Padang — Kajadian nan marisaukan hati tajadi di satu madrasah di Padang, Salasa (14/7/2026). Saurang murid nan baru baumua 17 tahun alah sanggup maracik bom rakitan, lalu mambao ampek bom ka lingkungan sakolah.
kaba ko manimbuakan kakagetan di tangah masyarakat. Sabab, nan diduga maracik bahan peledak ko bukan urang dewasa atau anggota jaringan kriminal, malainkan masih surang murid Madrasah.
Densus 88 Antiteror Polri jo Polda Sumatera Barat kini masih mandalami latar balakang kajadian ko, mulai dari motif, caro palaku baraja maracik bom, aktivitasnyo di dunia maya, sampai kamungkinan ado pihak lain nan mampangaruhi atau mambantu.
Juru Bicaro Densus 88 Antiteror Polri, Kombes Pol. Mayndra Eka Wardhana, mangatokan bahaso inyo jo anggota lah maamankan saurang murid madrasah di Padang sabuik sajo namonyo XX (17).
“Iyo, murid madrasah tu Xx(17),” katonyo.
Ampek Bom
Kapolresta Padang Kombes Pol. Apri Wibowo manarangkan, hasia panyalidikan awal manunjuakkan bahaso R mambao ampek bom rakitan ka sakolah.
Ciek bom diledakkan di muko ruang kalas sakitar pukua 10.15 WIB, pas jam istirahat. Tigo bom lainnyo untuang dapek diamankan dek Tim Gegana Polda Sumatera Barat dari dalam tas nan dibao palaku.
Bom nan diledakkan tu tagolong low explosive atau bahayo ledak randah. Ledakannyo maninggaan lantai gosong dek mesiu jo maratakkan sabagian dindiang lua ruang kelas.
Untuangnyo, indak ado korban jiwa maupun korban luko.
Bara surang
Nan labiah mancamehkan awak, dari pamariksaan awal XX mangaku maracik surang bom tu di rumah. Bahan-bahannyo dibali sacaro daring tanpa sapangatahuan urang tuonyo.
Palaku juo mangaku baraja maracik bom malalui internet jo YouTube. Bahkan, inyo mangaku bagabuang jo babarapo grup daring nan mambahas pambuatan bahan paledak.
Pangakuan ko kini masih diverifikasi dek aparat. Polisi masih manulusuri sajauh apo nan dipalajari palaku di dunia maya, jo apo sajo pihak nan mungkin mampangaruhi jalan pikirannyo.
Kapolresta Padang manarangkan, manuruik pangakuan awal, tindakan palaku dipicu dek raso dandam ka salah saurang kawan sakelas nan disabuiknyo acok maniayonyo (bullying).
Samentaro itu, Densus 88 juo manyabuikkan bahaso R mangaku tarinspirasi dek kajadian bom di SMA Negeri 72 Jakarta tahun 2025 nan dipalajarinyo malalui internet.
Namun, aparat manegaskan saluruah pangakuan tu masih dalam tahap panyalidikan jo balum dapek dijadikan kasimpulan akhir.
Peringatan bagi Urang Tuo
Kasus ko manjadi pangingek kareh bahaso ancaman radikalisasi jo pambuatan bahan paledak kini indak lai hanyo barasa dari lingkungan tartutuik.
Kamajuan teknologi mambuek akses ka barbagai informasi, termasuk nan babahayo, bisa dicapai dek anak-anak jo remaja malalui internet.
Urang tuo, guru, pihak sakolah, jo masyarakat dituntuik labiah peka jo parubahan sikap anak-anak, apo lai bilo lah mulai manyendiri, tarlampau laruik di dunia maya, atau mampunyoi minat nan indak wajar ka bahan peledak jo kakerasan.
Kini XX basamo barang bukti alah diamankan untuak panyidikan. Densus 88 jo Polda Sumatera Barat masih mamarikso saksi-saksi, manulusuri aktivitas digital palaku, serta mandalami kamungkinan ado pangaruh paham tatarantu ataupun katerlibatan pihak lain. (Tan Parpatiah)
