Padang – Pamarintah nan dipimpin dek Presiden Prabowo Subianto kini mahadoki gugatan dari masyarakat Sumatera Barat di Pengadilan Tata Usaha Negara (PTUN) Padang. Gugatan warga negara (citizen lawsuit) ko diajukan dek urang Sumbar nan manilai pamarintah alun maksimal dalam mancegah jo manangani bencana ekologis nan malanda ranah Minang pado akhir November 2025.
Gugatan ko manjadi perhatian, dek untuak pertamo kalinyo Presiden Republik Indonesia jadi salah satu pihak nan diguguik dek rakyat Sumbar di PTUN Padang lantaran dianggap punyo tangguang jawab dalam perlindungan lingkungan hidup jo kasalamatan masyarakat.
Manjawab gugatan tu, Presiden Prabowo manyampaian jawaban resmi ka majelis hakim PTUN Padang. Dalam jawaban tu, Presiden managaskan bahasonyo salamo ko pamarintah alah manjalanan kewajiban konstitusional sabagai kapalo pamarintahan jo manyarahan urusan pananggulangan bencana kapado kementerian jo lembaga teknis nan memang takaik dalam bidang masing-masing.
Pamarintah manyabuik, langkah-langkah pananggulangan bencana alah dilakukan sabalun jo sasudah kajadian. Di antaro nyo adolah pamantauan cuaco ekstrim dek BMKG, panatapan status tanggap darurat basamo pamarintah daerah jo BNPB, sampai kapado usaha rehabilitasi jo rekonstruksi daerah nan taraso dampak bencana.
Dalam dokumen nan disarahkan ka pangadilan, pamarintah manyatokan bahaso pambagian tugeh antar kementerian jo lembaga tu manunjuakkan Presiden alah manjalanan tugasnyo sasuai aturan nan balaku.
Indak cuman manjawek pokok gugatan, Presiden juo manyampaikan eksepsi atau keberatan. Pamarintah mamintak majelis hakim PTUN Padang supayo gugatan warga ko dinyatokan indak dapek ditarimo (niet ontvankelijke verklaard).
Manuruik pamarintah, ado babarapo persoalan formil nan harus diputus labiah dahulu, mulai dari kewenangan PTUN dalam mangadili perkara ko, kalangkapan pihak tergugat, sampai kapado dugaan cacat formil dalam gugatan.
Samentaro tu, Kapalo Divisi Advokasi LBH Padang, Adrizal, manarangkan bahaso gugatan ko lahia dek prihatin masyarakat terhadap bencana ekologis gadang nan malando Sumbar pado akhir November 2025 nan lapeh.
Bencana tu mamintak korban 233 urang maningga, 72 urang hilang, ribuan sarana jo prasarana rusak, sato hampia 300 ribu urang tarasok dampaknyo.
Adrizal manyabuik, gugatan indak hanyo ditujukan kapado Presiden, tapi juo ka salapan pajabat nagara lain nan dinilai punyo kewenangan dalam pangalolaan lingkungan jo pananggulangan bencana. Di antaro nyo Menteri Kahutanan, Kapalo BNPB, Kapolda Sumbar, Gubernur Sumbar, Wali Kota Padang, Bupati Agam, Bupati Tanah Datar, jo Bupati Solok.
“Mereka digugat dek karano mangabaikan kawajiban hukum untuak mancagah jo mangurangi risiko bencana,” kato Adrizal.
Pihak penggugat bapandapek, bencana ekologis di Ranah Minang indak samato-mato disababkan dek hujan labek jo faktor alam sajo. Manuruik mereka, karusakan hutan, lambeknyo pangawasan tata ruang, jo masih marajalelanyo tambang ilegal ikut mamparah kaadaan, sahinggo bencana nan datang manjadi labiah gadang jo manimbuakan banyak korban.
Urang-urang nan manggugat juo manilai pamarintah alun malakukan evaluasi nan sungguah-sungguah ka kinerja kementerian jo lembaga nan babidang lingkungan jo kabencanaan. Dek sabab itu, mereka mamintak pangadilan manyatakan pamarintah alah lalai dalam manjalanan tangguang jawabnyo.
Kini, perkara ko masih lun salasai. Majelis hakim PTUN Padang akan mamareso labiah dahulu eksepsi nan diajukan pamarintah sabalun mamasuaki peneriksaan pokok pakaro.
Gugatan ko manjadi catatan penting dalam sejarah hukum di Ranah Minang. Rakyat Sumbar mamiliah jalur pangadilan untuak manuntut tangguang jawab nagara, samantaro pamarintah baalasan bahaso saluruah kawajiban alah dijalanan sasuai aturan nan barlaku. Kini, kaputusan ado di tangan majelis hakim PTUN Padang. (Tan Parpatiah)
