Payokumbuah— Badan Wakaf PERTI (BWP) Pusat mambuek sajarah baru malakukan pancatatan resmi aset wakaf partamo barupo sabidang tanah 7.000 meter pasagi nan talatak di Nagari Sarilamak, Kabupaten Limopuluah Koto.
Langkah ko manjadi palangkahan penting untuak manyalamatkan, maatur jo mambuek jaleh kaduduakan hukum aset wakaf ummat, sakaligus mambuek sistim panguruihan wakaf nan labiah rancak jo taratur. Bagi PERTI, iko nan partamo dilakukan di Indonesia.
Tanah wakaf nan lah dicatakkan ko, sacaro hukum diparuntukkan untuak pangambangan PERTI. Kini kaduduakan tanah tu lah sah dicataikkan ateh namo Badan Wakaf PERTI, sahinggo punyo kapastian hukum nan labiah kokoh.
Katua Badan Wakaf PERTI Pusek, Dr. Ir. Dedi Yusmen, MBA., M.E.Sy., Dt. Rajo Pangulu Nan Tinggi, mangatokan, pancatatan aset wakaf bukannyo sekadar urusan administrasi sajo, tapi juo mangamankan amanah wakaf supayo harta wakaf indak hilang, indak bapindah tangan jo tatap bamanfaat untuak ummat sapanjang maso.
“Masih banyak aset wakaf nan balun punyo administrasi jo legalitas nan jaleh. Padahal, pancatatan ko sangat penting supayo harta wakaf tatap tagak, tarjago, jo bisa dimanfaatkan taruih untuak kapantingan agama, pendidikan, sosial, jo kamajuan ummat,” keceknyo.
Pancatatan perdana ko ditandai jo panandatanganan Akta Pancatatan Wakaf dek Katua BWP Pusat basamo Katua PC PERTI Limopuluah Koto, Doni Rahmat, S.S., M.A.
Sabalun akta ditandatangani, BWP labiah dahulu maangkek tujuah urang nazhir ateh usulan PC PERTI Limopuluah Koto. Nazhir ko nan bakal mamagang amanah mauruih, manjago, jo mangambangkan aset wakaf tu sasudah iko.
Acara ko dilangsungkan di Kantua Kamenterian Haji jo Umrah Kota Payokumbuah jo disaksikan dek Katua PC PERTI Kota Payokumbuah, Buya H. Erman Ali, sarato Wakil Sakretaris Jendral PP PERTI, Ardi Anas.
Palangkahan ko pulo mandapek dukungan panuah dari Kapalo Kantua Kamenterian Haji jo Umrah Kota Payokumbuah, Buya Endra Rinaldi, S.Ag., nan juo manjabat Wakil Katua PC PERTI Kota Payokumbuah. Manuruiknyo, aset wakaf nan dicataikkan jo ditaratik administrasinyo bakal labiah aman dari pasoalan hukum, sahinggo manfaatnyo dapek dirasokan anak kamanakan jo ummat salamo-lamonyo.
Dedi Yusmen manjalehan, pancatatan aset wakaf di Sarilamak ko indak lah manjadi panghabisan, tapi malah pambukak jalan ka gerakan nasional untuak menata aset wakaf PERTI di saluruah Indonesia.
“Insya Allah, pancatatan aset wakaf partamo ko bakal manjadi contoh jo padoman untuak panguruihan jo legalitas aset wakaf PERTI di saluruah Indonesia. Aset wakaf nan lah sah jo tarcataik akan labiah tajago, sahinggo manfaatnyo bisa taruih dirasoan untuak kamajuan pendidikan, dakwah, sosial, jo pambaradayaan ekonomi ummat,” katonyo. (Tan Parpatiah)
