foto-foto: scren shot video Youtube Hasnul Fakhri
Padang, Khazanah — Kaba baik datang untuak masyarakat Sumatera Barat. Jalur nasional Lembah Anai nan manghubuang Kota Padang jo kawasan tangah sampai ka utara Sumbar ka dibukak baliak sapanuhnyo untuak sagalo jinih kandaraan pado akhir Juli 2026.
Kondisi ko manandokan bahaso salah satu urek nadi parhubungan di Ranah Minang lah baliak normal sasudah salamo kurang labiah tujuah bulan mangalami rehabilitasi sasudah dihondoh galodo gadang November 2025.
Normalnyo jalur Lembah Anai ko dipastikan mambao manfaat gadang, indak sajo untuak mamparancak labuah, tapi juo mampalancar pangangkutan hasia bumi, barang dagangan, pariwisata, sampai ka aktivitas masyarakat nan saban hari lalu lalang antaro Padang, Padang Panjang, Bukiktinggi, Agam, Limopuluah Kota, jo daerah lainnyo.
Salamo labuah di Lembah Anai ko mangalami karusakan dek bencana hidrometeorologi pado akhir taun 2025, masyarakat, supir angkutan, padagang, hinggo palaku usaha banyak nan maraso dampaknyo.
Wakatu tampuah manjadi lamo, biaya angkutan maningkat, distribusi barang tasandek, jo aktivitas ekonomi di banyak daerah pun ikut talambek.
Kini, sasudah pakerjaan rehabilitasi lah mancapai labiah dari 95 persen, masyarakat mandapek baliak jo harapan baru.
Labuah nan salamo ko jadi urek nadi parhubungan Sumatera Barat akan baliak malayani lalulintas sapanuahnyo, sahinggo mobilitas urang jo barang dapek bajalan lancar sarupo sabalun bencana.
Pejabat Pembuek Komitmen (PPK) 1.1 Balai Palaksano Jalan Nasional (BPJN) Sumatera Barat, Noor Arias Syamsu, manyampaian bahaso sado karajo fisik kini dipacu supayo target pambukaan panuah pado akhir Juli dapek diwujudkan.
“Kini, kamajuan pakerjaan pemulihan jalan nasional di kawasan Lembah Anai lah labiah dari 95 persen. Kami optimis saluruah pakerjaan salasai pado akhir Juli 2026, sahinggo labuah ko dapek dibukak baliak untuak sagalo macam kandaraan,” katonyo.
Manuruik Noor, pakerjaan nan masih disalasaikan antaro lain pambangunan drainase, panguatan lereang, jo panyampurnaan fasilitas kasalamatan jalan.
Pamarintah indak sajo mambaiki badan jalan nan rusak, tapi juo mampakuaik infrastruktur supayo labiah tahan dan aman dari ancaman bencana di maso nan ka datang.
Labuah Padang–Bukiktinggi malalui Lurah Anai salamo ko marupokan labuah paling sibuak di Jalan Nasional Lintas Barat Sumatera.
Satiok hari ribuan kandaraan mamakai labuah ko untuak mangangkek panumpang, hasil tani, logistik, jo barbagai kabutuhan masyarakat.
Kalau labuah ko lah baliak normal, mako distribusi barang ka pasa-pasa di Sumatera Barat dipastikan labiah capek jo murah.
Hasil pertanian dari Agam, Tanah Datar, Limopuluah Kota, jo daerah lainnyo dapek sampai ka Padang tanpa hambatan. Baitu pulo sabaliaknyo, pasokan kabutuhan pokok dari Padang ka daerah-daerah pedalaman juo baliak lancar.
Sektor pariwisata dipikirokan juo akan marasokan manfaat gadang. Wisatawan nan ka Lembah Anai, Padang Panjang, Bukiktinggi, jo kawasan wisata lain di dataran tinggi indak lai babayang-bayang jo gangguan jalan, sahinggo kunjungan wisata diparakirokan maningkek baliak.
Normalnyo labuah Lembah Anai ko manjadi bukti bahaso rehabilitasi pascabencana indak sajo mambaiki jalan nan rusak, tapi juo mambangkikkan baliak danyuik perekonomian, sosial, jo kahidupan masyarakat Sumatera Barat nan salamo ko sangaik bagantuang ka labuah nasional ko.(Tan Parpatiah)
