Batusangka – Salain ka untuak manjago diri, silek juo baguno untuak mamaliharo kekompakan jo persatuan, Silek punyo fungsi strategis dalam mambina anak-anak mudo, mulai dari malatiah fisik, sampai mambantuak mental jo moral nan elok.
“Silek Kumango dikenal sabagai salah satu gaya silek nan bakambang di Tanah Datar sarato marupoan bagian pantiang dari identitas budayo Minangkabau, paralu dilestarikan,” kato anggota Komisi XIII DPR RI Shadiq Pasadigoe, lun lamo ko di Batusangka.
Manuruik Sadiq, pembinaan silek dapek manjadi ruang untuak pandidikan karakter karano maajakan disiplin, sopan santun, hormat kapado guru, jo kontrol diri.
“Silek adolah pendidikan karakter. Nilai-nilai iko sabana diparalukan dek generasi mudo maso kini di tangah parubahan sosial jo tantangan sosial,” katonyo.
Inyo manambahkan, manjago budayo lokal juo baparan dalam mampakuek identitas nasional sambia manjago kasinambungan nilai-nilai nasional pado tingkek masyarakaik.
Ekskul Wajib
Di seluruh SMA, SMA jo SLB di Sumatera Barat kini alah ditetapkan baraso silek wajib manjadi ektra kurikuler. Nan dimukasuik silek tu adolah silet tradisi Minangkabau. Bulan nan lapeh Wakil Gubernur Vasko Ruseimy nan juo Ketua IPSI Sumatera Barat lah maumumkan ekskul wajib soal silek tu ka masyarakat tarutamo manakankan ka sekolah-sekolah.
“Hari ko awak ndak lai Cuma bacarito, tapi Silek Tradisi Minangkabau resmi wak hadirkan di sekolah sebagai bagian dari pendidikan karakter. Silek ko adolah kebanggaan Ranah Minang nan musti wak hiduikkan basamo,” kato Vasko.
Kato Vasko kabijakan ko diambiak indak hanyo untuak maajakan pertahanan diri ka anak didik, tapi juo untuak mambantuak karakter, etika jo identitas generasi mudo Minangkabau. Iko juo manandoan palaksanaan ekstrakurikuler silek tradisional sacaro sarantak di saluruah kabupaten jo kota di Sumatera Barat.
“Silek tradisional Minangkabau manganduang nilai-nilai mulia adaik, musyawarah, etika sosial jo spiritualitas nan sajalan jo falsafah tradisional adat basandi syarak, syarak basandi Kitabullah. Malalui pandidikan formal, nilai-nilai iko diharokkan dapek bakarek kuek sajak usia sikola,” kato Wagub mudo ko.
Nyo juo manyatokan komitmen Pemprov Sumbar untuak mambaliakan kamuliaan silek tradisional nan sebagian lah digaruih dek zaman. Manuruiknyo, malalui generasi mudo, silek Minangkabau harus populer baliak jo manjadi identitas nan bisa dibanggakan, indak hanyo di tingkek nasional, tapi juo sacaro internasional.
Kapala Dineh Pendidikan Provinsi Sumbar, Habibul Fuadi manarangkan pulo barasao pelaksanaan ekstrakurikuler wajib silek tradisi ko sabananyo lah dimuloi sajak awal tahun ajaran baru pado Juli 2025 nan lapeh namun alun terstandarisasi. “Kini sadang wak susun modul pembelajaran nan terstandar,” kato Habibul. (tan parpatiah)
