Padang, — Hubungan badunsanak antaro Aceh jo Minangkabau nan lah bajalin ratusan tahun lamo dipaarek baliak dek Majelis Tinggi Lembaga Wali Nanggroe Aceh nan tibo ka Ranah Minang untuak basilaturahmi jo Lembaga Kerapatan Adat Alam Minangkabau (LKAAM) Sumatera Barat.
Kaduo panguruih organisasi ko basobok di Balai Adat LKAAM, kompleks Masjid Syekh Ahmad Khatib Al Minangkabawi, Padang, Salasa patang ko (21/7/2026).
Pertamuan nan barlangsung sacaro baselo di ateh lapiak itu sabana akrab.
Duduak samo randah, tagak samo tinggi. Tokoh adat dari duo daerah batuka pikiran tantang manjago adat, tanah ulayat, sarato mancari jalan supaya adat indak luntur dimakan zaman.
Ketua Majelis Tuha Lapan Wali Nanggroe Aceh, Kamaruddin Andalah, S.Sos., M.Si., mangatokan kadatangan rombongan ka Sumatera Barat adolah bagian dari studi komparatif untuak mancari contoh nan elok dalam malestarikan adat jo mambina masyarakat adat.
“Kami datang untuak manggali pangalaman di Ranah Minang, karano banyak hal nan bisa kami jadikan pambanding dalam manjago adat,” ujarnyo.
Manuruik Kamaruddin, adat Aceh jo adat Minangkabau sabanarnyo tumbuah dari urek nan samo, yaitu ajaran Islam. Di Aceh dikenal falsafah Adat Aceh basandikan syariat, syariat basandikan Kitabullah.” Falsafah itu manjadi pegangan hiduik urang Aceh, bahaso adat, budaya, jo hukum adat wajib salaruik jo Al-Quran sarato Hadis.
Falsafah itu, kato Kamaruddin, hampia samo jo nan dipacik taguah dek urang Minangkabau, yakni Adat Basandi Syarak, Syarak Basandi Kitabullah.
“Hubungan urang Aceh jo urang Minang lah bakulindan sajak barabad-abad nan lapeh. Nan mamisahkan kito indak ado, sabab nan jadi sandaran adat kami samo-samo agama Islam,” katonyo.
Ketua Umum LKAAM Sumbar, Dr. Fauzi Bahar, M.Si., Dt. Sati, mangatokan dek karano samo falsafah itulah nan mambuek hubungan Aceh jo Minangkabau indak pernah putuih dek wakatu.
Manuruiknyo, dari maso dahulunyo hubungan duo daerah ko lah tarajut dalam banyak hal, mulai dari panyiaran agama Islam, dagang, pendidikan, sampai hubungan kekerabatan antarmasyarakat.
Salah satu bukti sejarah nan masih hiduik sampai kini, kato Fauzi Bahar, adolah Syekh Burhanuddin Ulakan nan dahulu manuntuik ilmu agama ka Aceh sabalun pulang manyiarkan Islam di Minangkabau.
Indak cuma itu, di pasisia barat Aceh kini masih hiduik Bahaso Jamee, yaknik dialek Bahaso Minangkabau nan dipakai dek Suku Aneuk Jamee, keturunan urang Minang nan marantau ka Aceh mulai abad ka-16.
Bahaso Jamee masih banyak dipakai di Aceh Selatan, Aceh Barat Daya, Nagan Raya sampai Aceh Barat. Walaupun lah babaua jo Bahaso Aceh, banyak kosakatanyo masih asli Bahaso Minang. Ko manandakan kuatnyo adonyo partalia budaya Minangkabau di bumi Serambi Makkah itu.
Fauzi Bahar manambahakan, tali basudaroan Aceh jo Minangkabau juo tampak jaleh kutiko duo daerah samo-samo ditimpo musibah. Waktu Aceh dilando tsunami, urang Minang datang mambantu. Sabaliknyo, waktu Sumatera Barat dilando gampo jo banjir, bantuan dari Aceh pun hadir.
“Badunsanak itu indak cukuik jo kato-kato. Waktu dunsanak kito susah, di sinanlah tampak raso saiyo jo sakato,” ujar mantan Wali Kota Padang itu.
Dalam dialog itu, LKAAM Sumbar juo manyampaian langkah-langkah nan lah dilakukan dalam mampertahankan tanah ulayat, manjago anak kamanakan dari bahayo narkoba jo pargaulan bebas, mancegah maraknyo LGBT, sarato mamperjuangkan Hukum Pidana Adat supayo dapek dijadikan Peraturan Daerah.
Silaturahmi antara Lembaga Wali Nanggroe Aceh jo LKAAM Sumatera Barat itu diharokkan indak hanyo manjadi ajang batuka pikiran, tapi juo mampakokoh tali persaudaraan nan lah dijalin ratusan tahun.
“Adat Aceh jo adat Minangkabau memang barupo duo batang kayu, tapi tumbuah dari satu akar nan samo, basandikan syarak jo Kitabullah” kato Humas LKAAM Sumbar, H. Zulnadi, S.H (Tan Parpatiah)
