Kiro-kiro tahun 80-an ado sabuah kampuang nan banamo Koto Ilalang. Kampuang tasabuik acok dilando banjir apobilo musim panghujan tibo sarupo tamu ndak diundang. Masyarakat pun maraso cameh dengan situasi sarupo itu.
Akhirnyo kapalo kampuang mancari tampek yang jauah dari ancaman banjir. Kapalo kampuang masuak rimbo kalua rimbo, masuak hutan kalua hutan, tapi hasilnyo tetap hampo. Inyo indak pernah putuih aso, inyo taruih manjalajahi hutan untuak kaparaluan masyarakatnyo. Sasudah saminggu manjalajahi hutan, akhirnyo kapalo kampuang manamuan tampek dakek hutan nan pamandangannyo sangaik rancak.
Di situ tadanga suaro kicauan buruang nan sangaik merdu dan kayu-kayu malambai-lambai manutuikan gunuang-gunuang nan manjulang tinggi. Di sampiang gunuang itu mailialah sabuah sungai nan janiah. Aianyo dingin, ikannyo banyak sahinggo banyak binatang buruan di sinan.
Sado panduduak bakameh-kameh untuak mambao barang nan bisa diangkuik jo mambao makanan untuak dimakan di jalan. Sasampai di situ, panduduak mambuek rumah jo paralatan saadonyo. Panduduak mamakai kayu-kayu nan ado di situ untuak mambuek rumah. Mereka saliang tolong-manolong sahinggo karajo tasalasaian dengan capek. Sudah tu, kapalo kampuang mangumpuan sagalo panduduak untuak mambari paringatan.
Sasudah mandanga paringatan tasabuik, sado warga mulai berhati-hati dan malarang anak-anak untuak bamain di dakek hutan. Di kampuang Koto Timpeh, sagalo panduduak manjalani hari-harinyo dengan tantram, makmur, jo nyaman. Indak jarang pulo panduduak malakukan gotong-royong di daerahnyo, sadonyo warga saliang ingek-maingekan untuak hal nan elok.
Suatu katiko, ado surang anak mudo yang banamo Sutan Rajo nan tingga jo amak dan adiaknyo. Adiaknyo banamo Puti Kasumbuah. Sutan mamiliki hobi baburu karano sejak ketek inyo diajaan dek apaknyo. Katiko inyo barumua 10 taun, ayahnyo maningga.
Katiko inyo handak pai baburu, inyo maliek saikua kijang nan elok parasnyo di sabarang batang aia dakek Hutan Bulian. Sutan manjadi panasaran. Ado raso ragu sarato takuik manyabarang batang aia itu. Inyo masuak ka dalam hutan tu dan maliek kijang sadang mangunyah daun-daun dakek sabatang pohon. Katiko inyo mambidiak anak panah, inyo maliek sasosok jantan nan inyo kenal, lalu diturunkannyo anak panah dan balari mangaja urang tu.
Hari pun samakin sanjo, inyo samakin yakin jo sosok jantan nan inyo liek adolah ayahnyo. Sutan balari mangaja sampai tajatuah dan taluko, tapi inyo indak amuah kahilangan jajak jantan tu. Hinggo sampailah di sabuah pohon yang sangaik gadang dan rindang. Di sinanlah ayahnyo nampak tagak, lalu mahilang antah ka mano. Sultan tagak tamanuang.
Lalu, inyo maingek kecek kapalo kampuang, inyo baru takana bahaso batang kayu yang ado di hadapannyo kini adolah pohon bulian. Sakatiko tajadi badai gadang, inyo barusaho mancari jalan kalua, tapi badai gadang tu mambuek pohon-pohon di sakitarnyo tumbang. Indak ado pilihan lain selain bataduah di bawah pohon bulian yang gadang tu. Katiko inyo tagak di bawah pohon tu, badannyo taraso kaku dan palahan tubuahnyo barubah manjadi kayu.
Hari nan samakin sanjo mambuek amak Sutan samakin cameh karano Sutan alun pulang. Lalu, amaknyo mancari Sutan ka sinan ka mari sambia manangih, tapi indak ado manamukannyo. Malam tu juo para panduduak mambantu untuak mancari Sutan. Lalu, ado saurang panduduak bapandapek untuak batanyo ka Datuak Lisuik. Datuak Lisuik alah tanamo orang yang santiang dalam sagalo hal. Talabiah Datuak Lisuik adolah orang nan manjago daerah di Koto Timpeh.
Amak Sutan pai ka rumah Datuik Lisuik untuak mananyoan dima anaknyo kini. Datuak Lisuaik manyabuikan anaknyo alah manjadi batang kayu Bulian. Mandanga kecek Datuak Lisuik, amaknyo manangih.
Hari baganti hari, amaknyo mambayangkan sosok anaknyo taruih. Biasanyo karajo di rumah ado nan manolong. Kini karajo indak ado nan manolong inyo lai dan sagalo karajo taraso barek.
Manjalang patang amaknyo dan adiaknyo pai ka batang aia untuak mancuci baju. Indak taraso azan Magrib sabanta lai ka bakumandang, tapi amaknyo alun juo salasai. Katiko inyo nak baliak, inyo indak sadar anak yang inyo baok bukanlah anaknyo, malainkan anak panduduak bulian yang manyarupai anaknyo Puti Kasumbuah.
Sajak pulang dari batang aia, amak Sutan maraso ado yang barubah jo anaknyo. Mancaliak kaadaan anaknyo nan lain, inyo maraso cameh. Puti Kasumbuah indak mancaliakan tingkah yang biasonyo. Badan Puti Kasumbuah acok angek, amaknyo mambuekan ubek tradisional tapi angeknyo indak kunjuang kurang. Amaknyo Puti Kasumbuah takana jo Datuak Lisuik. Inyo langsuang manamui Datuak Lisuik.
Tibo di sinan, Datuak Lisuik maagiah saboto aia, untuak diminuman ka Puti Kasumbuah. Sasudah maminum aia yang diagiah Datuak Lisuik, angek badan Puti Kasumbuah mulai bakurang, amaknyo maraso sanang hati.
Bara hari kamudian Puti Kasumbuah sakiknyo samakin manjadi. Amaknyo manjadi cameh dan manamui Datuak Lisuik tu baliak. Agak ragu-ragu, Datuak Lisuik manyabuikan bahasonyo anaknyo alah tatuka jo anak panduduak Bulian. Hanyo ado ciek caro yang bisa mambaliakan Puti Kasumbuah manjadi sarupo dulu, yaitu malakukan upacara pagantian.
Amak Puti Kasumbuah dan Datuak Lisuik manamui kapalo kampuang untuak malakukan upacara pagantian tasabuik. Kapalo Kampuang mangatokan bahasonyo upacara tasabuik mampataruahkan nyawo Datuak Lisuik. Datuak Lisuik satuju jiko itu caro satu-satunyo untuk mambaliakkan Puti Kasumbuah walaupun angok Datuak Lisuik lah manjadi taruhannyo.
Pagi manjalang, ayam bakokok dan matohari mulai mancaliakan sinarnyo. Upacara langsuang dikarajoan. Akhianyo, Puti Kasumbuah baliak ka pangkuan amaknyo. Tibo-tibo ado salah saurang panduduak maagiah tau bahasonyo Datuak Lisuik alah maningga.
Karano Datuak Lisuik alah maningga, banyak kajadian aneh yang tajadi di Koto Timpeh.
Contohnyo, katiko panduduak ado acara baralek dan indak ado mangecek ka panduduak Hutan Bulian, panduduak Bulian mangamuak dan mangacauan acara tasabuik. Gulai-gulai yang sadang di ateh tungku nan masih angek dan di bawahnyo masih ado api, bisa basi dalam sakatiko. Nasi yang dimasak ilang antah ka mano dan banyak urang nan karasukan.
Samanjak kajadian itu, panduduak Koto Timpeh satiok mangadoan acara, inyo harus mangecek ka panduduak Hutan Bulian karano mereka takuik ka ado kajadian aneh nan alah tajadi sabalumnyo.
Satiok panduduak yang ingin manabang batang kayu bulian, inyo harus maminta pasatujuan talabiah dahulu kapado panduduak Bulian karano jiko inyo malakuan itu indak ado pasatujuan dari panduduak Bulian, urang tasabuik manjadi sakik-sakikan.
Sairiang bajalannyo wakatu, Hutan Bulian yang dulunyo banyak ditumbuahi oleh batang kayu, kini hanyo tingga babarapo batang kayu sajo untuak dilestarikan. Kapacayoaan panduduak Koto Timpeh alah mulai bakurang. Tapi inyo taruih mayakini bahasonyo panduduak Hutan Bulian tu masih ado sampai kini. Untuak itu, panduduak sakitar malarang urang- urang nan ingin manabang batang kayu siso Hutan Bulian.
*Carito ko diambiak dari Kumpulan Carito Rakyat Minangkabau nan ditabikan dek Dinas Pendidikan dan Kebudayaan Provinsi Sumatera Barat taun 2016.
