Padang — Dari data di OJK tanyato anak sikola di Sumbar ko lah punyo tabuangan di bank sabanyak Rp260 miliar labiah.
Tabuangan tu tasimpan dalam sistem simpanan pelajar malalui Program KEJAR nan tarangkum dalam sakitar 1,48 juta rekening palajar.
Gubernur Sumatera Barat Mahyeldi mandorong pemerintah daerah jo sekolah-sekolah supayo labiah gencar manjalankan Program Satu Rekening Satu Pelajar (KEJAR) tu.
Manuruiknyo, budaya manabung sajak ketek penting untuak mambantu generasi mudo mambangun kabiasaan mangatur kauangan sacaro bijak, sekaligus manunjang upaya maningkatkan kesejahteraan masyarakat.
Mahyeldi manyabuik, kabiasaan manabung dapek mambantu masyarakat manjauhi parilaku konsumtif dan mangalokasikan pitih untuak kaparaluan nan labiah produktif.
“Manabung adalah caro untuak manjauhi kabiasaan konsumtif. Pitih nan disimpan diprioritaskan untuak mambiayai kaparaluan nan basifat produktif. Karano itu, budaya manabung haruih ditarapkan sajak dini,” kato Mahyeldi kutiko mambukak puncak paringatan Hari Indonesia Manabung nan diadokan dek Otoritas Jasa Keuangan (OJK) Sumatera Barat di Gedung Pertemuan UPI, Padang, Kamih (20/8/2026).
Inyo manilai, pangajaran mangatur kauangan kapado palajar indak hanyo basangkutan jo kabiasaan manyisihkan pitih, tapi juo mambangun sikap disiplin jo batangguang jawab dalam mamakai pitih.
Karano itu, Mahyeldi maminta pemerintah kabupaten jo kota basamo sakola taruih mamantau pelaksanaan Program KEJAR, supayo makin banyak palajar nan punyo rekening tabungan.
Samantaro tu Kepala OJK Sumatera Barat Roni Nazra mangatokan, capaian Rp260 miliar labiah tu manunjukkan minat palajar di Sumbar cukuik tinggi dalam mambangun kabiasaan manabuang sajak ketek.
“Capaian ko manjadi salah satu indikator positif dalam mendorong literasi jo inklusi kauangan di kalangan palajar. Program KEJAR juo manjadi sarana untuak mamasyrakatkan caro mangatur kauangan sacaro bijak kapado generasi mudo,” kato inyo.
Manuruik Roni, budaya manabuang di kalangan palajar marupoka bagian dari implementasi Hari Indonesia Manabuang nan ditetapkan malalui Keputusan Presiden Nomor 26 Tahun 2019.
OJK kemudian mendorong pelaksanaannyo malalui Program KEJAR, jo tujuan supayo satiok palajar punyo rekening simpanan.
500 Palajar
Puncak paringatan Hari Indonesia Manabung di Kota Padang diikuti dek sakitar 500 palajar dari baragam sikola.
Kegiatan ti diisi jo baragam agenda edukasi untuak maningkekan pamahaman palajar tantang pentingnyo manabuang dan maatur kauangan sacaro bijak sajak ketek.
Di sampiang edukasi, OJK Sumbar juo maagiah panghargaan kapado babarapo lembaga jasa kauangan jo sikola nan dinilai barhasil mancatatkan kinerja nan baiak dalam manjalankan Program KEJAR.
Malalui panguatan Program KEJAR, pemerintah basamo OJK baharaoknbana budaya manabuang makin tumbuah di kalangan palajar. Dengan demikian, generasi mudo Sumatera Barat akan punyo kamampuan maatur kauangan sacaro sehat, disiplin, jo batangguang jawab.(Tan Parpatiah)
