Padang – Pinyakik anak ndak namuah gadang badannyo atau nan disabuik stunting tanyato masih tinggi angkonyo di Sumatera Barat ko.
Berdasarkan Survei Status Gizi Indonesia (SSGI) 2024 kondisi iko memprihatinkan dan paralu mampakuek karajo samo untuak mampacapek pangurangan kasus stunting di daerah awak ko.
Kapalo Dinas Kesehatan Provinsi Sumbar, dr. Aklima manjalehan baso prevalensi stunting di Sumatera Barat badasarkan SSGI 2024 tacataik 24,9 persen. Samantaro itu, sacaro nasional tingkat stunting ado pado 19,8 persen jo target nasional 20,8 persen.
Manuruik Aklima, penanganan stunting indak bisa dilatakkan samato-mato pado sektor kesehatan. Hal iko dek babagai faktor nan mampangaruahi stunting takaik banyak hal sarupo sanitasi, lingkuangan, parumahan, jo kondisi sosial ekonomi masyarakaik.
“Masalah stunting ko indak bisa disalasaikan dek tenaga kesehatan sajo. Hal iko harus multi sektoral dan sadonyo pihak harus berperan karano banyak faktor nan takaik jo panyabab stunting,” kecek Aklima dalam Dialog Interaktif Indonesia Sehat di Pro 1 RRI Padang, Jumaik, 5 Juni 2026.
Inyo manjalehan, badasarkan data SSGI 2024, Kabupaten Solok marupokan daerah dengan prevalensi stunting tatinggi di Sumatera Barat, mancapai 29,5 persen. Samantaro itu, Kabupaten Pasaman barado di posisi barikuiknyo jo angko sakitar 29,1 persen.
Dr Aklima mangatoan baso tingkat stunting nan tinggi ko takaik arek jo akses ka aia barasiah, sanitasi nan indak cukuik, kondisi parumahan nan indak cukuik, jo risiko panyakik manular nan tinggi sarupo diare jo TBC pado anak-anak. Faktor kasajahteraan kaluarga juo mampangaruahi kamampuan untuak mamanuahi kabutuhan gizi balita.
“Stunting adolah masalah nan harus ditangani basamo-samo. Karano itu, kasadonyo organisasi daerah paralu bakarajo samo supayo babagai faktor nan manyababkan stunting dapek ditangani sacaro komprehensif,” katonyo.(tan parpatiah/rri)
