Situjuah — Peristiwa dibunuahnyo 69 syuhada atau pejuang Indonesia nan tajadi tanggal 15 Januari 1949, pado hari Kamih patang (15/1/2026) diperingati dek masyarakaik Situjuah jo Pamarentah Kabupaten Limopuluah Kota sarato Pamarentah Provinsi Sumatera Barat.
Upacara di lapangan Nagari Situjuah lah manjadi tradisi satiok tahun pado tanggal 15 Januari, tarutamo dek masyarakat Situjuah Limo Nagari. Peristiwa Situjuah, mantun sabutan nan lah manjadi kebiasaan dek masyarakat selalu peringati jo hati sadiah bacampua sumangaik managakkan NKRI ko.
Peristiwa Situjuah adolah kajadian kutiko sardadu Ulando manyarang pejuang-pejuang kamardekaan Indonesia di Situjuah Batua, pado tanggal 15 Januari 1949, kutiko Pamarentah Darurat Republik Indonesia (PDRI) sadang mamacik. Kutiko tu pamarentah pusek ndak bisa bajalan lantaran pemimpin-pemimpin Soekarno-Hatta dkk ditangkok Ulando dan diasiangkan ka Pulau Bangka.
Dalam kajadian 15 Januari 1949 tu pejuang-pejuang nan dipimpin dek Chatib Soelaiman sadang maadokan rapek untuk maatur strategi malawan Ulando. Tibo-tibo, rapek nan sangai dirahasiokan tu disarang dek Ulando. Diketahui kudian ado nan kianaik diantaro tantara rang awak, maagiah bocoran ka pihak Ulando.
Ndak dapek mailak laii, disarang tibo-tibo dari babagai arah, mako gugurlah 69 urang pejuang manjadi syuhada tamasuak Chatib Sulaiman jo Bupati Arisun Sutan Alamsyah, Letkol Munir Latief, Kapten Tantawi.
Dari curito masyarakat nan selamat, sarato dari buku-buku sejarah dapek dibaco baraso para pajuang ko disergap katiko ka pai sumbayang subuah, nan maakibaikan kamatian pamimpin-pamimpin pejuang tu.
Kecek Ketua Dewan Harian Daerah Angkatan 45 Sumatera Barat, Ki Jal Atri Tanjung, lah patuik rasonyo Chatib Sulaiman tu disahkan dek negara sebagai Pahlawan Nasional. “DHC Angkatan 45 LImapuluh Kota, DHC Angkatan 45 Padang Panjang sarato DHC Angkatan 45 Tanah Datar mesti mendorong pamerintah daerah masing-masing untuk mendesak pamarentah pusek menetapkan Chatib Sulaiman sabagai Pahlawan Nasional,” kato Ki Jal Atri Tanjuang kutiko malantik pengurus DHC BPK 45 Limapuluuh Kota. DHC Tanahdatar, DHC Padang Panjang jo Plt.DHC Sijunjung sasudah upacara tu.
Namo Chatib Sulaiman lah diabadikan manjadi namo jalan di babaro kota, namo lapangan di Padang Panjang tamasuak namo lapangan di Jorong Tangah Nagari Situjuah Batua, Keamatan Situjuah Limo Nagari kini diagiah namo Lapangan Chatib Sulaiman untuak maingek pengorbanan almarhum.
“Tarimokasih masyarakat Situjuah, iko lah manjadi kampuang kaduo kami jo keluarga, satiok tahun dari umua ambo masih mudo tiok 15 Januari ambo kamari,” kato Sudarman Chatib, anak laki-laki Chatib Sulaiman dan barasa dari Nagari Sumpun Tanah Datar tapi tingga di Padang Panjang.
Kutiko upacara Kami patang tu, hadir Pemprov Sumbar nan diwakili dek Asisten Pemerintahan dan Kesejahteraan Sosial Ahmad Zakri, Bupati Limapuluh Kota Safni Sikumbang, Wakil Bupati Limapuluh Kota Ahlul Badrito Resha, Forkompimda, Wakil Walikota Payakumbuah dan perwakilan dari babagai Kabupaten/Kota se Sumatera Barat. Tamasuak para pengurus Dewan Harian Angkatan 45 dari Provinsi maupun Kabupaten/Kota.
Inspektur Upacara (Irup) untuk upacara Peringatan Peristiwa Situjuh ke-77, Bupati Limapuluh Kota Safni Sikumbang maingekan urang nan banyak, bahwa paralu mandalami makna sejarah nan didapek dari peristiwa ko. Tarutamo, dalam usaho mampatahankan kamardekaan Indonesia di tangah-tangah agresi militer Ulando.
“Baliau-baliau nan manjadi syuhada 77 tahun nan silam di siko baparang untuak mampatahankan kamardekaan Indonesia, bahkan sampai jiwa raga beliau-beliau tu dikorbankan beliau untuk Indonesia nan kito nikmati kini ko,” kato Bupati ntun.
Kecek Bupati Safni, peristiwa Situjuah nan baumua 77 tahun ko jan hanyo diperingati sebagai bagian dari sejarah lokal. Tapi inyo adolah peristiwa nan ndak lapeh dari rantai sejahar kemerdekaan Indonesia.
“Karano Peristiwa Situjuah ko marupokan bagian dalam rantai kajadian Pemerintah Darurat RI (PDRI) di Sumatera Tengah, itu kajadian nan sangaik paik dimano tajadi mendadak dek Ulando,” katonyo. (*)
