alah pernah dicatat babarapo tahun nan lalu.
Nan dahulu baru manjadi kakhawatiran, kini makin taraso. Bunyi Gamad nan pernah maisi ruang-ruang publik Padangpanjang, kini hampia indak tadanga lai.
Padahal, Gamad punyo sajarah nan panjang dalam kehidupan masyarakat kota Serambi Makkah ko.
Tanah Hitam dan Gamad
Salah satu kawasan nan punyo hubungan rapek jo kehidupan Gamad adolah Tanah Hitam, kampuang nan barado di kaki Bukik Tui.
Di sinan, musik Gamad pernah dipaliaro dek keluarga Yul Tu-Um. Indaklah heran wak, sabagian penyanyi Gamad nan dikenal di Padangpanjang barasa dari Tanah Hitam.
Karano itu, Tanah Hitam bukan hanyo namo suatu kampuang. Nyo pernah manjadi salah satu ruang sosial tampek Gamad tumbuah, bakambang, dan dipaliaro dari satu generasi ka generasi.
Di antaro namo nan patuik dikenang dalam perjalanan musik Gamad di Padangpanjang ado Akhjar Adam. Inyo adalah pamain akordeon nan tunanetra. Keterbatasan pandangan indak manjadi panghalang bagi inyo untuak basatu dalam kehidupan musik Gamad.
Akhjar Adam mamainkan akordeon dan sato mahiduikan suasana tatkalo Gamad tampil di tangah masyarakat.
Carito Akhjar Adam sabananyo mambari palajaran nan cukuik dalam. Musik pado maso itu punyo ruang nan lapang bagi sia sajo nan punyo kamampuan jo kacintaan ka musik.
Musik manjadi tampek barundiang, tampek maungkapkan diri, sekaligus tampek babagi dalam kehidupan sosial. Sia pun indak mesti datang dari lingkungan nan sarba sempurna untuak dapek manjadi bagian dari kelompok musik.
Kini, mungkin indak banyak generasi mudo nan masih tahu jo namo Akhjar Adam. Namun, justru urang-urang sarupo iko nan mambantuak sajarah ketek musik Gamad di Padangpanjang.
Mereka mungkin indak tasurek dalam sajarah musik nasional, tetapi pernah manjadi bagian nan penting dari kehidupan budaya masyarakaik Padangpanjang.
Jajak nan Tingga
Jajak Gamad kemudian basambuang sampai ka maso nan labiah dakek jo kito. Kelompok nan terakhir dikatahui masih mamainkan Gamad di Padangpanjang adolah Group Senandung Malam, nan juo dipimpin dek Yul Tu-Um.
Di dalam kelompok ko ado Rizaldi, Daih, Mak Etek Ir, Pak Datuak, Burmani, Yul Tu-Um, Pak Burhanuddin, Epi, Ad, Melli jo Toni.
Kiro-kiro sapuluah tahun nan lalu, Group Senandung Malam pernah tampil dalam suatu acara tatkalo para perantau Padangpanjang pulang bakumpua di kampuang halaman. Mereka tampil di lapangan di muko Secata.
Banyak penyanyi nan ikut dalam pertunjukan tu tu barasa dari Tanah Hitam.
Mungkin pado maso tu, indak banyak urang nan manyadari baso nan ditontonnyo sabananyo adalah salah satu jajak nan mulai manuju ka ujung perjalanan Gamad di Padangpanjang.
Kini, Group Senandung Malam indak pernah tampil lai.
Duo urang nan pernah manjadi bagian penting dalam kelompok tu, Yul Tu-Um jo Pak Burhanuddin, alah maningga dunia. Nan lainnyo pun indak lai tampil dalam suatu kelompok Gamad nan aktif.
Di siko kito mulai maraso, baso hilangnyo suatu musik bukanlah hanyo kehilangan bunyi-bunyian.
Nan hilang lambek-laun adolah urang nan mamainkannyo, carito di baliak lagu, caro mamainkan alat musik, lagu-lagu nan mereka hafal, sampai suasana sosial nan dahulu mambuek musik ko dibutuhkan.
Bukan Hanyo Kehilangan Bunyi
Karano itu, tatkalo kito mangatokan Gamad alah indak tadanga lai di Padangpanjang, sabananyo kito sadang mambicarokan hilangnyo suatu ruang kabudayaan.
Dahulu, ruang itu ado sacaro alamiah. Ado baralek. Ado alek masyarakat. Ado acara keluarga. Ado pertemuan. Ado urang bakumpua. Dan di tangah suasana itu, ado kelompok Gamad nan siap mamainkan musiknyo.
Urang nan datang pun indak maraso sadang menghadiri suatu pertunjukan seni nan resmi. Mereka datang untuak basuo, basilaturahmi, makan, bacarito, dan basuko cita. Musik manjadi bagian dari kehidupan, bukan sesuatu nan dipasangkan jauah di lua kehidupan.
Namun, zaman barubah. Orgen tunggal, band, rekaman musik, televisi, internet, dan baragam teknologi baru alah maubah caro masyarakat mancari jo manikmati hiburan.
Salero generasi mudo pun sato barubah. Musik makin gampng didapek, pilihan makin banyak, dan hiburan makin baragam.
Dalam suatu alek, urang indak lai paralu mandatangkan kelompok musik nan banyak pamainnyo untuak maiduikan suasana.
Parubahan ko tantu bukanlah sesuatu nan salah. Sabab, kabudayaan memang indaklah diam. Kabudayaan taruih bajalan manuruik zaman.
Namun, satiok parubahan punyo akibat. Tatkalo hiburan nan baru makin kuaik mandominasi, musik nan dahulu hiduik di tangah masyarakat lambek-laun kehilangan ruang. Gamad pun indak luput dari parubahan ko.
Nan menarik, babarapo tahun nan lalu pernah ado usaho dari sakumpulan anak mudo Padangpanjang untuak maiduikan baliak musik Gamad.
Mereka mancubo mangumbalikan musik nan dahulu pernah manjadi bagian dari kehidupan kota iko.
Namun, usaho ko ko tampaknyo lun mandapek sambutan nan cukuik banyak.
Di sikolah tantangan nan sabananyo. Apokah Gamad akan dibiakan hilang basamo waktu, atau masih adokah jalan untuak manumbuhkan baliak musik nan pernah manjadi bagian dari kehidupan urang Padangpanjang?
Jawabannyo tentu indaklah mudah. Nan jaleh, kalau kito masih ingin mancari bunyi Gamad di Padangpanjang, mungkin kito indak cukuik hanyo mancari pamainnyo. Kito juo musti mancari baliak ruang sosial nan dahulu mambuek musik ko ko hiduik.
Sebab, musik indak akan hiduik kalau hanyo disimpan dalam catatan. Musik akan hiduik kalau ado nan mamainkan, ado nan mandanga, ado nan manyukoi, dan ado masyarakat nan manarimo keberadaannyo.
Gamad adalah bagian dari ingatan Padangpanjang. Kalau bunyinyo alah jarang tadanga, indak berarti caritonyo mesti habih. Barangkali, nan paralu kito lakukan kini bukanlah maratoki bunyi nan alah hilang, tapi mancari jalan supayo bunyi tu dapek didanga baliak.
Sabab, suatu kota bukan hanyo dibangun dek jalan, rumah, geduang, dan pasa. Kota juo dibangun dek ingatan, carito, seni, dan bunyi-bunyi nan pernah maisi kehidupan urangnyo.
Dan mungkin, di suatu suduik Padangpanjang, masih ado urang nan ingek baa bunyi biola, akordeon, gitar jo gendang basatu padu, lalu suara penyanyi mangalunkan lagu Gamad.
Sanak suko Lahu Duo, atau Kaparinyo?
