Padang — Kaba baiak untuk masyarakaik nan salamo ko main tambang lia, ndak lamo lai pamarentah ka maatur bana urusan tambang rakyat ko, sahinggo indak marusak lingkungan dan dapek manfaatnyo dek masyarakaik sacaro basam-samo, indak main surang-surang doh.
Kapolda Daerah Sumatera Barat, Inspektur Jenderal Pol. Gatot Tri Suryanta, hari Salasa patang lah basobok jo Mantari Energi dan Sumber Daya Mineral (ESDM), Bahlil di Jakarta. Datang bana Kapolda ka kantua Mantari ntun untuk mampaiyo mampatidokan urusan tambang nan salamo ko banyak lia tu.
Dalam rapek tu, diputuihkan baso panantuan Kawasan Pertambangan Masyarakat (WPR) musti ado di tiok daerah. Iko musti dibuek dulu, dan ditargetkan lah salasai pado awal Februari bisuak.
Rapek nan juo dihadiri dek Dirjen Mineral jo Batubaro ko manjadi titiak tarang untuak legalitas panambangan di babagai aerah, tamasuak di nagari awak, Sumatera Barat.
Kecek Kapolda Sumbar, Mantari Energi jo Sumber Daya Mineral alah mamarentahkan staf nan takaik untuak sugiro manyalasaikan sagalo soal teknis tarutamo alat teknis.
“Sacaro teknis, nanti Pemprov basamo-samo jo Kementerian takaik akan manyampaikan syaraik-syaraiknyo,” kecek Kapolda Sumbar tu sasudah rapek di Kementerian ka babaro wartawan.
Panyalasaian WPR ko adolah langkah partamo untuak pangaluakan Izin Pertambangan Rakyat (IPR). Tujuan utamo dari langkah ko adolah untuak malegalkan kagiatan urang-urang nan salamo ko malakukan panambangan sacaro lia, bak kato ati e je. Dengan caro iko, tambang lia tu dilegalkan sasudah mamanuhi syarat-syarat nan ditantukan sahinggo inyo dapek masuak ka dalam mekanisme formal nan diakui dek nagara.
Kalau manuruiknyo Gatot, iko adolah jalan nan paliang rancak nan ditampuah pamarentah nan bisa maagiah manfaat dari duo sisi, patamo mamakmurkan rakyaik, dan kaduo manjago lingkungan hiduik, rimbo jo alam. (*)
