Padang — Alhamdulillah, sasudah lumpuah salapeh sahari dek musibah longsor, kini jalur utamo di Lembah Anai lah dapek dilalui baliak sacaro normal.
Jalan nan manghubuang Kota Padang jo darek Minangkabau ko sampat putuih total salamo hari Rabaa patang lantaran tatimbun tanah, batu gadang, jo batang kayu nan runtuah ka badan jalan.
Salamo jalan ko indak dapek dilalui, urang banyak nan biaso lalu-lalang di Lembah Anai tapaso mancari jalan lain, ado nan mamutar malalui Solok jo ado pulo nan mamiliah jalur Maninjau untuak mancapai tujuan.
Masuak hari Kamih, sasudah sagalo material longsoran dibarasiahkan dek patugas, arus lalu lintas lah dibukak baliak dari duo arah.
Pambukakannyo dilakukan sacaro baansua ansua, mulai dari sistem buka-tutuik sajalur sampai jalan dipastikan aman untuak dilalui.
Kasat Lantas Polres Padang Panjang, AKP Pifzen Finot, manyabuikkan bahwasanyo proses pembersihan material longsor lah salasai dilakukan pado Kamih dini hari.
“Material longsor lah salasai dibarasiahkan pado Kamih dini hari. Sasudah itu jalan dibukak sajalur jo sistem buka-tutuik. Kalau jalan lah bana-bana basiah, lalu lintas dibukak baliak duo arah,” kayo nyo.
Longsoran nan manutuik jalan ko tajadi di kilometer 66 kawasan Lembah Anai. Tanah, batu, jo batang kayu manimbun badan jalan hinggo indak dapek dilalui kandaraan.
Untuangnyo, dalam kajadian ko indak ado kandaraan ataupun urang nan tajadi korban dek timbunan longsor.
Meskipun jalan lah dibukak baliak, pihak kapolisian tatap maimbau suoayo para pangandara indak lalai. Kawasan Lembah Anai masih tagolong rawan, apolai lai pado musim hujan nan sarik mangakibatkan tanah labil jo batu runtuah dari bukik di sakaliliang jalan.
“Kami mangarokkan agar para pangandara tatap barhati-hati jo mangutamokan kasalamatan salamo dalam parjalanan,” tambah AKP Pifzen Finot.
Sabalumnyo, Walikota Padang Panjang, Hendri Arnis, juo turun langsung ka kawasan Silaiang pado hari Rabu untuak mancaliak kondisi longsoran.
Inyo mangimbau masyarakat nan ka malalui jakur Lembah Anai supayo salalu waspada jo mancari informasi kondisi jalan sabalun barangkek.
“Sabalun malalui Lembah Anai, eloknyo cari dulu informasi tantang kondisi jalan jo parhatikan cuaco. Jan sampai parjalanan nan dicari malah mandatangkan bahayo,” ujar Hendri Arnis ka awak media di Padang Panjang.
Kini, arus lalu lintas di Lembah Anai lah baliak lancar. Namun, masyarakat dimintak untuak tatap manjago kewaspadaan, dek alam indak bisa ditakok, cuaco indak bisa dipakirokan.
Bak kato pepatah Minangkabau, sadio payuang sabalun hujan, sadio jalan sabalun malangkah. (Tan Parpatiah)
