Batusangkar — Lah batahun urang Nagari Tanjung Alam, Kacamatan Tanjung Baru, Kabupaten Tanah Datar, mangaluahkan karusakan jalan provinsi nan mahubuangan Batusangka jo Payokumbuah. Tapi, dek indak juo ado parbaikan nan datang dari pamarintah, urang kampuang akhianyo turun tangan bagotong royong manimbun jalan nan balubang, Sinayan patang ko (25/12) untuak manjago kasalamatan pamakai jalan.
Karajo swadaya tu lahia dek masyarakat manyabuik karusakan jalan lah lamo bana ndak digubris, sahinggo masyarakat mancari jalan kalua surang.
Salamo ko urang kampuang hanyo bisa manunggu, sadangkan kacalakaan dek jalan balubang samakin acok.
Wali Jorong Gantiang Ateh, Nagari Tanjung Alam, Irwan, manyabuikkan inisiatif tu tabik dek jalan nan jadi tangguang jawab pamarintah provinsi indak juo diparbaiki, padohal kondisinyo makin hari makin parah.
“Dek indak kunjuang diparbaiki, kami basamo masyarakat Tanjung Alam barinisiatif manimbun lubang jo pacahan simin jo tanah, bia kandaraan masih bisa lalu,” katonyo.
Manuruik Irwan, jalan provinsi di kawasan tu lah rusak salamo labiah kurang limo taun. Sabagian lubang lah dalam bana, sahinggo kandaraan, utamo oto angkutan barang, susah malaluinyo.
Karusakan jalan tu, alah jadi ancaman gadang ka kasalamatan pamakai jalan, utamonyo nan pakai roda duo. Hampia satiok minggu ado sajo urang nan tajikapak ba honda karano masuak ka lubang atau karano mailakan lubang di tangah jalan.
Masyarakat baharok Pamarintah Provinsi Sumatera Barat sugiro malaksanakan pangaspalan ulang sacaro manyaluruah supayo jalan Batusangkar–Payokumbuah bisa rancak baliak, aman jo nyaman dilalui kandaraan.
“Kami mawakili masyarakat jo saluruah pamakai jalan, barahok bana supayo jalan ko sugiro diaspal ulang, bia layak baliak dilalui kandaraan,” kecek Irwan.
Sabalunyo, Pamarintah Provinsi Sumatera Barat sabananyo lah mangalokasikan anggaran labiah dari Rp16,3 miliar malalui Dinas Bina Marga, Cipta Karya, jo Tata Ruang (BMCKTR) untuak pambangunan jo parbaikan babarapo ruas jalan provinsi di Kabupaten Tanah Datar.
Kapalo Dinas BMCKTR Sumatera Barat, Armizoprades, manarangkan anggaran tu dipakai untuak babarapo paket proyek. Di antaro nyo rehabilitasi ruas Bateh Batusangkar (Bukik Gombak)–Guguak Cino jo pagu anggaran Rp2,13 miliar, barupo patching mamakai hotmix jo pambasihan tanaman di bahu jalan. Salain tu, pamarintah juo mangalokasikan Rp4,01 miliar untuak rehabilitasi ruas Baso–Bateh Batusangkar (Balai Salasa).
Sataruihnyo, rekonstruksi jalan di ruas Guguak Cino–Sitangkai mandapek anggaran Rp1,69 miliar, tamasuak dukungan pokok pikiran Anggota DPRD Sumatera Barat, Roni Mulyadi, Rp600 juta. Sacaro kasaluruhan, anggaran nan dicorohkan pamarintah provinsi untuak pambangunan jo parbaikan jalan di Tanah Datar ko mancapai labiah dari Rp16 miliar.
Karajo jalan di babarapo ruas jalan tu dipacu manjalan Hari Raya Idulfitri nan lalu, untuak mangantisipasi maningkeknyo arus mudik di wilayah Tanah Datar.
Awal tahun 2026, kondisi jalan provinsi di Tanah Datar masih manjadi sorotan. Waktu Menteri Pekerjaan Umum datang ka Tanah Datar pado Januari 2026, dilaporkan ruas jalan provinsi Sitangkai–Batusangkar sapanjang labiah kurang 25 kilometer masih dalam kondisi rusak parah.
Sabalunyo, Bupati Tanah Datar, Eka Putra, juo pernah manyampaikan baso ado sakurang-kurangnyo tujuah rueh jalan provinsi di Tanah Datar nan rusak parah jo mambutuahkan pananganan sacapeknyo.
Gotong royong nan dilakukan dek anak Nagari Tanjung Alam ko manjadi gambaran nyato kekecewaan masyarakat dek lambeknyo pananganan infrastruktur jalan. Walaupun pamarintah provinsi lah manyaduokan anggaran untuak parbaikan jalan, masyarakat barahok supayo titik-titik jalan nan lah lamo rusak jo manimbuakan kacalakaan tu sugiro dipelok i, bia aktivitas masyarakat indak taganggu dan kasalamatan pamakai jalan labiah tajamin. (Tan Parpatiah)
