Jakarta — Pambangunan sumber daya manusia (SDM) nan santiang masih manjadi tantangan gadang dalam maningkekkan daya saiang tanago karajo Indonesia di kancah dunia.
Dek karano itu, usaho manguaikan kompetensi tanago karajo indak bisa dilakukan sacaro surang-surang, tapi harus malalui karajo samo nan arek antaro pamarintah jo dunia usaha, supayo sarangkuah dayuang jo kebutuhan industri nan taruih bakambang.
Pernyataan ko disampaikan dek Menteri Katanagakerjaan, Yassierli, kutiko mahadiri panandatanganan Nota Kasapahaman (MoU) tantang Sinergi Program Katanagakerjaan jo Pandayagunaan SDM antaro Kamenterian Katanagakerjaan jo PT Pertamina (Persero) di Jakarta, hari Sinayan (22/6/2026).
Panandatanganan kasapahaman ko dilakukan dek Sakretaris Jenderal Kamenterian Katanagakerjaan, Cris Kuntadi, jo Direktur SDM Pertamina, Andy Arvianto.
Pado kasampatan tu, juo ditandatangani Pajanjian Karajo Samo (PKS) Palatihan Vokasi Bidang Kasalamatan jo Kasehatan Karajo (K3) antaro Direktorat Jenderal Palatihan Vokasi jo Produktivitas Kemnaker jo Pertamina Corporate University.
Manuruik Yassierli, karajo samo ko marupokan langkah strategis dalam mampakuaik ekosistem katanagakerjaan nasional, tarutamo malalui pangambangan palatihan vokasi nan sasuai jo kebutuhan dunia industri.
Sinergi antaro pamarintah jo perusahaan handaknyo dapek malahiahan tanago karajo nan indak sajo cadiak jo tarampil, tapi juo sanggup manyasuaiakan diri jo parubahan zaman jo dinamika pasa karajo.
“Panguatan kompetensi tanago karajo harus dilakukan sacaro basamo-samo. Dunia usaha punyo paranan penting untuak mamastikan kemampuan nan dikambangkan memang sasua jo nan dimintak dek industri,” kato Yassierli.
Menteri asal Ranah Minang itu juo mandorong Pertamina supayo manjadi salah satu contoh dalam pangambangan SDM nasional, baik dalam pangalolaan hubungan industrial maupun dalam manyiapkan kemampuan maso depan (future skills) nan dibutuahkan di barbagai sektor ekonomi.
“Kami ingin banyak carito kasuksesan lahia dari Pertamina, tamasuak dalam manguatkan hubungan industrial jo pangambangan kompetensi SDM,” katanyo.
Samantaro tu, Wakil Direktur Utamo Pertamina, Oki Muraza, manyabuikkan baso kolaborasi jo Kamenterian Katanagakerjaan kini makin paralu sairiang jo maningkeknyo tuntutan operasional perusahaan dalam manjago katahanan energi nasional.
Manuruiknyo, kasuksesan operasional Pertamina indak sajo ditantukan dek sarana jo prasarana, tapi juo dek kasiapan SDM nan mangalola saluruah rantai bisnis energi, mulai dari sektor hulu sampai ka hilia.
“Satiok hari ratusan ribu pekerja di lingkungan Pertamina Group sato manjago kalancaran produksi jo distribusi energi nasional. Dek karano itu, kami mambutuahkan SDM nan indak sajo santianh sacaro teknis, tapi juo punyo disiplin tinggi jo budaya kasalamatan karajo nan kuaik,” kato Oki.
Sudah tu nyo tambahkan, baso kasuksesan operasi perusahaan salalu bamulo dari mutu urang-urang nan mangawakinyo.
“Di Pertamina Group, kasuksesan operasi dimulai dari SDM nan mangawakinyo. Merekolah nan mamastikan saluruah proses bajalan aman, produktif, jo mampunyoi kinerja tinggi,” katanyo.
Pado kasampatan nan samo, Komisaris Utamo Pertamina, Mochamad Iriawan, baharok kolaborasi antaro Pertamina jo Kamenterian Katanagakerjaan ko dapek manjadi landasan untuak mambangun pusat pangambangan kompetensi kasalamatan karajo nan barstandar nasional sampai ka tingkat regional.
Manuruik Iriawan, ruang karajo samo antaro kaduo pihak masih sangaik tabukak untuak dipabanyak, indak sajo di bidang palatihan vokasi, tapi juo dalam pangambangan talenta nan mandukuang transformasi industri, digitalisasi, sarato transisi energi manuju cita-cita Indonesia Emas 2045.
“Kolaborasi ko diharap manjadi langkah awal untuak manyiapkan SDM unggua nan sanggup manjawab tantangan industri maso datang, sakaligus manguatkan daya saing bangsa Indonesia,” keceknyo.(Tan Parpatiah)
