Siapo Alang Palabah? Banyak nan indak tau dek tokoh nan populer ko sahinggo paralu diangkek manjadi karya tulih dari carito rakyat manjadi karya tulih carito rakyat dari Sungai Pagu. Alang Palabah iyolah tokoh terkenal dalam pajalanan Alang Palabah jo Inyiak Kurang Aso Anam Puluah ka Bandalakun. Alang Palabah talibat dalam sabuah kagiatan ka Bandalakun. Tokoh Alang Palabah ko dikana di tigo nagari, yaitunyo Sungai Pagu, Alam Pauh Duo, jo Pasisia Banda Sapuluah.
Alang Palabah dalam carito iko adolah surang tokoh nan pantiang bana di bidang maliter Karajaan Pagaruyuang, dulunyo inyo iyolah surang jawara, sabana disagani dek kawan jo lawan sabalun dilantiak manjadi pasukan khusus dek pihak Karajaan Pagaruyuang. Maso ketek Alang Palabah indak ado nan tahu. Inyo acok talibat dalam bamacam kakacauan di kampuang katiko masih mudo, makonyo diagiah gala Alang Palabah. Jikok alang mangganggu sarang labah, tantu labah kalua bahamburan ka mano-mano karano takuik. Biasonyo labah ko takuik dek dikana ganas ka manggigik satiok nan basobok, baiak binatang atau manusia.
Manuruik tuturan dari urang tuo-tuo, basonyo pado suatu maso di Nagari Pariangan sajak mulo bakambang masyarakaik MinangKabau, bateba jo bakambang ka babagai daerah sakitar nan alun ditaruko jo ditampati sahinggo manyeba ka wilayah-wilayah nan ado kini.
Panyebaran ko dimulai dari malakukan kagiatan duo mato angin sahinggo kagiatan ka timur tibolah duo daerah baru, yaitunyo Dusun Tuo Limo Kaum jo Bungo Satangkai di Sungai Tarab. Adopun kagiatan ka arah Barat nan dikana jo kagiatan batipuah daerah pakampuangan partamo adolah Nagari Sabu. Sasudah kagiatan itu barhasil, makonyo samakin banyak lo kalompok-kalompok nan dibantuak rajo untuak mancari jo manamuan daerah-daerah baru dan dijadian untuak pamukiman baru dek anak kamanakan nantinyo nan taruih bakambang jo batambah banyak.
Di antaro kalompok-kalompok kagiatan maso itu nan barangkek dari Pariangan adolah kalompok Inyiak Nan Salapan. Basamo jo rombongan itu ado surang tokoh banamo Sutan Nan Qewi Majoano.
Barikuik namo-namo dalam rombongan inyiak nan salapan, yaitunyo Rajo Sarok, Ramang Putiah, Ramang Itam, Candi Aluih (Niniak urang Malayu), Rabani (Niniak urang Durian), Kumbo (Niniak urang Bariang), dan Indalan (Niniak urang Tigolareh).
Akhianyo sampai di Bandalakun (Sungai Pagu). Rombongan itu barangkek dari Pagaruyuang jo manulusuri Batang Bangkaweh, sudah itu manuju arah selatan, malintasi Batang Kuantan, Batang Hari Muaro Tebo, dan Muaro Bungo (kawasan Batang Hari Ulu). Dari daerah itu rombongan naiak biduak pongkang sampai ka daerah Durian Ditakuak Rajo. Pajalanan dilanjuikan ka ulu batang hari dan akhianyo sampai ka sabuah lambah nan rancak arah kakaun atau disabuik jo bandalakun dakek patamuan antaro duo buah sungai, yaitunyo Batang Suliki jo Batang Bangko (Batang Labuah, dekat Pasar Muarolabuah kini). Inyiak ko mandirian koto partamo sakali nan disabuik Koto Dibauah (Koto Baru).
Samantaro itu, di pusek Pagaruyuang nyo sampai ka piyangan, karano lah lamo jo pai (kagiatan) nan dikomandoi dek Sutan Nan Qewi Majoano dak jo kunjuang baliak. Barito hilangnyo Sutan Nan Qewi Majoano manjadi buah bibia di pusek karajaan sampai akhianyo tadanga jo dek talingo Baginda Rajo Pagaruyuang. Barito tantang hilangnyo Majoano sampai lo ka talingo Sultan, makonyo Alang Palabah dipanggia mahadok Baginda.
“Oi, Alang Palabah, engkau ambo parintahan untuak mancari Majoano sampai basuo,”
“Iyo, Baginda, ambo ka malakuan tugas ko.”
Makonyo Alang Palabah bagarak di saluruah pusek karajaan Pagaruyuang basamo jo anggota pasukannyo. Misi mancari jo mambaok Majoano ka muko Baginda tu sampai lo ka Piyangan, tapi urang nan dicari alun jo basobok lai, sampai akhianyo tibo telek sandi dari mato-mato karajaan nan banamo Sikok Majolelo.
“Oi, Alang Palabah, kami alah dapek apo nan diparaluan, basonyo Majoano pai basamo jo Inyiak Nan Salapan, kini ado di Bandalakun.”
“Ondeh, tarimo kasih banyak, angku alah maagiah tau kaba nangko ka ambo. Iyolah ambo laporan ka Baginda.”
Sudah itu urang tu bapisah, Alang Palabah pai mahadok Baginda. Mandanga laporan dari Telek Sandi, Rajo langsuang mamarintahan Alang Palabah untuak barangkek.
“Oi, Alang Palabah, engkau kumpuan urang nan tabaiak awak, buek rombongan kusus, sudah itu barangkek ka Bandalakun, baok ka siko Majoano iduik-iduik!” parintah Baginda.
“Siap, Baginda,” jawek Alang Palabah.
Sudah itu Alang Palabah mintak izin untuak pai.
“Kalau model itu, awak mohon izin Baginda untuak pai ka Bandalakun,” jawek Alang Palabah. Alang Palabah langsuang manyiapkan anggotanyo.
Kagiatan Pancarian Sutan Nan Qewi Majoano
Ateh titah Baginda Rajo, dibantuak kalompok kagiatan. Kalompok kagiatan nan dibantuak dek Alang Palabah bajumlah anam puluah urang, tamasuak anggota dari agamo nan dipimpin Baruang Agam sabanyak 13 urang, jadi sadoalahnyo bajumlah tujuah puluah tigo urang. Pamimpin kagiatan nan anam puluah urang ko adolah Alang Palabah samo Majolelo. Tim kagiatan iko barangkek manuju Bandalakun
Misi mambaok pulang Majoano. Barita hilangnyo Sutan Nan Qewi Majoano nan sampai ka Bandalakun (Banda arah kakun-Ka Kiyun) bararti ka arah Salatan, samo mambaok baliak pulang ka Pagaruyuang marupoan tujuan paratamo dari kagiatan iko. Kagiatan pancarian Sutan Nan Qewi Majoano di bawah pimpinan Alang Palabah barhasil.
Rombongan tu batamu di Batang Labuah sasudah sabalumnyo inyo tahalang dek pasia nan mambantang di hilia Batang Suliti katiko itu, kini ko daerah itu banamo Pasia Talang (Pasia tahalang) atau tahalang dek lauik pasia di Malayu Kampuang Dalam.
Ajakan Alang Palabah untuak mambaok pulang Sutan Nan Qewi Majoano ka Pagaruyuang mandapek panolakan dari inyiak-inyiak nan di situ samo Sutan itu surang. Sutan punyo alasan, “apo jo nan dicari, di siko buminyo subur, hawa sajuak, aia janiah, ikannyo banyak, daaerahnyo sangek rancak untuak hunian. Untuak samantaro, ambo mamiliah tatap batahan di siko. Mandanga alasan Sutan akhianyo Alang Palabah dapek mamahaminyo. Sabagian dari rombongan iko baliak ka Pagaruyuang, namun sabagian mamiliah bagabuang samo kalompok nan alah dulu ado di Bandalakun.
Kagiatan Alang Palabah ka Bandalakun
Dari Pagaruyuang, rombongan niniak-niniak nan bajumlah 73 urang nan dipimpin dek Alang Palabah ko, bagarak manuju Bandalakun-Sungai Pagu. Rombongan iko bagabuang malakuan pajalanan sampai ka sabuah daerah nan banamo Supayang Sirukam-Solok. Di situ kaduo kalompok iko bapisah sabagian atau inyiak nan anam puluah manaruihan pajalanan ka Bandalakun (Sungai Pagu), sadangkan inyiak nan tigo baleh urang tingga dan akhianyo inyiak ko tahu mambantuak daerah nan dikana jo Kubuang Tigo Baleh di Solok kini.
Samantaro itu, inyiak nan anam puluah urang taruih malanjuikan pajalanan hinggo sampai di Bukik Sipadeh tingga. Salah surang dari inyiak tu jatuah sakik dan tapaso ditinggaan di situ (Alahan Panjang). Tampek Sipadeh maningga adolah Sungai Nanam artinyo tampek ditanam/dikubua dakek Bukik Sipadeh tingga. Sipadeh di Sungai Pagu namonyo Sipadiah, alemunyo tinggi, tamasuak padukunan, alemu itam siluman. Pajalanan dilanjuikan sampai di Surian.
Katiko rombongan itu baranti, salah surang kahilangan pisau, daerah tu diagiah namo Pisau Ilang. Akhianyo rombongan iko tibo di Bandalakun sabanyak 59 urang dek kamanakannyo kini disabuik Inyiak Kurang Aso. Rombongan nan dipimpin dek Alang Palabah akhianyo tibo di Bandalakun. Sampai akhianyo batamu jo Sutan Nan Qewi Majoano di daerah Batang Labuah Pasar Muaro Labuah dakek Koto Baru.
Patamuan jo Sutan Nan Qewi Majoano indaklah murah karano baliau dalam palinduangan Rajo Alam Pauah Duo nan bapusek di sakitar Banuaran, di daerah sakitar Ujuang Jalan-Pakan Salasa. Ajakan Alang Palabah untuak mambaok pulang Sutan Nan Qewi Majoano ka Pagaruyuang mandapek panolakan dari inyiak–inyiak di situ samo Sutan surang. Karano Rajo Pauah Duo ikuik talibat dalam manuruakan Majoano, makonyo pasalisihan jo patampuran indak dapek diilakan.
Tambo Alam Pauah Duo manjalehan basonyo pado suatu maso (kurun wakatu nan panjang) tibo pulo rombongan inyiak dari Pagaruyuang nan mambaok aturan- aturan adaik jo budayo dari karajaan Alam Minangkabau dari Pariaman, Padang Panjang, ka Surambi Sungai Pagu nan maso itu disabuiknyo Lakuak Bandalakun. Rombongan iko indak lain indak bukan adolah rombongan Alang Palabah jo pasukannyo. Rombongan iko tibo dari arah utara manalusuri Sungai Batang Suliki ka arah salatan sahinggo sampai pulo rombongan iko ka Pasia Talang (pasia tahalang). Hamparan padang pasia nan laweh di sakitar Batang Suliki, rombongan tingga di situ karano ado tando-tando bakeh kahidupan.
Lamo kalamoan rombongan mangikuikan jajak rombongan nan dahulunyo di Bandalakun, yaitu rombongan Inyiak Samiak jo Inyiak Samilu Aia dan Inyiak Nan Salapan di bawah pimpinan Inyiak Nan Qewi Majoano.
Alang Palabah samo Sikok Majolelo taruih manalusuri daerah Bandalakun nan katiko itu rombongan ko mambuek basis di Pasia Talang di tapi Batang Suliki-Sigintir. Dalam sabuah panulusuran Alang Palabah sampai di muaro Batang Pulakek, akhianyo rombongan itu sampai di Lubuak Jariang dan batamu babarapo urang panduduak di situ. Ruponyo panduduak nan basobok tu adolah kamanakan dari urang pimpinan di situ, yaitu katurunan Inyiak Samiak jo Inyiak Samilu Aia nan manguasoi wilayah Alam Pauah Duo pado maso itu.
Alang Palabah mancubo mangecek jo masyarakaik nan ado di situ.
“Oi, dunsanak nan tibo siapo kalian?”
“Ambo banamo Alang Palabah, kami tibo dari Pagaruyuang.”
“Apo mukasuik kadatangan tuan-tuan kamari?”
“Mukasuik kadatangan kami adolah untuk manjapuik Majoano.”
Salah surang dari warga manolak, “Indak bisa kami indak ka manyarahan rajo kami ka Tuan.”
“Jan bamain-main jo kami,” Alang Palabah bangih sambia mangancam.
“Rajo kami adolah panguaso saluruah daerah Minangkabau, tamasuak daerah iko.”
Ruponyo pambicaraan samakin angek jo paneh. Salah surang dari panduduak manjawek, “Kami di siko merdeka, indak pernah maraso dikuasai dek karajaan mano pun, ndak parnah ado kekuasaan lain ka daerah kami karano daerah iko (Pauh Duo) kamilah penguasonyo.”
Mandanga itu, Alang Palabah ndak bisa manahan amarahnyo, meraso Rajo Pagaruyuang ndak diakui dek inyo, makonyo patampuran indak dapek dihindari.
Mereka taruih mancubo mampangaruhi samo mambujuak kaduo urang tadi untuak manyarahan Majoano sampai mamintak mereka untuak mangakui wilayah itu kapado mereka untuak dijadian daerah baru di bawah Pagaruyuang dan merekalah nan mangatur sagalo sasuatu.
Tantu sajo panduduak asli di Alam Pauah Duo indak satuju model itu. Pasalisihan antaro duo kalompok iko samakin tajam, nan akhianyo konon pulo tajadi patampuran. Untuak partamo kali Alang Palabah jo Sikok Majolelo talibat patampuran jo pasukan Pauah Duo. Patampuran tajadi sapanjang Sungai Batang Pulakek sampai ka patamuan jo Batang Bangko sahinggo di Muaro Batang Pulakek ado kampuang sampai kini diagiah namo “Benteang” tampek atau garih bateh patahanan pasukan Inyiak Samiak jo Inyiak Samilu Aia.
Pasukan nan dipimpin Alang Palabah jo Inyiak Sikok Simajolelo sampai di Lubuak Jariang mahalangi jalan itu jo paga samo parit atau pamatang, nan disabuik Ampang Labua.
Kalompok Iniak Kurang Aso Anam Puluah susah mamasuki wilayah Alam Pauah Duo dan saketek agak mamaso jo kareh manarapan aturan-aturan adaik nan mereka baok sahinggo urang Alam Pauah Duo maraso di alahan wilayah kakuasaannyo, ndak dapek dihindari parang pu tajadi pado pabatasan ulayat.
Karano Alam Pauah Duo rakyatnyo saketek untuak malawan kalompok Inyiak Kurang Aso Anam Puluah nan labiah banyak, makonyo parang indak samo hinggo akhianyo urang Alam Pauah Duo malawan jo caro gerilya, marusak dan mangganggu katanangan hiduik inyo, kalau malam, aia sungai dikaruahnyo, diagiah tubo (racun dari tumbuhan), dikariangan/dialihaan (mangalah) dan sabagainyo sahinggo sawah jo kahidupan mereka taganggu atau indak tanang.
Lamo kalamoan pimpinan rombongan Inyiak Kurang Aso Anam Puluah maambiak kabijakan untuak mangirim juru bahaso untuak barundiang dan badamai jo urang di Alam Pauah Duo. Makonyo dikirim sabagai juru bahaso dan juru rundiang adolah Datuak Rajo Nan Baso (dari suku Bariang di Pasir Talang) supayo hiduik ado katanangan dan sawah sarato taranak indak diganggu. Makonyo dibueklah suatu kasapakatan untuak ndak saling mangganggu antaro kaduo balah pihak. Sampai kini Dt. Rajo Nan Baso manatap di Alam Pauah Duo dan Batigo, manjadi suku Malayu.
Talibat Parang Mausia Inyiak Gargasi
Saparti nan alah dituturan dek niniak-niniak carito iko turun tamurun di Pauh Duo kepado panulis. Niniak Moyang nan paratama kali tibo dan tingga manatap di Alam Surambi Sungai Pagu, tapeknyo di wilayah Pauah Duo, adolah Inyiak Samiek dan Inyiak Similu Aie, nan konon tibo dari Banua Mesir (Timur Tangah), kiro-kiro/sakitar ± 450 tahun SM. Beliau tibo untuak mancari wilayah baru (jembang) nan elok tampek tingga atau manatap jo manalusuri Sungai Batang Hari dari muaro ka hulunyo.
Pado maso itu pajalanan umumnyo manalusuri sungai karano alun ado jalan darek bantuak kini dan lagi labiah gampang manalusuri sungai daripado masuak ka dalam hutan balantaro karano jalur sungai ko dapek ditampuah dengan mudah tanpa rintangan nan barek.
Rombongan iko adolah rombongan nan paratama tibo. Untuak mangatahui suatu wilayah cocok atau idaknyo untuak ditampati, beliau mambaokaia nan barasal dari sungai Nil (Mesir) dengan sabuah kandi (wadah / tampek aia). Aia nan didapek ka ditimbang jo aia dalam kandi tersebut. Bilo aia tersebut samo bareknyo, wilayah itu cocok dan rancak untuak tampek kadiaman dan bakambang biak.
Rombongan iko manalusuri sungai tasabuik sahinggo sampai batamu muaro duo buah sungai/batang aia (batang Bangko jo Batang Suliti). Rombongan tersebut taruih menalusuri Batang Suliti sahinggo batamu wilayah nan agak data dek hamparan pasia nan laweh (Pasia Talang kini) di mano pasia nan gamilang tahampa di sapanjang sungai tersebut.
Sampai di situ rombongan iko baranti dan istirahat untuak mamanuhi kabutuhan pangan mereka manangkok ikan jo alat panangkok ikan, sarupo tangguak nan disabuik dengan Lapun. Sabagian ado yang menyebut Lakun namun tujuan/aratinyo samo. Mako dalam sajarah Alam Surambi Sungai Pagu, wilayah paratama nan dihuni mereka sabuik Banda Lapun/Lakun. Sasudah diadoan panalitian dengan caro manimbang aia dalam kandi samo aia nan ado di situ, aianyo idak samo barek.
Akhianyo mereka bapindah dari wilayah itu ka arah salatan, arah hilia Batang Suliti sahinggo mereka batamu jo muaro sungai nan parnah mareka tamui sabalum sampai di Pasia Talang. Ditalusuri pulo sungai itu dan ditaliti/ditimbang pulo aianyo, hasilnyo mulai agak mandakati barek aia dalam kandi tadi sahinggo dimudiaki pulo sungai nan ciek ko jo kondisi nan sangat rapek kayu dan samak balukar di sakitar sungai tasabuik.
Karano sangek rindangnyo papohonan sahinggo mareka sabuik kondisi saat itu dalam ungkapan “kayu gadang basilek banyie, rotannyo bajalingke, bakuangnyo basingguang daun, lagi samak lagi samun”.
Manuruik parnyataan di ateh, kaliatan daerah nan masih parawan samak balukar begitu padek, hanyo lobang nan bisa ditampuah jo caro manyaruak di sala-sala aka kayu jo rotan nan sangek labek. Demikian manuruik panuturan nan tuo wakatu dulu. Dari sikolah asa kato Batang Bangko adolah dari kodisi medan saat itu nan ditampuah, yaitu lubang ko (lobang iko).
Sasudah babarapa jauah bajalan batamu jo muaro sungai (di sakitar Benteang Koto Baru kini). Karano lakek jajak, mareka namoi pulo sungai iko jo Batang Pulakek dan ditampuh pulo (mudieki) sungai Batang Pulakek iko sahinggo batamu jo anak sungai nan malintasi (malinte), ditimbang pulo aia itu jo aia nan di dalam kandi, tanyato samo bareknyo, akhianyo dimudieki anak sungai tersebut nan tarakhir mereka agiah namo jo Batang Malinte Mudiek, dicari lokasi di sakitar Batang Malinte Mudiek tadi, daerah nan baiak untuak tampek manatap, jembang nan elok mako dibueklah koto nan sampai kini kampung itu tarkanal dengan sabutan Koto Tuo di Jorong Taratak Bukareh.
Memang dalam sajarah (ranji) nan dibacoan/diceritoan turun tamurun di Alam Pauah Duo, Koto Tuo itu adolah sabagai kampuang asal. Sasudah itu Inyiek nan Baduo bakambang dan mancari daerah untuak bacocok tanam atau ka sawah. Sampailah mareka manaruko sawah jo parak di daerah Pauah Duo, ka arah tapi sungai Batang Bangko, tapeknyo di daerah Ujuang Jalan kini, di situ ado namo kampung Pauah Duo.
Sabalum ditampati wilayah Pauah Duo, kiroe daerah iko alah bapanghuni. Konon ditampati dek Bangso Jin nan dalam carito/tuturan urang tuo-tuo (legenda) disabuik jo namo Si Tatok, Si Taran, Si Anja, dan Si Pilian atau disabuik jo Inyiek Garagasi atau samo dengan Raksasa kato mareka ikolah nan manguasoi wilayah itu. Akhianyo paparangan di antaro kaduo kalompok iko indak dapek diilakkan karano rombongan para inyiak-inyiak di Alam Pauh Duo taruih mandapek rongrongan, intimidasi, teror dari para gargasi atau sabaliaknyo. Gargasi maraso tarusik dek kadatangan rombongan inyiak.
Karano pasukan di Pauh duo saketek, tibo bala bantuan dari Pasia Talang, yaitu Pasukan di bawah pimpinan Alang Palabah jo Sikok Majolelo. Dengan bagabuangnyo kakuatan rombongan Inyiek Samiek dan Inyiek Similu Aie, sarato dubalangnyo/pasukan nan banamo Alang Palabah jo Sikok Simajolelo mako pasukan labiah kuek dan siap malawan raksasa Gargasi itu. Pasukan iko mancubo mangusia dan malawan bangso Inyiak Garagasi tadi.
Patampuran dahsyat tajadi banyak korban di kaduo balah pihak. Namun, hinggo akhianyo bisa dikalahan. Pasukan nan dipimpin Si Anja jo Si Tarahan sarato pengikuiknyo lari ka daerah Lubuak Gadang dan maningga di situ, sadangkan Si Tatok jo pasukannyo lari ka lauik, konon mati di Pulau Carocok/Mentawai dan Si Pilian lari sampai pasisia bahkan lari hinggo ka Pulau Siberut dan Aceh nan dikaja dek Inyiek Alang Palaba basamo pasukannyo. Pasukan Alang Palabah di wakatu lain juga malanjuikan kagiatannyo ka Pesisir Ranah Banda sapuluah.
Barikuik panuturan dalam Tambo di Pauh Duo dicaritoan turun-tamurun dan manjadi carito rakyat di daerah tersebut. Baa carito Alang Palabah malawan pasukan Inyiak Gargasi? Taruih niniak mulai bacarito. Barikuik carito panuturan tersebut.
“Sasudah Inyiak Garagasi tadi maraso dikalahan dek bangso manusia, Inyiek Garagasi bangih dan basumpah ka manjadian wilayah iko manjadi danau kambali bantuak zaman purbakala, bumi alun basentak naiek, aie alun basentak turun. Dari arah Salatan, diambiaknyo duo buah bukik di sakitar Taratak Paneh (sabagian tutur manyabuik saikua ula gadang) dan dibaok ka arah Ambayan, ciek lai dibuek malintang dari Pulakek ka arah Kotobaru (Kapalo Koto).
Samantaro itu, dari arah utara diambiak ditarik sabuah bukik hinggo malintang dari arah bukik batu di Pasia Talang, ditarik ka arah patamuan duo sungai Batang Suliti dan Batang Bangko (Muaro Kotobaru). Sabalum katigo bukik itu batamu, kiroe hari alah pagi, ayam lah bakukuak, murai lah bakicau, kiro-kiro manjalang subuah, fajar tabik di timur tando hari alah siang, mako Inyiek Garagasi tadi lari tunggang langgang sahinggo bukia nan dibaoknyo tadi ditinggannyo sajo. Kini manjadi namo-namo bukik di daerah Koto Baru kini, yaitu Bukit Pamatang Bukik Matang, Bukik Lintang, dan Bukik Bulek.
Mamang kalau diparatian fisik, bantuak sacaro visual katigo bukik, Bukik Pamatang mulai dari Rao-rao Koto Baru (ekor ular) sampai ka Kapalo Bukik (kapalo ula) berkelok-kelok seperti badan ular. Bukit Lintang dari arah Pasir talang (ekor) manuju ka Kiambang-Ambayan (kapalo). Demikian pulo dengan Bukit Bulek, mambantang bantuak ula dari daerah Pulakek (ikua) ka arah Ambayan di Sungai Aua-Kiambang, Nagari Kotobaru (kapalo). Katigo bukik itu mamanjang, bakelok-kelok bantuak ula, katigonyo hampia batamu di satu titiak bantuak sumpah para Inyiak Garagasi. Jikok katigo bukik itu batamu mako Bandalakun/Sungai Pagu dipastian tanggalam (Manjadi Danau) bantuak zaman purba).
Kagiatan Alang Palaba ka Pasisia Bandasapuluah
Sasudah kagiatan ka Bandalakun, Alah Palabah malanjuikan kagiatan ka Pasisia Bandasapuluah. Pasukan menalusuri Rimbo labek Bukik Barisan ka arah barat. Pajalanan bahari-hari manalusuri rimbo ka arah barat hingga akhianyo sampai di daerah Pasisia salatan, tapeknyo di Kambang. Di pasisia, Alang Palabah dan rombongannyo barhasil mandirian sapuluah daerah nan ka dikenal jo Banda sapuluah daerah nan didirian dek
Alang Palabah manjadi daerah kakuasaan Karajaan Alam Surambi Sungai Pagu. Adopun daerah Banda Sapuluah dimukasuik adolah:
- Aie Haji
- Sungai Tunu
- Palangai
- Punggasan
- Lakitan
- Kambang
- Ampiang Parak
- Surantiah
- Batang Kapeh
- Bungo Pasang
*Carito ko diambiak dari Kumpulan Carito Rakyat Minangkabau nan ditabikan dek Dinas Pendidikan dan Kebudayaan Provinsi Sumatera Barat taun 2016.
