Padang – Main kuciang-kuciangan dengan caro mamainkan barcode MyPertamina untuak mandepek BBM basubsidi masih tajadi di SPBU di Sumatera Barat ko. Bahkan Gubernur Sumatera Barat, Mahyeldi Ansharullah, mamparogoki adonyo indikasi panyalahgunaan barcode MyPertamina tu.
Ado urang untuak mandapekkan bahan bakar minyak (BBM) basubsidi padohal sabananyo indak barhak. Tamuan ko didapek waktu Gubernur malakukan inspeksi mandadak (sidak) ka babarapo SPBU di Kabupaten Tanah Datar jo Kabupaten Solok, Kamih (25/6/2026).
Sidak nan diikuti dek Kapalo Dinas Energi jo Sumber Daya Mineral (ESDM) Sumbar, Helmi Heriyanto, ko batujuan mamastikan pandistribusian BBM basubsidi, khususnyo solar, bajalan sasuai jo katantuan kutiko kini masih panjangnyo antrean kendaraan di sajumlah daerah di Sumatera Barat mananti BBM.
Salamo sidak, Mahyeldi maliek langsuang proses panyaluran BBM basubsidi sakaligus mamparogoki babarapo indikasi panyimpangan nan diduga manjadi pangkabala taganggunyo pandistribusian BBM subsidi kapado masyarakat nan barhak manarimonyo.
“Ambo singajo turun ka lapangan untuak maliek langsuang kondisi pandistribusian BBM di SPBU. Antrean nan masih tajadi ko musti jadi paratian basamo. Tujuan kito adalah mamastikan subsidi dari nagara sampai ka masyarakat nan memang barhak,” kato Mahyeldi.
Manuruiknyo, pangawasan pandistribusian BBM basubsidi indak mungkin dipikua dek salah satu pihak sajo. Mako, diparalukan sinergi antaro Pertamina, BPH Migas, Hiswana Migas, Pamarintah Kjo kota, sarato aparat panagak hukum supayo pangawasan dapek bajalan efektif.
Dari hasil sidak, Gubernur manamukan masih adonyo transaksi nan manjadi tando tanyo. Di antaronyo adonyo kendaraan jo nomor polisi nan samo, tapi malakukan pangisian BBM sacara barulang jo pola transaksi nan hampia samo satiok hari. Salain itu, di lapangan juo masih ditamui dugaan pamakaiann barcode MyPertamina dek pihak nan indak barhak untuak mandapekkan BBM basubsidi.
Mahyeldi manilai, pola transaksi nan jangga ko sabananya alah dapek tadeteksi malalui sistem digital nan dipunyoi Pertamina. Dek karano itu, inyo mamintak supayo analisis data transaksi dilakukan sungguah-sungguh, sahinggo satiok indikasi panyalahgunaan dapek diketahui dan langsung ditindak sia sajo nan menyalahi katantuan.
“Kalau ado pola transaksi nan indak wajar, tantu harus sugiro dipareso. Sistem nan alah ado musti dimanfaatan sabaik-baiknyo untuak mandeteksi potensi panyalahgunaan dari awal, supayo subsidi indak jatuh ka tangan nan indak barhak,” ujarnyo.
Salain itu, Mahyeldi juo manyoroti masih adonyo praktik palangsiran BBM basubsidi di lapangan. Dek sabab itu, inyo mamintak saluruah kapalo daerah di Sumatera Barat manjalanan Instruksi Gubernur Nomor 1/INST-2026 tantang Pangandalian jo Pangawasan Pandistribusian Jenis Bahan Bakar Tertantu (JBT) jo Jenis Bahan Bakar Khusus Panugasan (JBKP).
Dalam instruksi tu, satiok pamarintah kabupaten jo kota diminta mambantuak sakaligus mangoptimalkan Satgas Pangawasan Distribusi BBM Basubsidi di daerah masing-masing, supayo pangawasan di lapangan makin kuat.
“Kito ingin pangawasan di SPBU yo bana bajalan. Kasariusan sado pihak akan taruih kito pantau jo kito evaluasi, dek tujuan utamo kito adalah manjago supayo subsidi nagara yo bana sampai ka nan barhak,” tagas Mahyeldi.
Samentaro tu, Kapalo Dinas ESDM Sumbar, Helmi Heriyanto, mangakui bahaso salamo sidak juo ditamui indikasi transaksi nan indak lazim di salah ciek SPBU. Tamuan tu, manuruiknyo, harus jadi bahan evaluasi basamo Pertamina sarato Hiswana Migas malalui pamariksaan rutin data transaksi harian.
Helmi manilai, pangawasan malalui sistem digital sangaik paralu untuak mancegah panyalahgunaan BBM basubsidi. Inyo juo maapresiasi salah ciek SPBU di Kabupaten Solok nan alah malakukan pangawasan internal ka kendaraan nan dicurigoi malakukan palangsiran BBM.
“Langkah ko mambukikan bahaso pangawasan nan konsisten dapek manjadi caro nan efektif untuak manakan panyalahgunaan BBM basubsidi di lapangan,” kato Helmi. (Tan Parpatiah)
