Padang — Di nagari-nagari Asia, tamasuak Indonesia, Tiongkok jo Jepang, posisi jongkok atau mancongkong ah manjadi bagian dari kahidupan saari-hari. Mulai dari wakatu ka kakuih nan masih mamakai kloset jongkok, basantai jo kawan-kawan, sampai manunggu angkutan umum, posisi ko lah lazim se dipakai dek masyarakat.
Namun baru-baru ko, dunia maya diramaikan dek video wisatawan asing nan mancubo maniru caro urang Asia mancongkong. Banyak di antaro urang tu nan indak takao manahan kasaimbangan badan. Ado nan jatuah ka balakang, ado nan tagokek ka sampiang, bahkan ado nan musti bapacik ka dindiang supayo indak tagolek.
Manga urang Asia umumnyo labiah mudah mancongkong, samantaro banyak urang Barat kasulitan malakukannyo?
Profesor Christopher Powers, pakar gerakan manusia dari Universitas Southern California, Amerika Sarikat, manjalehkan baso mancongkong sabananyo marupokan salah satu gerakan dasar nan paling penting dalam kahidupan manusia.
“Banyak kagiatan saari-ari nan indak dapek dipisahkan dari gerakan mancongkong. Duduak di kursi, turun dari oto, di kakuih, ataupun mangamehi barang nan jatuah ka lantai, sadonyo pakai pola gerakan nan sarupo,” kecek profesor ko.
Manuruik Powers, jongkok dalam barbeda jo gerakan squat nan biasa dilakukan di pusat kabugaran. Dalam posisi ko, pinggang turun labiah randah dari lutuik, samantaro badan tatap tagak jo saimbang.
Samantaro tu, Matt Hsu, palatiah mobilitas jo kabugaran, mangatokan istilah “Asian Squat” sabananyo kurang pas. Sabab, posisi mancongkong ado lo di Afrika, Eropa Timur, jo banyak wilayah lain di dunia.
“Urang Afrika bisa mangatokan itu budaya nyo. Nagari-nagari Slavia di Eropa Timur juo bisa mangakuinyo. Sabananyo, iko adalah posisi alami manusia,” kato wee.
Hsu manarangkan baso jongkok mambutuahkan kalenturan nan baiak di bagian pinggang, lutuik, jo pargelangan kaki. Karano itu, indak sadonyo urang nan lah lamo hiduik dalam budaya duduk di kursi sanggup malakukannyo.
Babagai panalitian juo manunjuakkan baso mancongkong mampunyoi banyak manfaat untuak kesehatat. Di antaro nyo adalah maningkekkan kalenturan tubuh, manjago mobilitas sandi, mangurangi nyari pungguang, sampai mambantu awak tatap aktif hinggo usia lanjuik.
Namun kini, gaya hiduik modern nan labiah banyak duduk di kursi jo mamakai kloset duduk mambuek banyak urang mulai kahilangan kamampuan alamiah tu.
“Kalau indak biaso bajongkok, lambek-laun kamampuan itu akan hilang,” ujar Powers. (Tan Parpatiah/bbc)
