Padang – Nyampang sanak nak pai pakai oto maharu Pasa Raya Padang, kini tapaso baraja agak sakijok lantaran jalan nan biaso ditampuah diubah dek Pemko Padang.
Rekayasa lalu lintas ko dilakukan lantaran sadang dilakukan pakarajaan proyek revitalisasi pasa raya Padang ntun, sahinggo sebagian jalan manuju pasa raya ntun ditutuik salamo 6 bulan, mulai dari tanggal 29 Juni 2026 sampai 30 Desember 2026.
Sabagian ruas jalan ditutuik samentaro, karano tu masyarakat dimintak mamakai jalan alternatif nan lah disadiokan.
Akses luruih dari Jalan Pamuda jo Jalan Diponegoro ka arah Sentral Pasar Raya kini indak bisa lai dilewati. Panutupan dimulai dari muko Masjid Taqwa Muhammadiyah sampai ka kawasan SPR untuak sado alahe jinih kandaraan.
Untuak mangatasi gangguan lalu lintas, pangandara diarahkan mamasuak ka lajur sabalah kida malalui Jalan Banda Olo. Dari sinan, parjalanan dapek dilanjuikan malalui Jalan Pasar Raya I atau Jalan Pasar Raya II untuak masuk ka kawasan pasa.
Samentaro itu, akses ka Jalan Balakang Lintas jo Jalan Balakang Tangsi juo lah ditutuik jo dipasangi rambu larangan masuak.
Masyarakat nan barancana ka kawasan SPR disarankan malalui jalan di sampiang Geduang IWAPI atau malalui jalan nan ado di balakang Sentral Pasar Raya.
Baitu pulo untuak kandaraan nan datang dari arah Banda Balakang Tangsi indak bisa lai masuak langsuang. Sado kandaraan dialiahkan labiah dahulu ka Jalan Adhyaksa, baru diputakan baliak ka Jalan Balakang Tangsi.
Akses dari Jalan Bundo Kanduang ka kawasan Air Mancua juo ditutuik samentaro karano di sinan tu bana nan manjadi titik utama pekerjaan proyek konstruksi. Pengandara dimintak mamakai jalan lingka lua nan lah disadiokan.
Parubahan arus lalu lintas juo balaku untuak angkutan umum nan datang dari arah Jalan M. Yamin jo Balaikota Padang Lamo. Akses ka bundaran Pasar Raya tu kini indak bisa dilewati. Kandaraan diarahkan mambelok ka kanan malalui Jalan Sandang Pangan di muko Balaikota Lamo, lalu malintasi sabalah Geduang Fase VII sabalun manuju tujuan masing-masing.
Kapalo Dinas Pekerjaan Umum jo Panataan Ruang (PUPR) Kota Padang, Malvi Hendri, maimbau supayo masyarakat dapek manyasuaiakan rute parjalanan jo mamatuhi rambu-rambu lalu lintas nan lah dipasang salamo pambangunan baralan.
“Kami mangimbau ka pamakai jalan supayo mamatuhi rambu-rambu petunjuk nan lah dipasang dek petugas di lapangan, jo salalu mangutamakan kasalamatan dalam bakandaraan,” kato e.
Pamarintah Kota Padang juo manyampaian maaf kapado masyarakat ateh gangguan nan tajadi salamo proses pambangunan. Pamarintah baraharap pangarati jo dukungan urang banyak, supayo revitalisasi Pasar Raya Padang dapek salasai sacapeknyo, sahinggo pasa kabanggaan urang Padang ko tampil labiah rancak, nyaman, jo layak manjadi pusek perekonomian urang awak. (Tan Parpatiah)
