Malalak – Untuak mauruih karajo mampaelok jalan, jambatan, irigasi nan tandeh ulah dek galodo di Sumatera ko, Kementerian Pekerjaan Umum (PU) alah manyerap sampai 40 ribu tanago karajo tamasuak di Sumatera Barat.
“Kami alah mampakarajoan 40 ribu buruh lokal untuak manangani dampak bencana nan tasebar di tigo provinsi,” kecek Menteri Pekerjaan Umum Dody Hanggodo kutiko manyilau lokasi galodo di Palembayan jo Malalak lun lamo ko.
Basamo Gubernur Sumbar, Wakil Ketua Komisi VI jo Bupati Agam manyilau kondisi langsuang pambangunan sajumlah infrastruktur nan punah rarah dek bencana galodo bulan November nan lapeh.Ke cek mantari ko, salain mampacapek pamulihan Sumatera, penyerapan puluahan ribu buruh lokal juo marupokan langkah dek pamarentah untuak mampacapek patumbuahan ekonomi, tarutamo di nagari-nagari.
“Jadi sakali marangkuah dayuang, duo tigo utang tabayia, karajo mampaelok jalan, irigasi jo jambatan dipacepek, ekonomi juo baransua tatolong karano masyarakaik nan kahilangan karajo dek sawah jo ladang atau lapu nyo hancua, sebagian bisa bakarajo di proyek-proyek rehabilitasi tu,” kati Gubernur Sumbar Mahyeldi Ansharullah nan mandampingi Mantari PU.
Kecek mantari PU Dody, instruksi untuak manyerap tanago karajo lokal partamo kali disampaikan pado 12 Desember 2025 di Provinsi Aceh dan harus juo dilakukan di Sumatera Barat.
“Jadi, harus banyak tanago karajo, tarutamo di lokasi bencana,” katonyo.
Kabijakan Kementerian Pekerjaan Umum juo sasuai jo arahan Presiden Prabowo Subianto, nan mamintak supayo ekonomi masyarakaik di katigo provinsi nan kanai musibah ko dapek sacapeknyo bagerak.
“Sasuai jo arahan Presiden Prabowo, urang-urang nan kanai bencana indak buliah ekonominyo taganggu,” katonyo.
Samantaro itu, Pangawas Kesehatan, Keselamatan, Keamanan dan Lingkungan Hidup PT Hutama Karya Infrastruktur Budi Setia mangatokan bahaso khusus di Kecamatan Malalak, perusahaannyo alah mampakarajoan 16 urang buruh lokal.
“Kami juo sadang marekrut buruh lokal untuak mampacapek pemulihan daerah nan kanai bencana,” kato Budi.
Puluahan buruh lokal bakarajo sabagai supir truk nan ditugaskan untuak maangkuik jo mamindahan bahan sarato sabagai pambantu. Untuak proses rekrutmen itu sandiri, Hutama Karya bakoordinasi jo pamarintah camat untuak manyiapkan kabutuhan tanago karajo.
“Maagiah kesempatan kapado buruh lokal adolah salah satu standar atau ketentuan parusahaan nan harus manyatokan sakitar 40 persen panduduak lokal,” katonyo. (tan parpatiah)
