Padang — Kasudahannyo Polisi nan manangani surang supir di Lubuak Buayo Padang lun lamo ko minta maaf ka masyarakat Sumatera Barat.
Bahkan WakaPolda Sumatera Barat Brigjen Pol Solihin sendiri nan manyampaikan pamintaan maaf kapado masyarakat ateh kajadian nan dipabuek dek anak buahnyo Kombespol Teddy Fanani kapado sopir nan banamo Bill Irzano (23).
Masalah nan manimbulkan perhatian masyarakat itu kasudahannyo disalasaikan sacaro basamo, sasudah kaduo pihak sapakaik manampuah jalan badamai.
Pamintaan maaf itu disampaikan Wakapolda Sumbar Brigjen Pol Solihin, didampingi dek Kabid Humas jo Kabid Propam Polda Sumbar, di ruang karajonyo, Sinayan (10/8/2026).
Solihin manyabuik, Polda Sumbar maharagoi langkah kaduo pihak nan alah mamiliah manyalasaikan masalah sacaro kekaluargaan.
Namun, manuruiknyo, kajadian itu tetap manjadi bahan evaluasi bagi kasado jajaran Polda Sumbar supayo satiok anggota mampu manahan emosi, mangendalikan diri, dan tatap profesional dalam barhadapan jo masyarakat.
“Kami jajaran Polda Sumbar mamohon maaf,” kato Solihin kapado wartawan.
Inyo manambahkan, pejabat utama Polda Sumbar sabagai pejabat publik harus mampu manjadi contoh nan baiak, indak sajo bagi anggota, tapi juo bagi masyarakat.
“Pejabat utama kami harus memberikan contoh,” ujarnyo.
Solihin manarangkan, masalah antaro Bill jo pihak kepolisian alah salasai sasudah kaduo pihak sapakaik badamai. Laporan Bill ka Bidang Propam Polda Sumbar juo alah dicabuik.
Walau masalah tu alah disalasaikan sacaro kekaluargaan, Solihin manegaskan bahwa kajadian itu tetap manjadi bahan evaluasi internal.
“Iko palajaran bagi kami, harus labiah bijaksani, tahan emosi, tahan perilaku,” keceknyo.
Saling Salip di Jalan
Kajadian tu mancogok ka maayarakaik malalui video nan manampakkan Bill Irzano basitangka jo surang urang di jalan. Caritonyo Bill manyalip oto Kombes Teddy ko dari kida.
Kajadian tu di kawasan Lubuk Buayo, Kecamatan Koto Tangah, Kota Padang, hari Jumaik (7/8/2026).
Dalam video nan sabana viral tu, Bill tampak batangka sasudah otonyo dihantikan dek pak polisi nan maraso taganggu lantaran dipotongbdari kida tu.
Diketahui, kendaraan nan disalip tu ditumpangi Direktur Reserse Kriminal Umum Polda Sumbar Kombes Pol Teddy Fanani.
Sasudah mahariak Bill, tangan pak Kombes lakek, dan bagian mukonyo sambok.
Tapi Bill nan lah minta maaf namun tetap kanai tangan, maraso diperlkukan ndak adil, mako inyo malapor ka Bidang Propam Polda Sumbar sasudah kajadian.
Namun pengakuan Kombes Teddy di Propam inyo ndak ado manangani Bill doh, hanya berang berang sajo dek otonyo ampia tasenggol.
Teddy Fanani manarangkan bahwa oto nan ditumpanginyo hampia tagesoh sasudah oto Bill manyalip dari sabalah kida.
Kajadian tu kamudian manjadi perhatian masyarakat sasudah rekaman videonyo viral di media sosial.
Kapolda Sumbar Irjen Pol Djati Wiyoto Abadhy juo manyampaikan pamintaan maaf ateh kajadian tersebut.
Djati manarangkan bahwa kaduo pihak alah sapakaik manyalasaikan masalah melalui jalan damai. Kasapakatan tu dicapai pada hari Akaik (9/8/2026) malam.
“Tadi malam lah ado kasapakatan dari kaduo pihak untuak badamai,” kato Djati.
Inyo manambahkan, Bill juo alah mancabuik pangaduan nan sabalumnyo disampaikannyo terkait kajadian tu.
Manuruik Djati, karano pakaro nan dilaporkan merupakan delik aduan, pencabutan pangaduan manjadikan proses pangaduan tu dengan sendirinyo salasai.
Sungguahpun bak nantun, Djati menyabuik bahwa penyelesaian sacaro damai indak bararti kajadian tu indak manjadi bahan evaluasi. Sabaliknyo, kejadian tu manjadi palajaran bagi saluruah personel Polda Sumbar.
Inyo manilai, sikap arogan jo emosional dari anggota kepolisian dapek manurunkan kaparcayaan masyarakat ka institusi Polri.
Djati mamintak saluruah personel Polda Sumbar supayo salalu basikap profesional, humanis, jo mampu mangendalikan diri dalam malayani masyarakat.
Sabalun kaduo pihak sapakaik badamai, kajadian tu juo mandapek perhatian dari sabarapo pihak.
Ketua Komisi III DPR RI Habiburokhman mamintak Polri sugiro mamproses dugaan palanggaran nan tajadi dalam kajadian tu.
“Tolong segera diproses hukum,” tulih Habiburokhman melalui kolom komentar unggahan Instagram Langgam.id.
Samantaro itu, anggota Kompolnas RI Yusuf Warsim mamintak fungsi pangawasan internal Polri melalui Propam Polda Sumbar mandalami kajadian tu. Langkah ko dinilai paralu untuak memastikan apakah ado palanggaran atau indak.
“Bilo batua nan dimukasuik oknum Polda Sumbar mako paralu dilakukan penyelidikan untuk maagiah kepastian apakah ada pelanggaran atau tidak,” kato Yusuf, sabagaimano dikutip dari Langgam.id.
Namun, perkembangan terakhir tu mah, manunjukkan baso masalah ko indak dilanjutkan ka proses hukum sasudah kaduo pihak badamai.
Kaduo pihak alah sapakaik badamai, dan Bill juo alah mancabuik pangaduannyo. Dengan demikian, masalah ko lah salasai lo. (Tan Parpatiah)
