Padang — Pambangunan palinduang pantai di wilayah pasisia indak buliah asal tagak jo bahan nan kuat sajo. Nan labiah penting, bangunan tu harus salaras jo tabiaik alam, supayo mampakok pantai dari ancaman bencana hidrometeorologi, sakaligus manjago kasalamatan masyarakat.
Guru Gadang Fakultas Teknik Universitas Andalas (Unand), Prof. Mas Mera, hari Akaik patang, manegaskan, tiok-tiok bangunan palinduang pantai harus disasuaikan jo sipaik alam di tampek bangunan tu dibuek. Manuruiknyo, kalau rancangan indak cocok jo kondisi pantai, bangunan nan maha sakalipun bisa gagal manjalanan fungsinyo, malah dapek mambao bahayo baru.
“Nan partamo, kito harus mancaliak dulu gaya alam nan paling dominan di pantai tu,” kecek e.
Manuruik Prof. Mas Mera, kajian iko penting untuak manantuan apo masalah utamo pantai disababkan dek ombak nan mahantam luruih ka pantai, atau dek arus aia nan maangkek pasia ka pantai. Kajian itulah nan manjadi dasar dalam manantuan bangunan nan paling cocok.
Salanjuiknyo, bangunan nan dipakai indak buliah dipasokan samo untuak saluruh pantai. Masing-masing pantai punyo tabiaik nan babedo.
“Jan dipaksokan mamakai groin kalau kondisi alam sabana mambutuahkan pemacah ombak (breakwater),” katanyo.
Aspek katigo, sambuang Prof. Mas Mera, adolah manyasuaikan bangunan jo karajo alam. Posisi jo bantuak bangunan harus mampu mambantu proses pangumpuan pasia (akresi) sacaro alami, sahinggo pantai makin kokoh tanpa marusak kasaimbangan lingkungan.
Prof. Mas Mera manyabuikkan, banyak bangunan palinduang pantai nan gagal bukannyo karano bahannyo buruak, tapi karano salah dalam mamiliak bantuak bangunan. Akibatnyo, bangunan indak sanggup manahan abrasi, malah bisa mambuek arus baliak (rip current) di sisi bangunan.
“Kalau lah tajadi ciek kondisi mode iko, pantai malah jadi labiah babahayo untuak masyarakat jo wisatawan nan mandi di pantai,” kecek guru gadang ko.
Sabagai contoh, Prof. Mas Mera manarangkan pangalaman di Pantai Muaro Putuih, Kabupaten Agam. Bangunan groin nan salamo ko indak mampan manahan ombak nan datang luruih, akhirnyo dimodifikasi manjadi T-Head Groin.
T Head groin nan ditambah tu mampu maubah fungsi bangunan jadi sarupo jo pemacah ombak. Di balakang bangunan tabantuak kawasan aia nan tenang, lalu pasia pun takumpua sacaro alami dalam jumlah nan banyak.
“Rekayasa iko tabukti mampu manstabilkan pantai jo manambah daratan sacaro alami,” katanyo.
Sacaro ilmiah, jelasnyo, groin memang labiah cocok dipakai di pantai nan didominasi arus sajajar pantai. Sabaliknyo, kalau ombak datang luruih ka pantai, bangunan pemacah ombak jauh labiah rancak dipakai.
Di balakang pemacah ombak nantinyo akan tabantuak tanah pasia baru nan lahia dek endapan alami. Kawasan iko dapek ditanami batang kayu untuak manjago pantai, bahkan bisa dimanfaatan pulo sabagai tampek baramian jo baralek wisata, karano aia di balakang bangunan jadi labiah tenang jo aman.
Manuruik Prof. Mas Mera, pambangunan bangunan nan salaras jo tabiak alam bukan sajo mampakokoh pantai dari ancaman bencana, tapi juo mambari manfaat untuak lingkungan, ekonomi, jo kahidupan masyarakat pasisia.
“Alam indak buliah dilawan, tapi harus dipahami. Kalau bangunan disasuaikan jo karajo alam, insya Allah pantai akan labiah aman, masyarakat tarlinduangi, jo manfaatnyo dapek dirasoan dalam jangka panjang,” kato we’e (Tan Parpatiah)
