Padang Panjang — “Ambo agiah wakatu sabulan, tolong iyo bana dibenahi rumah sakik ko,” kato Walikota Hendri Arnis kutiko mencaak nyo datang ke RSUD Padang Panjang untuk memareso, hari Akaik patang. Nyo datang dek ado nan maagiah laporan baraso banyak keluhan pasien taradok layanan rumah sakik ntun,
Hendri Arnis langsuang menyilau ciek-ciek ruangan layanan dan badialog jo babarapo pasien menanyokan baa layanan pengelola rumah sakik ko.
Banyak keluhan ruponyo. Makonyo kapado Direktur RSUD dr. Irwanto ditakanankan bana dek Walikota supayo mamparatian keluhan pasien tarutramo nan kamambuek nilai layanan rumah sakik rusak. Sudah tu Walikota nan didampingi dek Kapalo Dineh Kesehatan dr. Sonya Themiarto mamareso kondisi fasilitas, kebersihan ruangan, sampai lai atau indaknyo tasadio alaik-alaik kesehatan.
Manuruik Walikota Hendri Arnis, rumah sakik ko mesti membuek urang jadi sehat, bukannyo batambah sakik lantaran pelayanannyo asal-asalan sajo. “Standar layanan tu kan jaleh, ado fasilitas nan memadai, keramah tamahan dan indak manyulikan pasien nan datang untuk barubek,” kato Hendri Arnis.
Tamasuak nan diingekan dek Walikota ko ka Direktur RSUD supayo mamparatian bana tata kelola jo kinerja sumber daya manusianyo. Sebab manuruknyo, layanan nan baiak tu datang dari tasadionyo SDM nan baiak pulo.
“Karano tu awak agiah wakatu sabulan untuak mampaeloki layanan tumah sakik ko kapado Direktur basarato jo anak buahno, sasudah tu akan dievaluasi baliak, lai dikarajoan atau indak instruksi ambo ko,” kato Walikota nan biaso disapo jo sapoan ‘mas bro’ tu. (tan parpatiah)
Benahi Layanan! Direktur RSUD Padang Panjang Diultimatum dek Walikota
