Padang — Bagi Sumatera Barat peluang ekspor untuk bakambang indak musti selalu ka Asia Pasifik nan berarti menuju pantnai timur Sumatera, tapi dihadokan awak lauik gadang samudera Hindia juo punyo peluang gadang untuk ditangkok.
Manga lo barang nan mesti diekspor ka Negara Teluk, India, Bangladesh, Pakistan atau negara-negara Teluk dan Timur Tengah mesti dibelokan lo ka Singapura jo Selat Melaka? Kan Taluak Bayua bisa jadi gerbang?
Mako kini Sumbar mulai manolehkan pandangan ka kawasan Samudera Hindia, manangkok peluang gadang untuak mambukak jalan dagang, investasi, pariwisata, jo karajo samo antardaerah jo antarnegara.
Salamo ko lah ado nan merintis, misalnyo PT Kunango Jantan, diam-diam tanpa basorak-sorak lah maekspor masin-masin produksi ka negara-negara di Afrika.
Langkah mamandang ka Barat ko dipandang makin penting dek jalur angkutan darat nan manuju pantai timur Sumatera balun juo lancar sabagaimano nan diharapkan. Salamo ko, jalur pantai timur menjadi salah satu pilihan utama untuak mangirim barang ka pasar Asia-Pasifik malalui Singapura.
Pelabuhan Taluak Bayua potensi gadang jadi pintu masuak rasaki Sumbar
Padahal, Sumbar punyo posisi nan sangat strategis di pantai barat Sumatera. Dengan Pelabuhan Teluk Bayua jo wilayah nan langsung mahadok ka Samudera Hindia, Sumbar sabananyo punyo peluang gadang untuak manangkok pasar Asia Selatan, Timur Tengah, negara-negara Teluk, sampai ka Afrika.
Peluang itu kini semakin relevan, terutamo dek tahun 2027 akan diadokan pertemuan tingkek tinggi negara-negara kawasan Samudera Hindia. Pemerintah Provinsi Sumbar pun manyatokan kasadiaannyo untuak menjadi host region atau tuan rumah Indian Ocean High-Level Forum 2027 tu.
Tawaran itu disampaikan dek Gubernur Sumbar Mahyeldi Ansharullah kutiko manarimo kunjungan Direktur Jenderal Asia Pasifik dan Afrika Kementerian Luar Negeri RI, Santo Darmosumarto, di Gubernuran Sumbar, Sinayan (10/8/2026).
Dalam pertemuan nan mambicarokan penguatan karajo samo Indonesia jo negara-negara anggota Indian Ocean Rim Association (IORA) itu, Mahyeldi manyampaikan usulan agar Sumbar dipercayoi menjadi tuan rumah forum internasional tu.
Forum itu diusulkan dengan tema “One Ocean, Boundless Opportunities”, atau “Satu Samudera, Peluang Tanpa Batas.”
Mahyeldi manyabuik, usulan Sumbar menjadi tuan rumah bukanlah sakadar untuak mandapekkan acara internasional. Lebih dari itu, forum ko bisa menjadi pintu untuak manampek an Sumbar dalam jaringan karajo samo strategis di kawasan Samudera Hindia.
“Sumatera Barat punyo posisi strategis di pantai barat Indonesia, bahadokan langsuang jo lauik gadang Samudra Hindia, sarato punyo kekayaan budaya, pariwisata, ekonomi, sumber daya kelautan, dan masyarakat nan terbuka terhadap dunia,” kato Mahyeldi.
Manuruiknyo, posisi geografis Sumbar marupokan modal nan baharago. Samudera Hindia jan sampai hanyo dipandang sabagai bentangan lauik di muko mato, tapi musti dijadikan jalur nan mamukak pintu dagang, investasi, pariwisata, jo karajo samo ekonomi.
Karano itu, Mahyeldi ingin forum iko dirancang bukan sakadar konferensi nan datang, duduak, bapidato, lalu salasai. Forum itu hendaklah menjadi galanggang nan mampatamukan pemerintah, pemerintah daerah, dunia usaha, investor, akademisi, organisasi internasional, komunitas, jo masyarakat.
“Jika disetujui, kami akan gagas forum ini bukan sekadar konferensi, tetapi tampek nan mampasobokan babagai pihak. Fokusnyo mempakuaik tata kelola laut, ekonomi biru, keberlanjutan lingkungan, konektivitas dan perdagangan, sarato kemitraan antardaerah dan antarnegara,” kecek Mahyeldi
Dari Bapidato ka Karajo Nyato
Mahyeldi baharok, forum iko mampu mambaliakkan karajo samo kawasan Samudera Hindia dari nan salamo ko banyak barupo dialog, manjadi karajo nan menghasilkan manfaat nyato.
Inyo juo mendorong supayo jaringan IORA indak hanyo barjalan antarpemerintah pusat, tetapi dipalaweh sampai ka pemerintah daerah, dunia usaha, akademisi, komunitas, jo masyarakat.
Dengan baitu, daerah-daerah di Sumbar bisa lebih bisa manjalin hubungan dagang, investasi, pendidikan, pariwisata, jo berbagai bentuk karajo samo pembangunan dengan daerah-daerah di negara kawasan Samudera Hindia.
“Sumatera Barat siap ambiak bagian dalam mampakuaik posisi Indonesia sebagai regional convener sekaligus manjadi salah satu pintu gerbang kolaborasi di kawasan Samudra Hindia,” kato Mahyeldi.
Bagi Sumbar, keceknyo, manoleh ka barat bukan berarti mambuang pandangan ka timur. Namun, membuka pintu baru agar peluang nan ado di Samudera Hindia dapat dimanfaatkan sabanyak-banyaknyo untuak kamajuan daerah jo kesejahteraan masyarakat.
Kemlu Sambut Baik
Samantaro tu, Direktur Jenderal Asia Pasifik dan Afrika Kementerian Luar Negeri RI Santo Darmosumarto manyambuik baiak gagasan nan disampaikan Pemerintah Provinsi Sumbar.
Santo manyabuik, Kementerian Luar Negeri siap mambantu jo mandukung berbagai gagasan karajo samo nan ditawarkan Sumbar dalam rangka memperkuaik hubungan Indonesia jo negara-negara di kawasan Samudera Hindia.
Nyo mampajaleh baso tahun 2027 Kementerian Luar Negeri mulai maadokan sejumlah workshop nan berkaitan jo pengembangan kemitraan negara-negara anggota IORA, khususnyo dalam bidang pariwisata, penanggulangan bencana, jo ekonomi biru.
“Pada saat nan samo, kami juo mandapekkan informasi dan siap untuak maagiah dukungan bagi babagai karajo samo, babagai kegiatan, berbagai forum nan akan diselenggarakan dek Pemerintah Provinsi Sumatera Barat, tamasuak forum karajo samo di antara para pimpinan pemerintah daerah nan ado di kawasan Indian Ocean,” kato Santo.
Bagi Sumbar, peluang menjadi tuan rumah Indian Ocean High-Level Forum 2027 ko jan baranti sampai di penyelenggaraan acara sajo. Handaknyo, momentum tu bisa menjadi pintu manuju pasa baru, ke Asia Selatan, Timur Tengah, negara-negara Teluk, sampai ka Afrika.
Dengan posisi geografis, kekayaan budaya, potensi pariwisata, sumber daya laut, sarato Pelabuhan Teluk Bayua nan dimiliki, Sumbar kini punyo alasan kuaik untuak mahengong ka barat dan manangkok peluang nan dibukak dek Samudera Hindia.(Tan Parpatiah)
