Padang– Kaba nan marisaukan hati datang dari nagari urang di rantau. Ado padusi dari Jorong Garagahan, Kacamatan Lubuk Basuang, Kabupaten Agam, Sumatera Barat, nan ditahan di nagari Myanmar.
Kaba ko lah beredar di Medsos melalui video nan mampacaikan duo padusi Warga Negara Indonesia (WNI) dalam kaadaan tangan dibalanggu sambia mamintak tolong supayo dapek dipulangkan ka Tanah Air.
Salah saurang padusi dalam video tu dikatahui banamo Ayu urang Garagahan, Lubuk Basuang, Kabupaten Agam. Kaba ko manjadi paratian urang banyak, apolagi dek salah saurang korban barasal dari Ranah Minang.
Balai Palayanan Palinduangan Pakarajo Migran Indonesia (BP3MI) Sumatera Barat alah mangakui baso padusi dalam video tu memang iyo banamo Ayu, sasudah bakoordinasi jo Dinas Tanaga Karajo Kabupaten Agam sarato Polda Sumbar.
Kapalo BP3MI Sumbar, Jupriyadi, manarangkan bahaso sasudah video tu viral, pihaknyo langsung mangkoordinasikan ka pihak takaik untuak mambuktikan asa-usua korban.
“Sasudah video viral, kami langsung bakoordinasi jo Dinas Tanaga Karajo Kabupaten Agam jo Polda Sumbar. Hasilnyo memang bana Ayu adolah warga Kabupaten Agam,” katilo e.
Manuruik Jupriyadi, Ayu dipakiroan pai ka lua nagari malalui jalur nan indak resmi. Dek karano tu, BP3MI indak punyo data tantang kabarangkatan korban.
“Kalau pekerja migran pai indak malalui jalur resmi, kami memang indak punyo data nyo. Biaso nyo kami baru mandanga kalau alah tajadi masalah,” keceknyo.
BP3MI juo mampakirokan Ayu jo kawannyo tajarek ka dalam jaringan panipuan daring (online scamming) nan kini marak di babarapo wilayah Myanmar. Modus ko biasonyo mamancing calon pakerjo jo janji gaji gadang, tapi sasampainyo di tujuan malah dipaso manjalanan pakarajaan panipuan malalui internet.
“Kalau di wilayah Myanmar tu, biasonyo pakarajoannyo bakaitan jo scam atau scamming,” kecek Jupriyadi.
Kini, kondisi duo padusi ko masih taruih dipantau. BP3MI Sumbar alah malaporkan kasus ko ka Kamenterian Palinduangan Pakerjo Migran Indonesia (KP2MI) untuak mancari jalan panyalasaian jo mangupayokan supaya korban dapek disalamatkan jo dipulangkan ka Indonesia.
Kasus nan manimpo Ayu manjadi pangajaran nan gadang, khususnyo untuak anak kamanakan di Ranah Minang nan baniaik mancari karajo ka rantau. Urang tuo, mamak, ninik mamak, alim ulama, cadiak pandai, jo pamarintah salayaknyo labiah waspada jo salalu mangingekan supayo indak mudah tapujuak dek janji gaji tinggi nan indak jaleh asa-usuanyo.
Dalam adat Minangkabau ado pituah nan maaja an, ‘Ingek sabalun kanai’ Musaksuiknyo, sagalo langkah ka rantau harus dipikia masak-masak, ditanyo suok jo kida, dipastikan jalannyo resmi, supayo indak manjadi sasalan di kamudian hari.
Mudah-mudahan Ayu jo kawannyo capek dapek dibebaska dari penyekapan, salamat baliak ka pangkuan keluarga, jo manjadi pangajaran bagi urang awak agar salalu manampuah jalan nan sah dalam mancari pangidupan di rantau.(Tan Parpatiah)
