Padang — Indak kurang dari 25 tampek pambalakan lia (illegal logging) basobok dek Tim Advokasi Keadilan Ekologis Wahana Lingkungan Hidup Sumbar di kawasan konservasi Suaka Margasatwa Bukit Barisan sasudah galodo gadang nan malando Sumatera Barat pado akhir November 2025.
Tamuan ko disampaikan dalam konferensi pers Tim Advokasi Keadilan Ekologis Sumatera Barat di Padang, hari Jumaik nan lapeh (8/5/2026). Kato Direktur WALHI Sumatera Barat, Tomi Adam, indikasi rusaknyo rimbo tampak jaleh wakatu kayu-kayu gadang jo tunggua bakeh ditabangan tu hanyuik sampai ka pasisia Kota Padang wakatu banjir gadang tarjadi.
“Fenomena tunggul kayu nan hanyuik sampai ka pasisia Kota Padang manandokan bahaso kayu tu barasa dari hulu DAS Kuranji jo DAS Aia Dingin,” kato Tomi.
Manuruik inyo, hasil panalusuaran labiah lanjut manunjuakkan bahaso kawasan hulu DAS Aia Dingin, nan juo tamasuak wilayah Suaka Margasatwa Bukit Barisan, alah dibukak sacaro masif. “Satidaknyo ado 25 titik illegal logging di kawasan konservasi ko,” kato e.
Tomi manilai karusakan rimbo di Sumatera Barat ko bukannyo kajadian sakali lalu, tapi alah baulang-ulang dek lamahnyo pangawasan pamarintah.
Inyo juo manyoroti parubahan tata guna lahan di Kecamatan Palembayan, Kabupaten Agam, nan dulunyo marupokan kawasan rimbo, kini alah barubah jadi kabun sawit. Manuruiknyo, kondisi ko mambuek daya dukuang lingkungan manurun, sahinggo mamparah dampak bencana ekologis.
“Di DAS Masang Kanan ado duo HGU sawit nan sabalunnyo manjadi panyabab bencana ekologis di Palembayan, yaitu PT Pelalu Raya jo PT Inang Sari. HGU kaduonyo malah alah dicabuik pamarintah,” kato Tomi.
Salain illegal logging jo ekspansi kabun sawit, Tim Advokasi Keadilan Ekologis Sumbar juo manyoroti angko deforestasi di Sumatera Barat nan taruih naik dalam babarapo taun tarakhir.
Data nan dipaparkan manunjuakkan luas tutupan rimbo di Sumbar turun dari 1.861.962 hektare pado 2021 manjadi 1.822.810 hektare pado 2024. Samantaro tu, angko deforestasi naiak dari 9.022 hektare pado 2021 manjadi 11.552 hektare pado 2024, lalu malonjak tajam manjadi 26.940 hektare pado 2025.
Perwakilan Tim Advokasi Keadilan Ekologis Sumbar, Adrizal, manyabuikkan kondisi ko manandokan ado pambiaran taradok karusakan lingkungan di Sumatera Barat.
“Bencana akhir November 2025 ko bukannyo samato-mato anomali cuaco, tapi juo akibat pola pambangunan ekstraktif jo maagiah surek izin nan indak sandereh,” kato Adrizal.
Inyo manilai lamahnyo pangawasan taradok aktivitas kahutanan, partambangan, jo perkabunan manjadi salah satu panyabab utamo makin buruaknyo kondisi lingkungan di Ranah Minang.
Dek sabab itu, korban galodo kini manggugat 12 pajabat pamarintahan malalui mekanisme citizen lawsuit, atau gugatan warga nagari.
Dalam gugatan tu, para korban mamintak pamarintah malakukan evaluasi manyaluruah tarhadap tata kalola lingkungan, panagakan hukum kapado palaku kajahatan kahutanan, sampai pamulihan kawasan rimbo jo daerah aliran sungai. (Tan Parpatiah/KCM)
