Padang — Tigo kapalo daerah di wilayah tanggara Sumatera Barat sapakaik mamajukan kawasan Sawahlunto, Sijunjuang, jo Dharmasraya (SSD) sabagai pusek patumbuahan ekonomi baru di Ranah Minang. Kasapakaikan ko diyakini bisa mampacapek pambangunan, maundang investasi, mambukak lapangan karajo, sarato manjadi pamicu kamajuan wilayah bagian tanggara Sumbar.
Kasapakaikan tu lahia dalam rapek koordinasi nan dipimpin dek Wakil Gubernur Sumatera Barat, Vasko Ruseimy, di Rumah Dinas Wakil Gubernur Sumbar, Sinayan nan lapeh (6/7).
Pertemuan tu dihadiri dek Bupati Sijunjuang Benny Dwifa Yuswir, Bupati Dharmasrayo Annisa Suci Ramadhani, Wakil Wali Kota Sawahlunto Jeffry Hibatullah, basamo jajaran Pamarintah Provinsi Sumbar.
Manuruik Vasko Ruseimy, alah wakatuonyo pambangunan di Sawahlunto, Sijunjuang, jo Dharmasrayo dijalankan sacaro basamo, indak lai bajalan surang-surang. Katigo daerah ko punyo kaunggulan nan saling malangkapi, sahinggo kalau digabuangkan akan mambuek kawasan ekonomi nan labiah kuaik.
“Tujuan awak indak sajo mambangun infrastruktur, tapi juo manciptakan pusat patumbuahan ekonomi baru di wilayah tanggara Sumatera Barat. Kalau konektivitas antardaerah makin rancak, investasi akan labiah gampang masuak, lapangan karajo batambah, jo ekonomi masyarakat pun akan tumbuah labiah capek,” kecek Vasko.
Kasapakaikan tigo daerah ko sakaligus manjadi landasan untuak mangusuangkan kawasan Sawahlunto–Sijunjuang–Dharmasrayo sabagai Proyek Strategis Nasional (PSN) ka Pamarintah Pusek. Kalaupun usulan ko disatujui, kawasan SSD diharapkan tumbuah manjadi koridor ekonomi baru nan dapek mamacu pamarataan pambangunan di Sumatera Barat.
Untuak mamuluskan usulan tu, Pamarintah Provinsi Sumbar basamo katigo pamarintah daerah lah manyatokan komitmen basamo untuak malengkapi saluruah syarat nan diparalukan. Di antaro nyo manyiapkan data teknis, manyalasaikan rencana tata ruang jo parizinan, manyadiokan lahan, sato manyelaraskan program pambangunan antardaerah.
Bupati Dharmasraya, Annisa Suci Ramadhani, mangatokan inyo siap mandukuang sapanuahnyo rancangan panguatan kawasan SSD. Manuruiknyo, kasapakaikan tigo daerah ko manjadi modal gadang untuak mambangun wilayah tanggara Sumatera Barat sacaro basamo.
“Kami sapakaik manjadikan Sawahlunto, Sijunjuang, jo Dharmasraya sabagai kawasan patumbuahan baru di Sumatera Barat. Kalau awak bajalan saayun salangkah, insya Allah hasil pambangunan akan labiah capek dirasokan dek masyarakat,” katanyo.
Rancangan panguatan kawasan SSD akan diarahkan ka panguatan industri, pangolahan hasil-hasil unggulan daerah, pambangunan jaringan jalan jo konektivitas antardaerah, pamanfaatan energi hijau, sampai ka pangambangan pariwisata nan tarpadu.
Kalau rencana ko dapek talaksana, wilayah tanggara Sumatera Barat indak lai dipandang sabagai kawasan pinggiran, tapi bakal tumbuah manjadi salah satu pusek patumbuahan ekonomi baru nan mamacik daya saing Sumbar di maso nan akan datang.
Kasapakaikan tigo kapalo daerah ko juo dipandang sabagai langkah basamo nan mancaliakan sumangek sakik samo diubek, ringan samo dijinjiang, supayo kamajuan Sawahlunto, Sijunjuang, jo Dharmasrayo dapek manjadi kamajuan basamo bagi Sumatera Barat.(Tan Parpatiah)
