Padang — Tigo tahun lamonyo indak basobok-sobok, grup WhatsApp Sakato Tuo nan barisi para pensiunan Rumah Bagonjong atau lingkungan Pemerintah Provinsi Sumatera Barat, akhirnya batamu baliak dalam suasana paniah kakariban dan haru.
Pertemuan silaturahmi ko diadoan di Aula Kantor Gubernur Sumatera Barat, Sabtu (22/8/2026). Pertemuan ko sekaligus manjadi ajang malapeh rindu dan mangenang baliak maso-maso para pensiunan ko masih aktif bakarajo di lingkungan Pemerintah Provinsi Sumatera Barat.
“Kanapo di Kantor Gubernur? Setidak-tidaknyo untuk mangenang baliak bahwa awak pernah baraktivitas di siko,” kato Hendrinal, mantan Kepala Biro Umum Pemprov Sumbar nan mauruih sagalao persiapan.
Pertemuan terakhir Sakato Tuo sabalunnyo dilaksanakan 18 Mei 2023 di Resto Suaso, GOR Haji Agus Salim, Padang. Pertemuan itu juo dihadiri salah seorang panggagas Sakato Tuo, H. Basril Thaher, mantan Inspektur Wilayah Provinsi (Irwilprov) Sumbar.
Drs Armyn An dan Achmad Yunis dua mantan pejabat Pemprov di usia sanjo
Bagi para yunior, H. Basril Thaher nan akrab disapo Da Bas, pertemuan tu tanyato manjadi pertemuan terakhirnyo jo kawan-kawan di Padang. Limo hari sasudah pertemuan, Da Bas meningga dunia di Yogyakarta, Senin (22/5/2023).
Dalam pertemuan kali ko, para anggota Sakato Tuo juo mambaco doa dan Al-Fatihah untuak para senior nan alah mandahului, di antaronyo Drs. H. Rusdi Lubis, Drs. H. Yohanes Dahlan, Drs. Sultani Wirman, Drs. H. Akmal Firdaus, Drs. H. Asroel Mas’ud, Drs. H. Yenifra, Drs. H. Arizallijar, H. Radjudsin Nuh, Drs. Saidani, Drs. Muchlis Sani, Ir. Surya Dharma, serta senior-senior lainnya.
Barawal dari Gagasan Da Bas
Ketua Sakato Tuo, Drs. H. Marzuki Onmar, nan akrab disapo Maron, dalam sambutannyo mangenang baliak asal-muasal lahirnyo komunitas para pensiunan ko.
Manuruik Maron, Sakato Tuo digagas oleh H. Basril Thaher basamo Drs. H. Akmal Firdaus. Gagasan awalnyo sederhana, yakni mamparkuat tali silaturahmi antaro para pensiunan nan pernah samo-samo bakarajo di lingkungan Pemerintah Provinsi Sumatera Barat.
“Parintah beliau kapado kami untuak maadokan pertemuan silaturahmi jo para pensiunan. Setidaknyo pertemuan tu untuak bagalak-galak, basenda gurau, dan malapeh taragak sasamo pensiunan,” kato Maron.
Sabab itu, beberapo kali pertemuan pun diadokan dan selalu dihadiri dek duo tokoh ko. Pertemuan pada 18 Mei 2023 menjadi pertemuan terakhir Da Bas jo kawan-kawannyo di Padang.
Para anggota Sakato Tuo
”Da Bas sengajo datang dari Pekanbaru untuak bagurau jo kawan-kawan di Padang. Limo hari sasudah itu, beliau pai untuak salamo-lamo,” kecek Maron dengan nada haru.
Sajak itu, pertemuan Sakato Tuo indak lai barlangsung. Barulah pado 22 Agustus 2026, ateh dorongan dan keinginan kawan-kawan untuak batatap muko baliak, silaturahmi tu diadokan.
Hendrinal basamo sejumlah kawan kemudian barinisiatif mancari tampek nan cocok. Akhirnyo diputuskan Aula Kantor Gubernur Sumatera Barat manjadi tampek batamu baliak para pensiunan ko.
Bukan Organisasi Formal
Sakato Tuo bukanlah organisasi formal nan punyo anggaran dasar, anggaran rumah tangga, atau kewajiban tertentu bagi anggotanyo. Komunitas ko labiah merupakan wadah silaturahmi bagi para pensiunan nan pernah samo-samo bakarajo di lingkungan Rumah Bagonjong.
“Indak ado hak jo kewajiban nan dibebankan. Kalau ado acara atas kehendak basamo, pembiayaannyo dilakukan malalui sumbangan,” kato Maron.
Zulnadi nan pernah jadi Kabag di Biro Humas mangakui, dalam beberapa kali pertemuan sabalunnyo, masalah biaya konsumsi acok menjadi kendala. Karena itu, paralu dipikiakan basamo supayo kegiatan silaturahmi dapek barjalan dengan labiah baik.
Zulnadi berharap pertemuan Sakato Tuo dapek dilakukan secara rutin, setidaknyo sakali dalam anam bulan.
“Dengan baitu, kito dapek saling mengetahui kaba dan informasi. Dari kito, dek kito, untuak kito,” kecek Zulnadi.
Ajal Pasti Datang
Pertemuan Sakato Tuo kali ko juo diisi dengan tausiah dari Ustaz H. Rahimul Amin, L.C., M.C., Imam Besar Masjid Raya Al-Minangkabawi sekaligus Pembina Tahsin di masjid gadang ntun.
Sabalunnyo, acara dibukak jo pembacaan Al-Qur’an oleh Syamsul Bahri, S.H., dan saritilawah oleh Mardiah. Sasudah itu dilanjuikan jo sambutan Ketua Sakato Tuo, Drs. H. Marzuki Onmar.
Turut hadir Penasehat Sakato Tuo, Prof. Dr. Ir. Fachri Ahmad, mantan Wakil Gubernur Sumatera Barat periode 2000–2005 sekaligus mantan Rektor Universitas Andalas. Fachri Ahmad datang basamo istrinyo nan akrab disapo Buk Yes Fachri Ahmad.
Dalam sambutannyo, Fachri Ahmad maingekan para pensiunan bahwa kematian atau ajal asolah sesuatu nan pasti datangnyo. Manusia, manuruiknyo, hanyolah sadang manunggu giliran dalam antrean nan indak diketahui pabilo ka sampainyo.
“Kullu nafsin dzaiqatul maut. Satiok nan baangok pasti akan marasoan mati. Kito mati, binatang mati tumbuh-tumbuhan mati. Bahkan malaikat dan jin pun akan mati,” kato Fachri.
Dengan suaro nan tasandek-sandek, Fachri Ahmad mangenang para sahabat jo senior Sakato Tuo nan alah mandahului.
“Sabagian dari kito alah mandahului. Kito pasti juo akan manyusul,” katonyo.
Karano itu, mantan Wagub Sumbar dan mantan Rektor Unand tu maajak para pensiunan untuak salalu bausaho manjadi urang nan baik salamo masih diagiah umua dek Allah.
“Salamo kito masih hiduik, barusaholah untuak tatap elok dalam arti nan luas. Tatap waras, jan sampai pikun, jan sampai lumpuah. Pakuaik iman dan pabanyak baka, sabalum antrean itu sampai kapado kito,” pasan liau.
Menurut Fachri, jauh atau dakek, lamo atau capek, kematian pasti akan tibo ka satiok manusia. Kesadaran ko, katonyo, juo musti selalu diingek dalam satiok langkah.
Tetap Bagarak Sasudah Pensiun
Fachri Ahmad juo manyampaikan pesan agar para pensiunan indak baranti maagiah manfaat bagi masyarakat meskipun alah indak aktif dalam pemerintahan.
“Walaupun alah pensiun, tataplah babuek untuak kamaslahatan masyarakat,” katonyo.
Ia menyoroti kondisi kehidupan masyarakat kini nan manuruiknyo semakin banyak menghadapi tantangan, termasuk kecenderungan sebagian masyarakat dunia nan mulai manjauah dari landasan agama dan moral.
Menurutnyo, kemajuan ilmu pengetahuan dan peradaban semestinyo tetap diimbangi dek iman, moral, dan akhlak.
Karano itu, sebagai urang tuo, Fachri maajak para pensiunan untuak maagih landasan agamo nan kuaik kapado anak dan cucu, khususnyo dalam kehidupan keluarga.
Diikuti 92 Anggota
Pertemuan silaturahmi Sakato Tuo balanhsuanh dalam suasana akrab. Para pensiunan nan lah lamo indak batamu tampak saling basenda gurau, maota lamak, mangenang babagai pengalaman salamo masih aktif di Rumah Bagonjong.
Berdasarkan daftar anggota dalam grup WhatsApp Sakato Tuo, tercatat sekitar 92 urang anggota. Di antaro nan hadir terlihat sejumlah senior, di antaronyo Drs. Armeyn AN, Drs. Yusman Kasim, Firdaus K., sarato sejumlah pensiunan lainnya, termasuk Ibuk Lis Rusdi Lubis dan Ibuk Yanti Yenifra.
Pertemuan ko bukan sekadar batamu baliak setelah tigo tahun sunyi senyap. Labiah dari itu, Sakato Tuo menjadi ruang untuak mangenang kawan nan alah tiado, manyambuang tali silaturahmi, dan saling mangukuah semangat agar tetap bermanfaat di usia nan alah lanjut.
Bagi para pensiunan Rumah Bagonjong, maso bakarajo memang alah barakhir. Namun, persahabatan dan silaturahmi indak mesti ikuik lo pensiun.(Tan Parpatiah)
