Jakarta — Sasudah dikadukan ka polisi dek Ikatan Keluarga Minang, Abu Janda alun manunjuakkan itikad nan baiak sasudah malontarkan ucapan nan dianggap mahino urang Sumatera Barat.
Ucapannyo dianggap bamuatan manyingguang suku, agama, ras jo antargolongan (SARA) nan manyabuik masyarakat Minangkabau jo Sumatera Barat sabagai masyarakat nan indak toleran.
Iko disampaikan Kuasa hukum Dewan Pimpinan Pusek Ikatan Keluarga Minang (DPP IKM), Dafrizal Djamari sasudah mandampingi Sekretaris Jenderal DPP IKM, Braditi Moulevey, mamanuhi panggilan panyidik Bareskrim Polri untuak mambarikan klarifikasi sabagai palapor di Mabes Polri, Jakarta, Sinayan patang (6/7/2026).
“Sampai kini ko kami alun pernah manarimo pamintaan maaf dari pihak Abu Janda. Indak ado nan disampaian, baiak sacaro tabuka, malalui kuaso hukum, ataupun pihak lain,” kecek Dafrizal ka media.
Manuruiknyo, sasudah laporan polisi dimasuakkan, Abu Janda cuman manyampaian bantahan ateh tuduhan nan dialamatkan ka dirinyo, namun indak disaratoi jo pamintaan maaf ataupun panjalasan nan manunjuakkan panyasalannyo.
“Nan ado cuman bantahan. Indak ado kato maaf, indak pulo ado panjalasan nan manunjuakkan rasa basalah. Kami manilai nan basangkutan alun manunjuakkan panyasalan ateh ucapan nan dipamasalahkan ko,” katanya.
Dafrizal juo manilai ucapan nan disampaian tu lah manimbuakan karasahan di tangah-tangah masyarakat, utamonyo urang Minangkabau.
“Reaksi masyarakat gadang bana, khususnyo dari urang Sumatera Barat jo urang Minang di barbagai daerah. Dampaknyo lah taraso jo dinilai lah malukoi hati masyarakat Sumatera Barat,” ujarnyo.
Samantaro tu, Sekjen DPP IKM Braditi Moulevey manjalehkan bahaso kadatangannyo ka Bareskrim Polri adolah untuak mamanuhi panggilan panyidik dalam rangka mambarikan klarifikasi untuak laporan nan lah diajukan.
“Alhamdulillah, hari ko kami lah salasaikan proses klarifikasi. Bukti-bukti lah kami sampaian, tanyo dari panyidik lah kami jawek. Kami juo mangucapkan tarimo kasih ka pihak Kapolisian nan manangani laporan ko,” kecek Braditi.
Laporan DPP IKM tarhadap Permadi Arya alias Abu Janda tu terdaftar di Bareskrim Polri jo nomor LP/B/230/V/2026/SPKT/Bareskrim Polri tangga 26 Mei 2026. Laporan tu bakaitan jo dugaan ujaran kabancian bamuatan SARA nan dinilai manyingguang marwah jo hati masyarakat Minangkabau jo Sumatera Barat.
Sampai hari ko proses hukum masih barjalan di Bareskrim Polri. Tapi lun ado lai panatapan status terangka dalam pakaro ko, sadangkan pihak nan dilaporkan sabalunnyo lah manyampaian bantahan ateh tuduhan nan dialamatkan ka dirinyo.(Tan Parpatiah)
