Padang — H. Sengaja Budi Syukur, S.H., Datuak Bandaro Jambak, nan baliak dipicayo maminpin Dewan Pimpinan Wilayah (DPW) Perkumpulan Keluarga Pasisia Selatan (PKPS) Sumatera Barat untuak maso bakti 2026–2031, manegaskan komitmennyo manjadikan PKPS sabagai jambatan nan kokoh untuak mampaarek hubungan urang Pasisia Selatan di ranah jo di rantau.
Itu disampaikan dek Datuak Bandaro Jambak kutiko salasai Musyawarah Wilayah (Muswil) II DPW PKPS Sumbar nan diadokan di Rumah Gadang Urang Pasisia, Jalan Banda Bakali, Jati, Padang, Minggu (12/7). Dalam pamilihan itu, Budi Syukur mandapek 14 suaro, sadangkan H. Ali Amran Abbas, M.Si., mandapek tigo suaro.
Manuruik Budi Syukur, kepercayaan nan dibarikan warga PKPS ka dirinyo bukanlah kamanangan pribadi, tapi amanah gadang nan harus dipikua basamo untuak kamajuan organisasi jo kampuang halaman.
“Kepercayaan ko indak kamanangan ambo surang, tapi amanah saluruah urang Pasisia nan bagabuang dalam PKPS. Beda pilihan salamo Muswil biaso sajo dalam demokrasi, tapi kini lah wakatuonyo basatu, bahimpun, jo basamo-sama mambangkik batang tarandam demi kamajuan organisasi,” kato pengusaha transportasi ko.
Inyo manilai, tantangan PKPS ka muko indak cukuik jo manjago tali silaturahmi urang rantau sajo. Labiah dari itu, organisasi harus bisa manjadi panghubuang antaro potensi urang Pasisia di rantau jo kabutuahan pambangunan di kampuang halaman.
“PKPS harus tampil sabagai pelopor nan mampaarek hubungan rantau jo ranah. Urang rantau indak cukuik pulang basuo sanak famili sajo, tapi juo harus mampunyoi andil dalam mambangun daerah malalui pikiran, investasi, usaha, pendidikan, kagiatan sosial, sampai ka pambinaan generasi mudo,” kato Budi Syukur.
Manuruiknyo, urang Pasisia nan marantau lah banyak nan barhasil di barbagai bidang. Kakuatan ko, kalau dihimpun jo disatukan, dapek manjadi modal gadang untuak mambangkikkan perekonomian jo kamajuan Kabupaten Pasisia Selatan.
Inyo juo maharokkan supayo pamarintah daerah mambukak ruang kolaborasi nan labiah leba jo para perantau. Sabab, kamajuan daerah indak mungkin dicapai kalau ranah jo rantau bajalan surang-surang.
“Ranah jo rantau ibarat duo sisi pitih nan indak dapek dipisahkan. Kalau saling manyokong jo saling manguaikan, insya Allah Pasisia Selatan akan labiah capek maju. Potensi nan ado di rantau harus disambuik jo tangan tabukak di kampuang halaman,” katonyo.
Salamo limo taun ka muko, Budi Syukur manyabuikkan PKPS akan mamfokuskan program panguatan kagiatan sosial, maagiah beasiswa untuak anak-anak Pasisia, pambinaan UMKM, panguatan ekonomi masyarakat, sarato mampakokoh komunikasi jo karajo samo antaro pamarintah daerah, niniak mamak, alim ulama, cadiak pandai, jo urang Pasisia di rantau.
Manuruiknyo, PKPS indak buliah jadi organisasi nan hiduik hanyo pado acara basuo tahunan. PKPS harus hadir sabagai wadah nan mampu mangumpuan gagasan, mampaarek silaturahmi, jo manghadiahan manfaat nan nyata untuak masyarakat.
“Kalau ranah jo rantau bajalan saayun salangkah, basamo mamikua tangguang jawab untuak daerah, insya Allah Pasisia Selatan akan labiah maju, masyarakatnyo labiah makmur, jo PKPS makin diraso manfaatnyo dek urang banyak,” tukuaknyo.
Muswil II DPW PKPS Sumbar bajalan dalam suasana nan rukun jo panuah kakaluargaan. Sasudah hasil pamilihan ditatapkan, Budi Syukur jo Ali Amran Abbas saling basalaman jo bapalukan, sabagai tando bahwa awak badunsanak. (Tan Parpatiah)
